搜尋此網誌

2013年3月15日星期五

忽然1周 920 ENTERTAINMENT 爆超盈兩度被飛 瞞四太自虐紋身




大封面

爆超盈兩度被飛 瞞四太自虐紋身

賭王女一向惹火,四太大女何超盈上周四發生「粉末事件」,迷暈街頭,頓成城中熱話,四太唔嬲就假。超盈自知闖下大禍,急急微博解畫,指自己因退燒藥及減肥藥夾埋食所致。

出事後,四太嚴禁超盈外出避鋒頭,更部署將超盈遣返英國,令女兒遠離香港班蒲友。而賭王則擔心女兒情緒出問題,連日探望。曾在 facebook慨嘆心靈空虛的超盈,呢一刻終於得到雙親關顧,認真諷刺。

性格反叛的超盈,一向戀愛大過天。去年中,超盈被好友撬走男友 Greg後,大受打擊,試過亂食藥減肥引致情緒失控,整損手腳,並瞞住家人在腰間紋下情傷紋身。今年她轉冧林愛兒,但這段情遭四太打壓,加上兩人近日情海翻波,再陷苦戀的超盈難怪又再出事。

「粉末事件」後,何超盈連日來沒有露面,四太亦對事件守口如瓶。周二下午( 3月 12日),記者截住四太,問她知否女兒腰間有紋身,她只是冷笑一下,便衝入大宅。不過,賭王因為擔心超盈,差不多隔日就前往探望女兒,可見他十分緊張。

超盈同時間又於微博放這張相,不過她就做了手腳,遮住腰部。

心理醫生:紋身代表內心脆弱

身心行為學家李寶能指出紋身的人性格空虛,他說:「紋喺前腹比紋喺背脊更私隱,紋喺啲咁私隱嘅部位,代表佢只想俾另一半睇到,係對感情冇信心嘅行為,紋身圖案睇落好威猛好大膽,查實內心好脆弱,對自己失去信心。」

美國紋身

本刊發現超盈的私人 facebook( fb)中,曾自爆失戀之苦及減肥壓力。去年 7月,她更向好友大曬「情傷紋身」。「去年 5月, Sabrina(何超盈洋名)同 Greg分手,情緒勁低落,去咗美國散心,之後就喺 fb曬張紋身相,以前曾聽過 Sabrina話怕痛,死都唔會紋身。所以班 friend見到張相個圖案紋喺腰,着衫遮住唔怕俾屋企人知。呢個紋身,亦時刻提醒佢帶眼識人,唔好信男人。」超盈密友透露。

據知這段情對超盈打擊甚大,其實 Greg與超盈拍拖期間,亦不時暗中約會其他女孩。超盈都知男友花弗,初時都死忍。但去年 5月,她發現男友原來同她的姊妹暗交,大受打擊下終於忍痛斬纜。

而超盈亦曾在 fb中寫下對愛情失望的睇法︰「 Someone should sue Disney for planting the ideas in little kids heads that every girl has a prince and everything ends up happily ever after」(意即廸士尼從小灌輸小朋友嘅白馬王子同大團圓結局係呃人,應該要告佢哋。)

貪靚的超盈為了保持身材苗條,一直有食藥減肥習慣,反而跟男友 Greg熱戀期間,寧願身材圓潤都冇食藥,甚少夜蒲,就連四太都罕有地對 Greg讚不絕口。不過自與男友分手後,情緒低落的超盈故態復萌,再食藥減肥。

迷暈銅鑼灣

上周四( 7日)下午,超盈單拖遊蕩銅鑼灣鬧市,其間她神志不清,鼻噴白色粉末,狀甚恐怖。《蘋果日報》圖片

超盈解畫

超盈迷暈一事震驚娛圈和社交界,但她竟然相隔 26小時後才於微博解釋,說當日的行為是溝藥所致。

網友嘆息

超盈的解釋惹起網友圍插,有敢言網友直斥超盈的解釋是藉口,叫她應要珍惜自己。

網洩空虛生活

超盈身邊不乏一班酒肉朋友,但交心朋友確實少之又少,因此她除了夜蒲發洩外,更經常於 facebook內留言,慨嘆富家女唔易做。

脹到百二磅

去年初,超盈與前男友 Greg行緊蜜運,因而身形亦向橫發展,五呎四吋的她,脹至百二磅。惟有借詩訴心聲。

轉載打油詩

早前超盈於 facebook轉載一段打油詩,詩中概述了她一年來的情況,除了因暴肥困擾,更透露自己為兩段情煩惱。

被 Greg狠飛

超盈經常帶 Greg出席活動曬幸福,可惜二人拍拖三年半,最終去年 5月分手收場。據知當時超盈情緒低落,曾暴飲暴食發洩。

渴求真愛

超盈早前曾轉載一段歌詞,暗示自己富貴生活只是微不足道,情願擁有一段真愛。

唔介意錯下去

超盈曾於 facebook留言指自己明知一開始是錯,也義無反顧錯下去,更稱這個錯誤是 best mistake,相信這是她對自己愛上林愛兒的寫照。

迷失性向

早年曾被拍到與 TB交往的超盈,一度重回正軌。可惜她自被 Greg狠撇後,又開始搭上中性打扮的林愛兒(林建嶽細女)。於打油詩中,超盈更寄望愛兒可以今年 2月主動出擊。

