搜尋此網誌

2013年3月15日星期五

蒙嘉慧 婚前婚後

蒙嘉慧 婚前婚後


蒙嘉慧 婚前婚後

      

me!週刊 第326期

報載,蒙小姐終於收服大細路鄭先生,大步檻過七年之癢。

情場如戰場,「蒙麵戀」一揭幕,彷彿全世界也看 Yoyo不過眼,萬箭衝著而來,惟愛不回頭,只好自己蒙住自己雙耳和雙眼;雖未至於與世隔絕,至少將焦點縮小至二人框框,他玩乜,她便玩乜。

今日,阿嫂笑瞇瞇分享自己跟老公生活點滴,多年來,大家一直想知女方怎樣降伏男方,今次,終於搔到癢處了。



Yoyo Mung

樹葉圖案釘珠片晚裝長裙$77,500 Leonard

透明膠手鈪(未定價) Cheap Monday from Liger

彩色漆皮併橙色蛇皮高踭鞋$7,500 Christian Louboutin

Profile

Yoyo Mung

出生日期: 1973年 8月 3日(獅子座)

出生地:香港

身高: 5呎 6吋

體重: 105磅

語言:廣東話、普通話及英語。

學歷:鳳溪第一中學中七畢業

簡歷: 97年,跟郭富城合作拍攝 One2Free廣告,飾演 Ivy一角備受

注目,即入行拍電影,曾以《非常突然》獲第 18屆香港電影金像獎

「最佳新演員」提名。 00年,加入無線。 12年,跟鄭伊健結婚。

主要作品:電影《非常突然》( 98),《暗戰》( 99),《擊情歲月》( 07)。

電視劇《妙手仁心 II》( 00),《烈火雄心 II》( 02),《陀槍師姐 IV》、《爭分奪秒》( 04),《胭脂水粉》( 05),《法證先鋒》( 06),《法證先鋒 II》( 08),《 ID精英》( 09),《仁心解碼 II》( 13)。

微博: http://weibo.com/u/2132542850

得閒結婚

蒙嘉慧 婚前婚後

Yoyo Mung

粉紅色塔夫綢圍巾頸飾$5,400 Dior

黑色禮服領背心外套$10,995 Maison Martin Margiela

閃電藍色短裙褲$3,050 Carven

both from Maria Luisa

影相時, Yoyo不停嚷著減肥,區區 105磅,所減無幾,要瘦不如要健美,最近,她每星期做 gym,「成日匿埋屋企唔得㗎!我唔悶得。新年個個肥幾斤,我 keep住每星期去 2次,成個人實淨咗!

「拍劇捱夜會瘦,一放假又肥,唔太健康,最好能夠 keep住拍唔拍劇都維持同一個狀態。」滿口健美心得,猶如鄭伊健上身。

新婚夫婦孖住做運動,甜如蜜,如果連開工也行孖咇,會否更美滿?「一定唔會,你哋都唔會想睇。」幕前抗拒合作,幕後可以吧!玩具生意真的由你管數嗎?「不實報導!唔會做生意,我鍾意做演員,佢都鍾意當一個表演者。」我笑她,攞正牌做鄭太,塵埃已落定,花邊新聞也該了結啦!「一直堅持,別人眼光,對我沒影響,身邊人點睇我,至係一切。

「其實,結婚前,去酒樓食飯飲茶,相熟夥計已叫我鄭太……當然,叫番我 Yoyo或蒙小姐,感覺更親切。」

那麼,你和鄭生也不會互喚一聲「老公、老婆」嗎?「記得咪叫囉!」我看到甜笑了。

「老實講,我哋一齊生活已一段時間,婚前婚後,心情沒分別;「一直以來,身邊不斷有聲音提醒(結婚),咁啱得閒,不如完成件事。」踏上人生新階段,日本古堡婚禮大家讚好,結婚這件「閒事」,實在叫人驚喜又窩心,「古堡係我朋友介紹,對方成日去旅行,最識各國古靈精怪地方,我哋未去過,結婚前去睇過一次景;「望住朋友開心,成件事已經好好。」

伊健好怕醜

Yoyo為人爽直,不拘小節,這跟鄭伊健健談的態度很夾;原來,外人覺得鄭生好玩,鄭太眼中,居然是怕醜。「我最大嘅影響,應該係令佢冇咁怕醜囉!

「初相識,佢好怕醜,譬如當我 5個朋友裡面, 3個佢唔識,一定唔肯參加聚會,用好長時間識勻所有人至會去玩。

「依家,問佢跟邊個去打羽毛球,『唔知喎!得一個朋友帶我去。』運動令佢唔再怕面對陌生人。」

來自破碎家庭,未出世,父母已離婚,跟外婆長大。 07年,外婆離世,她痛不欲生,「由細到大最驚就係婆婆要走。」當時,跟伊健拍拖,才不至於苦上加苦,「突然有種感覺,當我要去接受呢件事情,有個人在旁支持自己,力量係咁大,我唔再驚;自此之後,我希望呢段關係能夠更加穩定。」

