真面目
拍完未 《一代宗師》磨足 10年 章子怡坐正犧牲宋慧喬
2012年12月26日由 02年籌備到開鏡到埋尾，足足搞成 10年的《一代宗師》，上映日期一改再改，終於鐵定下年 1月 10日在港上畫。
導演王家衞一向慢工出細貨，不過皇帝唔急太監急，除了禦用男主角梁朝偉毫無怨言，完全配合王導步伐，其他如章子怡及宋慧喬都狂呻好難捱，更有傳宋慧喬嫌等得太耐，寧願劈炮罷拍，幾經交涉後只肯度幾個月檔期畀劇組，最終被導演大幅刪減戲分，轉捧章子怡做女一。 嘥兩年變閒角，據知宋慧喬怨氣重，隨時連柏林影展都唔去，唔再 嘥時間！
原於 12月 18日上畫的《一代宗師》，不斷將映期押後，雖然負責發行的銀都機構及負責香港宣傳的 Media Advertising講明電影鐵定明年 1月 10日上畫（內地早兩日），但近日行內有傳《一》仍未剪完片，未必趕得切如期上映，最壞打算要延至 2月先有得睇。
等多過拍
後期製作趕爆，戲中一班演員亦忙於補戲及配音，早前劉嘉玲亦踢爆偉仔仍要為電影做後期，肯定返唔到香港過聖誕，更寸爆王導阻住地球轉。
偉仔身為主角要全力配合，相反來自韓國、飾演葉問太太的宋慧喬卻等到發火，曾一度辭演。「由 09年尾開機到 10年尾，宋慧喬都係等多過拍，雖然劇組喺跑馬地租 咗間屋畀佢住，等佢唔使大陸韓國兩邊飛，但佢等 咗成年都未拍完，其間因為套戲而推 咗好多 job。賺少 咗錢，又要無了期等，宋慧喬曾經發曬爛渣話要返韓國，後尾大家傾掂數，最後拍到 11年 3月先拍曬！」幕後人員透露。
罷去柏林
外援心歸，王家衞惟有靠國產章子怡 孭飛。戲中飾演八卦掌掌門宮二的章子怡，與偉仔及宋慧喬會有曖昧三角戀，而預告片中亦有多場打戲，戲分遠超只得兩個大頭特寫鏡頭、出鏡得 3秒的喬妹。「章子怡上個月仲同人講，話日日都要趕戲，之前又唔見咁趕，佢都有少少埋怨。梗係啦，冇咗喬妹，啲戲加曬落佢度啦！」知情人士說。
對於戲分被刪，宋慧喬透過其中大華區的經理人回應本刊，表示未知拍足咁多年的「大作」，幾時能在家鄉韓國上映，更講明未必畀面去明年 2月的柏林影展。「電影𠵱家進入後期製作階段，出 嚟效果係點，大家都唔清楚，但我都非常期待！套戲成為明年柏林影展開幕電影，我覺得好榮幸，不過暫時未知能否出席，可能到時要拍劇！」原來 5年冇拍劇的喬妹，現在和 8年冇開劇的趙寅成趕拍重頭韓劇《那年冬天，起風了》，仲點會齋等王大導發落？
隨時 cut走
拍得王家衞就預咗隨時被 cut戲，但一班𡃁模小花依然仆到去拍，好似 Jeana同梁政玨都有幸被取用。但宋慧喬都被刪戲，你兩個咪咁開心住！
失蹤人口
王家衞一向我行我素，除 咗出名慢，亦愛將客串角色 cut走， 嘥大家時間！不過王導已經係國際級名導，演員想出名的話，就算有機會被刪戲都要博一博啦！
關淑怡
《春光乍洩》係關淑怡的處女電影作，可惜王導因片長關係，將關淑怡所有戲分全刪。為安撫對方，王家衞在 99年將刪剪片段收錄在另一齣紀錄片《布宜諾斯艾利斯－攝氏零度》中，更在柏林影展播放。
孫佳君
在《花樣年華》飾演梁朝偉老婆周太的孫佳君，在電影上映時有聲冇樣得個背脊，當時孫佳君狂呻失望，後來 DVD版收錄了 80分鐘從未曝光片段，孫佳君真身先可以重見天日。
妮歌潔曼
王家衞 04年公布會搵妮歌潔曼在電影《上海來的女人》做女主角，可惜搞足 3年、直到妮歌生埋女都未開得成，最後妮歌決定唔接拍專心湊女，電影亦胎死腹中冇再拍。
.[FACE]拍完未 《一代宗師》磨足 10年 章子怡坐正犧牲宋慧喬
http://veryy8.blogspot.com/2012/12/face-10.html