髮型屋高度戒備

上周四( 7日),超盈遊蕩近一小時後便被一名男子接走到利舞臺,有指當時該男子帶超盈上星級髮型屋 HAiR休息,之後再運路避開記者。

日前就有報道超盈出事前曾到 HAiR整頭,而接走超盈的男子亦被起底是髮型師 Jerry Liu(廖君亮)。周二( 12日),記者致電 HAiR預約 Jerry整頭,但職員說:「 Jerry冇做兩個月喇喎!」之後記者再到上址幫襯,有職員則指 Jerry間中上班,口供有出入。記者發現超盈出事後,髮型屋所有職員特別小心,不停留意四周有冇記者蹤影。周三( 13日), HAiR向傳媒發出聲明,澄清 Jerry已於去年離職,超盈出事當日更沒有到訪過髮型屋。

周三( 13日),本刊拍得髮型屋老闆 Kelvin Koo神色凝重,似為超盈一事急謀對策。

Jerry Liu與圈中人稔熟,是琦琦禦用髮型師。事發當日,他就幫超盈抹走粉末。《蘋果日報》圖片

夜店嗌交

去年尾,情場失意的超盈與謝玲玲女兒林愛兒撻着,還孖住蒲,在網上大曬恩愛照,但據知早前卻蒲出禍,一對小情侶因此情海翻波。

「林愛兒同 Sabrina拍拖前,女朋友都係品學兼優,前度 Claudia更係富二代中出名的乖乖女,嗰陣愛兒去蒲都係瞞住呢位女友。愛兒同 Sabrina玩到癲,一個禮拜蒲足三、四晚。不過早排喺『 play』(中環夜店),就見到愛兒同 Sabrina嗌交。事緣愛兒飲大咗手舞足蹈,拉咗個女仔上梳化跳嚟跳去,其間仲拉拉扯扯好親密。 Sabrina見到嬲到震,一走了之。聽講兩個後來仲因為呢件事冷戰。」不時愛在 instagram曬幸福的愛兒,近日亦沒有再上載她與超盈的甜蜜照片。而愛兒現已飛往美國工作,與超盈分隔兩地,兩人戀情正處於冷靜期。

超盈當年 14歲,與 TB打扮的 Jessie行埋,在街頭攬攬錫錫照片曝光後,四太為了令女兒斷纜,一度將超盈送到英國留學。今次超盈同 TB行埋,四太再棒打鴛鴦,要女兒再返英國。不過今次 22歲的超盈不肯就範。早前她更趁四太不在港,搬入林愛兒與母同住的九龍塘大宅,令母女關係一度變僵。不過「粉末事件」發生後,超盈都知衰,等候母親發落。

超盈 04年被拍得與 TB Jessie拖手行街,二人當時更以老公老婆相稱。

喜愛夜蒲的林愛兒,外表俊俏,加上玩得夠放,惹來不少女仔埋身。熱情的她,來者不拒,玩得興起便周圍攬女。

迷暈有前科

遊魂跑馬地

離開酒店時,超盈雙目冇焦點,腳步浮遊,要友人扶到實,但她身子卻左傾右斜。

呆坐一邊

10年 3月,本刊拍得超盈現身跑馬地英皇駿景酒店。記者聽到她匿在廁所致電友人呻爆壓力大,出來時更戴超遮面容,但鼻子紅紅,似喊過。

瘦到見骨

當時超盈身形極瘦,並且冇乜精神,背脊見骨,估計當時她得番 99磅。

狂野私相簿

記者從 facebook和 instagram兩大社交網站,不時發現超盈夜蒲相。當中超盈表現豪放狂野,但經常雙目無神。

高潮扯煙

超盈唔介意將扯煙相放上網任睇。

放縱含糖

超盈 11年曾與𡃁模鍾采羲玩埋,二人經常結伴夜蒲。

表情迷幻

鍾意蒲天光的超盈,經常蒲到淩晨三、四時,睇相顯示佢眼神遊離,影相都唔識望鏡頭。

醫生:冇可能有粉末

蔡堅醫生指市面上感冒藥有百多種,而感冒藥、退燒藥與減肥藥如過量服用或混合服用,所引起的反應通常是精神不集中,頭暈易嘔、與吸食違禁藥物後胡言亂語及神志不清等表現分別很大。他說:「呢啲藥一齊食,會唔會喺鼻哥下面出現粉末,我可以講係冇乜可能囉!如果有人堅持咁講,真係好罕見。」