蒙嘉慧小時候

History: 76年

三兄妺跟外婆的感情,比父母更深,「阿哥對婚姻冇乜信心,家姐照顧自己個家多過娘家。」多無奈。《蘋果日報》圖片

蒙嘉慧 婚前婚後

98年

初入行,拍住杜琪峰,獲提名「最佳新演員」,清麗氣質叫人難忘。圖片

二人由醫院探病開始,互相扶持,患難見真情。「見盡生老病死,伊健話『做人到最後,望返轉頭,所作所為,一定要對自己有交代。』唔係要做驚天動地事情,就算只係一個回憶,我哋都希望係一個美好回憶。」

惟望留住親情,她將對外婆的愛,轉送父母,「但佢哋唔慣,猛話『唔使成日見啦!』、『去邊都捉埋我,我唔想去呀!』我學識,愛一個人,對方唔一定接受,相反,你要接受佢嘅唔接受。」

生活轉舵,現在,她不再只看重事業。「以前,一個劇完,我好想知道下一個 job,依家, enjoy真空期,試其他事情,譬如跟港台拍劇、做導演、幕後製作等,睇一睇蒙嘉慧做演員之外,仲可以點?」老公找到了,連人生目標也霎時清晰過來。

「唔想到我瞓在病床回望時,我一生只停留喺 1-16廠。」

蒙嘉慧 婚前婚後

01年

細時活躍,大時纖瘦,莫講話早年拍廣告已沒半滴脂肪,今日所見,一樣 fit到漏。《蘋果日報》圖片



13年

幾時認定他為結婚對象?「去到一日,發現大家步伐一致,代表件事成熟。」

生仔係噩夢

蒙嘉慧 婚前婚後

Yoyo Mung

黃色樹葉圖案薄間棉釘珠片外套$56,500

黃色樹葉圖案短褲$10,500

both Leonard

有一兄一姐的 Yoyo,坦承唔想生仔,「我夢見過自己大肚,簡直係噩夢,夢中一直擔心揀學校、排隊、填 form,我有填 form恐懼症,唔好喇!」這大抵也跟家庭背景有關,所幸的是,這並未影響其婚姻觀,「我好彩,一出世已接受父母分開嘅事實,之後,仲識跟媽咪講,『呢個係你哋嘅人生,冇得勉強。』」凡事往好處去想,說穿了,唔樂觀唔得。「我有一個同父異母妹妹,佢已離開(自殺)。當時,眼見父母好傷心,自此,我學識每遇不快,盡快放低,因為人愈低落,等於迫自己走上絕路。」童年經歷不愉快,直至認識她老公,路才逆轉。

「伊健正能量好強!表達能力又好,每有負面情緒,叫自己『算啦!』佢真係算,我哋女仔講完,個心仲揦住嘛!佢呢種正面態度,感染別人。」

夫妻同心,盡情遊玩,爭取機會為感情保鮮,做老婆的,即使心驚,一樣拍心口上陣,捨命奉陪。

「伊健影響我玩好多運動,尤其水上運動,但我唔識遊水,學過潛水,潛完驚到發燒!

「我份人爛玩,又再跟佢玩獨木舟、滑板;其實我好細膽,但又想試新玩意,唔試過,對唔住自己。

「暫時單輪單車仲未吸引到我,太辛苦!

「佢天份比我高,我盡量去試。」

透過運動,培養默契,愈玩得多,人愈正面,「我哋貪玩,不過,全部都係健康玩意,朋友問『點樣增進夫妻感情?』我叫佢哋一齊做運動,譬如行山,若途中遇到分岔路、天氣突變、意見分歧等問題,一齊解決,如果永遠一班人聚會,雙方注意力永遠偏離。

「我哋比較多二人相處時間,玩獨木舟,隻艇漂浮大海中央,我就快反艇,佢即刻過嚟救我,呢啲咪可以增進感情。」

依 Yoyo所言,貪玩也是一種夫妻樂吧!「我哋最夾係乜?唔知呀!溝通到囉!」

後記

蒙嘉慧 婚前婚後

Yoyo Mung

深藍色斜布外套$14,995 Charles Anastase

紫色印花圖案斜布褲$7,795 Erden

both from Maria Luisa

黑色網布併流蘇邊半截裙$3,675

Alibellus+ from Secret Garden

橙金色蛇皮高踭鞋$9,000 Dior

我估,鄭氏伉儷最夾,大抵是大家都唔多鍾意影相,尤其是 styling。企硬四套, Yoyo好啲啲,肯試第四個半造型。

訪問中,她將一切正能量來源全歸功於他,事實上,當事人面對過那麼多家庭問題,仍選擇將負極變成正極,「冇怨過,凡事向好處去想,唔好一味睇唔好。」

講到底,自己人生,自己負責。

做成夫妻,就冇話你好我唔好,生命如大海,坐埋同一條船,喜怒哀樂,從此,兩份分。

Shop List

Christian Louboutin中環雲鹹街 10-12號地下 2530 2198

Dior金鐘太古廣場 347號鋪 2522 7938

Leonard中環太子大廈 137-138號鋪 2521 7733

Liger銅鑼灣白沙道 11號 1樓 3483 3948

Maria Luisa銅鑼灣利園 I期 211號鋪 2907 2028

Secret Garden柴灣工業城 2期 2樓 201室 3996 8357

撰文:伍淑嫻

形象:黃健華

攝影: Gary Lau

化妝: Dephine Chan

髮型: Nichol Yip@Hair



.蒙嘉慧 婚前婚後
http://veryy8.blogspot.com/2013/03/blog-post_8638.html
Related Posts Plugin for WordPress, Blogger...