搜尋此網誌

2013年3月15日星期五

忽然1周 920 ENTERTAINMENT 棄名份 求翻撻 剩女周麗淇箍紗廠太子爺




滾熱辣

棄名份 求翻撻 剩女周麗淇箍紗廠太子爺

周麗淇 08年與鄭嘉穎分手後,一年後暗交卓姓的紗廠太子爺 Eric,一心諗住嫁入豪門做卓太。可惜兩年來都冧唔掂男方父母,加上周麗淇逼婚成癮,最後連太子爺都嚇走埋。

經過一年剩女生涯,周麗淇痛定思痛,決定不求名份,只求復合,最近成功翻撻太子爺。本刊收到消息,兩人行埋已三個月,其間 Eric被街坊目睹多次到周麗淇租住的曼克頓山過夜。上月初,周麗淇遠赴澳洲做任賢齊個唱嘉賓,據知 Eric也有同行,兩人還共度情人節,在當地玩足十幾日。周一( 11日)周麗淇出席《女警愛作戰》活動,被問到是否與 Eric復合?她甜絲絲回應:「感情嘢我唔講,總之依家好開心啦!」

對終身幸福一向上進的周麗淇, 09年在家姐周汶錡穿針引線下認識紗廠太子爺 Eric,可惜因為心急嫁入豪門,令卓家上下反感,最終撻 Q收場,二人於 11年 12月正式分手。

保持低調

周麗淇和 Eric戀情一直保持低調,拍拖兩年,只試過俾傳媒影過一次同車廂。屢次逼婚不遂的周麗淇,今次成功復合,相信佢都唔敢逼得太緊。《 Face》圖片

夜訪香閨

本刊收到消息,今年一月秘密與 Eric翻撻的周麗淇,兩年前以三萬租住荔枝角的曼克頓山,近日有街坊目擊貌似 Eric的男子,經常夜訪其香閨。

周麗淇可謂無綫福將,新推出的《女警愛作戰》首集收得最高收視 31點。雖然劇中她飾演 dry爆女警,但現實中,她已暗地裏有人慰藉。

男方送上門

經一事長一智, 33歲的周麗淇學會兩人相處之道,最近主動要求復合。據知兩人翻撻已三個月, Eric更經常到訪周麗淇家。知情人士透露:「 Niki(周之洋名)同 Eric分手之後,兩個都仲好掛住大家。女嘅固然冇拖拍,男嘅就算有女埋身,都撻唔着。到去年, Niki主動 send whatsapp俾 Eric,話自己隻腳生瘤要開刀做手術,入院前想約對方食飯。 Eric梗知 Niki用意,應承食飯之餘,仲話介紹個喺外國返嚟嘅外科醫生朋友俾 Niki識,無幾耐佢哋就喺番埋一齊。」

據 Niki所住的荔枝角曼克頓山鄰居透露,近日經常目睹 Eric去 Niki屋企過夜,第二日見兩人一齊出門。相信舊情復熾的他們,比以往打得更火熱。

澳洲過情人節

周麗淇深明兩人相處不只是「過夜」,上月她為「大嶽娛樂」老闆任賢齊澳洲個唱做嘉賓。難得飛到老遠,周麗淇一於叫埋男友秘密同行。知情者續說:「 Niki攞正牌做嘢,又去到澳洲咁遠,好容易就避開曬啲記者。咁啱嗰段時間係新年兼情人節,佢哋喺嗰邊 hea玩咗十幾日都唔願走。」而自從與 Eric翻撻後,據知 Niki的港女性格搣得一乾二淨,每事都以 Eric行先,更絕口不提「結婚」二字,反而經常說一齊最緊要開心。

周一( 11日)下午,周麗淇相約家姐周汶錡和陳淑蘭等人到置地 high tea,兩姐妹雞啄唔斷。相信話題離不開周麗淇男友 Eric,皆因當年 Eric正是周汶錡做媒人介紹認識。《蘋果日報》圖片

11年,周麗淇與 Eric分手數月後, Eric被記者拍到攬住梅小惠遊中環,一度盛傳周麗淇敗給梅小惠,其實他們只是識於微時的好朋友。《 Face》圖片

奶奶政策

周麗淇明白與男友成功復合得來不易,要與 Eric關係持久,首要是冧掂未來老爺奶奶。據知身為生意人的 Eric父母,一向對娛樂圈女星冇好感,尤其是卓老太,認定女星全都是拜金女,所以一直拒見周麗淇。身邊人透露:「 Niki咁耐以嚟都冇見過男友父母, Eric以前安排過佢哋見面,但係都唔成功。今次難得復合, Niki講明唔會再輕易放走 Eric,會行奶奶政策。聽 Niki講最近終於有眉目,卓老太態度開始軟化,有機會嚟緊一齊食飯。」

怕愛巢見光

周二( 12日)周麗淇出席活動後,乘坐友人車離開,在眾多傳媒追訪下,她惟有返家姐周汶錡貝沙灣寓所,以免荔枝角曼克頓山的愛巢曝光。

𠱁掂兩老

有傳周麗淇因得不到 Eric父母歡心,因此當年入豪門夢碎。今次成功復合,周麗淇第一時間𠱁掂兩老。《 Face》圖片

默認復合

周一( 11日)周麗淇出席《女警愛作戰》宣傳活動,被問到是否與 Eric復合,周麗淇一聽到男友名字即時甜笑。

記:知道你同 Eric復合。

周:感情嘢唔回應,我依家好開心。

記:有人見到 Eric上你荔枝角屋企,一個星期到訪幾次喎!

周:(傻笑兩聲)私人嘢唔講啦,放過我啦!

記:同 Eric屋企人關係點?

周:唔好迫我啦,不如講吓套劇啦,我做女警係咪好英呢?下次再講啦, bye!

即使周麗淇口密,但個樣春風滿面,呃唔到人囉!

微博洩蜜

今時今日仍自稱單身冇仔吼的周麗淇,為保翻撻戀情,樂於做大話妹,但其微博早已暗藏復合證據。

今個農曆年,周麗淇到澳洲擔任任賢齊演唱會嘉賓。據知 Eric當時亦有陪女友同行,寓工作於拍拖,得愛情滋潤的 Niki明顯心情大靚。

今年情人節,自稱冇拖拍的周麗淇,忽然上載一束玫瑰花上微博,甜蜜翻撻之情不言而喻。

家產過億

天下男人多的是,周麗淇偏偏翻撻紗廠太子爺 Eric,就知佢係筍盤。原來 Eric父親卓仕章為金徽毛紗貿易有限公司老闆, 1986年創業,在東莞有幢三層高毛紗廠,香港辦公室位於葵湧,跟內地,甚至日韓都有生意往來。

物業方面,卓父及卓母現持有市值 4千萬的西貢碧濤花園大宅、兩個分別位於長沙灣及葵湧的地舖以及工廈物業。保守估計卓氏家族持有過億資產,若然周麗淇順利嫁入卓家,可安心做個少奶奶。

Eric的父母現居於市值 4千萬的西貢碧濤花園獨立屋。

Eric父親卓仕章 86年創立金徽毛紗貿易公司。記者曾到上址欲訪問卓老闆,惟至截稿前仍未聯絡得到。

撰文:娛樂組

攝影:攝影組


.忽然1周 920 ENTERTAINMENT 棄名份 求翻撻 剩女周麗淇箍紗廠太子爺
http://veryy8.blogspot.com/2013/03/1-920-entertainment-1_3351.html
Related Posts Plugin for WordPress, Blogger...