麥玲玲:佢犯太歲

今年初,何超盈改名為何朗禎,志在加強運勢,「朗」字係想自己開心啲。不過蛇年犯太歲的她,更與流年相沖,運勢較差。玄學家麥玲玲指︰「蛇年係佢本命年,犯太歲之年本身特別容易情緒混亂、健康受損。加上佢生於丁亥日,同流年出現天幹、地支相沖, 60年先會發生一次,令運勢更加不穩。以五行筆畫數計,何超盈個名同佢命格唔太匹配,不利中年運、婚姻運。而何朗禎就好啲,不過個名較中性,稍嫌未夠完美。」

二、三房慰問

「四太叫保母𥄫實超盈,唔好俾佢出去見班豬朋狗友,又嬲到要送個女返英國。其實之前超盈私自改名朗禎,已經激到四太紮紮跳。今次單嘢四太狂接傳媒電話,仲唔躁曬底咩。賭王仲『哦』四太,要佢睇實個女,咪俾個女再出事。四太已決定等風聲冇咁緊,實行掟個女返英國讀書,講到明唔俾佢再同班豬朋狗友聯絡。據知事發後二、三房都有打俾四太,搞到四太好冇癮。」

11年 1月,四太曾因為爭澳博股份,與二、三房關係緊張,最後四太大獲全勝,順利接管澳博。今次超盈出事,二、三房罕有致電慰問,令四太顏面無存。而超儀亦公開笑住為細妹超盈護航,指超盈鼻上「粉末」是鼻涕,頓成網友熱話。

強顏歡笑

周二( 12日)下午,四太處理完公事後便立即返回位於淺水灣大宅。其間本刊記者問她關於超盈紋身一事,她一言不發,強裝笑容行入屋。

怒掟返英

超盈「粉末事件」成為港聞和娛樂頭條,令四太老羞成怒。據知她日內會遣送超盈回英國讀書,而四太亦會改捧次子何猷亨上位,頂替超盈陪她出席活動。圖片

賭王密探

同日賭王亦特登坐車到四房家,似乎他對超盈「粉末事件」甚為緊張。

為母讀金融

超儀割席

周二( 12日),二房的超儀出席電台活動,記者問她知唔知超盈有紋身時,她劃清界線說:「我鬼知咩!老實講句,我哋堅冇來往,真係冇點你。」

多年來,超盈與四太關係十分緊張,而孭住「何家淑女」包袱的超盈,曾向友人呻爆做賭王女壓力大,怕被傳媒跟蹤。賭王眾多女兒當中,她不似妹妹超欣及三房女兒超雲,被賭王點名力讚。而四房中,她又是長女,四太本來一心想培養她成另一個「超瓊」,要她讀 BBA(工商管理學士)。但超盈卻對做生意冇興趣,兩母女因此屢有拗撬。

四太掌舵澳博以來,一直勞心勞力,她積極培養超盈做接班人,超盈連讀書選科也是遵照母親的意願。 10年,本刊記者曾在英皇駿景酒店的廁所門外,聽到她喊住致電友人,呻爆壓力大,連讀書都不可以自主。

「四太一直想個女跟佢做生意,年半前仲冧掂賭王揼水幾千萬,俾超盈搞餐廳。不過超盈就一直愛理不理,到最後都係冇搞到。」與家人聚少離多,就連與朋友亦屢傳不和。 09年,超盈因不忿老死唐貝詩頻頻向傳媒放料,公開與她劃清界線,並指兩人再見不是朋友。

雖然生長富貴之家,但多年來渴望愛的超盈,卻一次又一次面對好友出賣及失戀痛楚,加上背負賭王家族壓力, 22歲的何超盈最終情緒爆煲。豪門風光背後,孤獨有誰知!

四太瓣數多

《蘋果日報》圖片

何鴻燊四房太太梁安琪百足咁多爪,在港澳及國內名銜多多。今次超盈出事有機會影響四太名譽,難怪她份外緊張。 05年,她開始參與港澳社會事務,現為保良局副主席,更是澳門特別行政區立法會議員。除此之外,她更有澳門博彩控股有限公司執行董事、澳門婦女聯合會名譽顧問等多個職銜。內地方面,她是珠海市政協常委,之後更身兼江西省政協委員。早前她更接待全國人大委員長吳邦國。

撰文:娛樂組

攝影:攝影組


.忽然1周 920 ENTERTAINMENT 爆超盈兩度被飛 瞞四太自虐紋身
http://veryy8.blogspot.com/2013/03/1-920-entertainment-1_2682.html
Related Posts Plugin for WordPress, Blogger...