《神探高倫布》繼續重口味 蕭正楠擒啜馬賽

娛聞樂

《神探高倫布》繼續重口味　蕭正楠擒啜馬賽

港人口味轉得快，溫情催淚的劇集唔賣得，唯獨「姦」風四起的劇集逆市奇葩創高收視。下周一（ 8日）晚八點半，由李添勝監製的新劇《神探高倫布》，視帝黎耀祥陪住你撈飯。

同樣姦戲連場，繼續重口味， 31歲唐詩詠及 25歲馬賽為搶 48歲祥仔打崩頭，前者遭敖嘉年強姦，廿年後變中年怨婦，遠赴日本整容勾引祥仔。馬賽更慘，在下周首播劇情中，俾蕭正楠壓心口兼㩒住咀，仲要俾黎耀祥撩裙底，馬賽 BB蝕底曬囉！

第 6集心外壓

蕭正楠趕來營救馬賽，仲解開其衫鈕露出喱士邊背心兼施心外壓，奉旨抽水。

嘴對嘴

心外壓搞唔掂，蕭正楠索性幫馬賽做人工呼吸，成個過程成兩分幾鐘。蕭正楠笑曬口說：「我哋全部冇借位㗎，人工呼吸都係真咀，拍咗一兩 take搞掂。」開心得你吖！

車輪轉做心外壓及人工呼吸後，馬賽終於甦醒。她起初以為被蕭正楠侵犯而怒摑他，後來知道他是救命恩人。最後蕭正楠仲抱住她上警車，大團圓收場。

故事大綱

本身性格善良的高大喜（黎耀祥飾)，由大陸偷渡來港，得其父好友金路易（ Joe Junior飾)賞識加入警隊。

他在執勤時意外腦部中槍，子彈碎片留在腦內，激活腦細胞令智商急升，因而屢破奇案，成為神探高倫布。

之後金路易覺得唔對路，搵愛女馬賽做祥仔上司，以便監視他。點知愛女手指拗出唔拗入，處處維護高倫布。

而梅妹（唐詩詠飾)本為祥仔的舊相好，不過當時她見錢眼開，嫁給有錢佬，後被虐打。回港後她以交際花為業，重遇祥仔後，為討好祥仔不惜整容勾引他。可惜祥仔自中槍後，性格變得冷酷無情，自私自利，對女性亦好冷淡。但神探最後都俾唐詩詠征服，二人重拾舊歡。

第 3集

撩裙底

在第 3集，黎耀祥設局玩馬賽。搵隻曱甴爬入馬賽條裙入面，黎耀祥順理成章伸手入裙底捉曱甴。俾人調戲仲要猛多謝人，馬賽個慘情樣苦過 dee dee。

嘔住坐船

黎耀祥整蠱馬賽，命令下屬敖嘉年玩謝她。明知馬賽唔坐得船，呃她去捉賊，搞到她在船上狂嘔。

第 8集

整容扮少女

黎耀祥和馬賽不打不相識，最後女方仲舂個頭埋去愛上他。而唐詩詠原本是 40歲的婦人，與祥仔不見廿年。得知他身邊有馬賽，專登去日本整容，回復青春美貌。唐詩詠整容後返港，搖身一變成艷舞女郎。在舞廳工作的她，不時勾搭男性，為兩餐而犧牲色相。

兩女搶一男

中年怨婦唐詩詠，經常出陰招拆散馬賽和黎耀祥，最後奸計竟然得逞，搶番祥仔。壞人竟然有好結局。今次無綫都算破格！

裸背引誘

唐詩詠重遇祥仔，得知他做了神探，乘機跳艷舞勾引他重拾舊好。唐詩詠呢個全裸背是全劇最可觀位，得一幕㗎咋！

第 2集

黎耀祥做警察後，敖嘉年帶他到茶樓食飯，搵了「鬼馬知客」孫慧雪陪食飯。阿雪坐住祥仔大髀，仲施出撩陰爪，嚇到神探叫救命，好絕！

第 1集

首集講到黎耀祥中槍，子彈碎片留在腦內，導致智商變高，成為破案率達 99%的神探。同時他亦經常頭痛欲裂，每次頭痛他都會記起以前做「鄉下仔」的純樸日子及與唐詩詠的談情片段。而祥仔更戴假髮上陣，遮住個傷疤。（小圖）

撰文：娛樂組

攝影：攝影組

. 《神探高倫布》繼續重口味　蕭正楠擒啜馬賽
http://hittt.blogspot.com/2013/04/blog-post_2567.html