八卦嘢(八卦野) [八卦o野][日日818] : 攻「城」不敵熊黛林　肥苟轉撻已婚老闆

2013年4月5日星期五

攻「城」不敵熊黛林　肥苟轉撻已婚老闆

大封面

攻「城」不敵熊黛林　肥苟轉撻已婚老闆

29歲「宅男女神」苟芸慧，早前有傳介入熊黛林和郭富城的戀情。肥苟（苟芸慧）不單冇避忌，還陪樂易玲到城城演唱會挑機踩場，明剃「城嫂」眼眉。

苟、熊大戰一觸即發，但隨着城城在演唱會中，與熊黛林世紀一拖，確立正印地位，熊更開到口趕絕爛桃花。肥苟全面投降，更要當眾向熊黛林道歉。

表面上，肥苟「攻城」失敗，但本刊收到消息，在三個月前，她秘密與一年約 40歲，名叫 Stephen區的潛水店老闆交往。上周日（上月 24日），記者目擊肥苟陪男方到九龍塘喇沙書院泳池教潛水，二人在車廂內更調情 20分鐘。

經本刊追訪下得知，該名潛水店老闆其實早已結婚。周三（ 3日）其妻在記者追問下，直言唔知道老公和苟芸慧行得好埋。女神有鋪做小三癮，認真一地眼鏡碎。

買定咖啡

肥苟上車後， Stephen即細心地遞上熱辣辣咖啡，為女方製造溫暖。

唔知佢哋行得好埋！（真實對白）

Stephen太太石華敏，周三（ 3日）在潛水舖內接受訪問。當記者提到苟芸慧和其丈夫行得好埋時，她即時黑面，重複說：「佢哋行得好埋？唔知道，唔清楚！」

苟芸慧 09年參加中華小姐選舉奪冠後入行，隨即獲無綫力捧。翌年，遭踢爆與細自己四年的港男羅天宇拍拖，姊弟戀遭無綫打壓，最終二人於去年二月分手。與羅天宇分手後，氣質清純卻擁有 34、 25、 35豐滿身材，集魔鬼天使一身的苟芸慧，先後傳出與鄭嘉穎、謝天華和高鈞賢撻着，被封為新一代電視姣精。早前有傳她得城城欽點拍 MV拍出愛火，肥茍更直踩城城演唱會睇騷，坐貴賓席不特止，且不避嫌入後台探班兼合照。不過見慣風浪的熊黛林，翌日即拖阿媽高調捧場宣示主權，對於城城「遇上爛桃花」言論，熊黛林更大發雌威說：「爛桃花唔去惹就冇事！」至於城城，亦識做地在演唱會中，向正印伸出「拖手」，與女友世紀握手。「富黛」連消帶打，肥苟即時走夾唔唞！

軍車接載

當日 Stephen所揸座駕是價值 70萬的 Benz G300越野軍車。肥苟未上車前，隨意將手袋放到後座，看來早已坐慣坐熟。

城城欽點苟芸慧合作拍 PCCW廣告而傳緋聞，肥苟不避嫌陪樂易玲去睇城城騷，當正印冇到，難怪城嫂熊黛林要攞打「苟」棒入場。《蘋果日報》圖片

《蘋果日報》圖片

車廂調情

城城撬唔鬱，原來女神早已有兩手準備。據知肥苟在去年十月，經徐子淇姊妹陳君宜介紹，跟 Diving Adventure老闆 Stephen Au（區紹堅）學潛水，結果潛出愛火。上周日（ 24日），肥苟到荃灣出席完《仁心解碼 II》宣傳活動，其後與同劇女演員李綺雯到九龍塘又一城 high tea。其間，記者發現她頻頻 WhatsApp。過了大約 1小時，與李綺雯分手後，肥苟獨自乘商場電梯到地面，鬼鬼祟祟邊行邊左右兩邊擰，一反以往淡定常態。她快步行了兩條街後，記者發現原來 Stephen Au的黑色越野車早已在等候她。

只見肥苟熟練地跳上車， Stephen即時將一早買定的咖啡遞給女方。其間，肥苟不時含情脈脈望着對方，又露出懷春笑樣。二人在車廂內密密傾纏綿足足廿鐘， Stephen才捨得開車，並將車駛到附近的喇沙書院。原來當日 Stephen在該書院有課程要教授，當天不用上堂的肥苟，卻樂於做跟得女友陪男友授課。穿上高踭長 boot的她，雖然在濕滑泳池行走險些跣腳，但她仍在學校堅持陪足男方接近三小時才乘的士離開。

池邊陪教潛水

出席完活動冇換衫的肥苟，直接陪 Stephen Au到泳池，伴住男方教潛水。其間卻忽然除了一隻 boot放在側邊，十分騎呢，而當日肥苟好友陳君宜（左一）亦有在場。

肉質肥美

苟芸慧自出道以來，一直俾人話大隻。早前她現身克勤節目《決戰一分鐘》玩遊戲，擘腿時更凸顯其「肥美」下盤，難怪她要下決心學潛水減肥。

現實中，肥苟暗撻已婚熟男；巧合地，在劇集《仁心解碼 II》中，唔少靚仔醫生都嗒她糖，她偏偏鍾情木獨熟男陳國邦。

肥苟：鍾意成熟圈外男

據知，肥苟和 Stephen在去年十月認識，到年初才經常約會，關係似乎更進一步。知情人透露：「 Christine（苟芸慧）本身肥底，食少少嘢就好容易肥，試過跑步做 gym甚至搣脂都冇效，佢聽人講話潛水好易瘦，咪走去學囉。佢搵 Stephen教潛水， Stephen一直當佢妹妹仔咁，不過 Christine一個禮拜跟足佢學三堂，由最初一班人教，冇耐 Christine話要單獨跟 Stephen學，其他人都覺得奇怪。最近一次潛水班同學出嚟食飯，見到 Stephen同 Christine孖住行入嚟，有個口痕友仲問佢哋係咩關係？ Stephen矋一矋佢，講咗句『咪多事』就冇再講嘢。其實大家都估到咩事囉！」

據知，雖然 Stephen年過 40歲，樣貌與黎姿老公馬廷強更有幾分相似，但為人細心體貼，深得女學員歡迎。至於苟芸慧，自從一年前與羅天宇的姊弟戀告吹後，受情傷的她，抗拒再與年紀比她小的異性拍拖，反而鍾情年紀大一截的熟男。她早前在訪問中亦露口風說：「人大咗，依家擇偶條件鍾意男仔成熟、有愛心同信心，如果因為我係『女神』而唔敢追我，我唔會鍾意！我對感情向來隨緣，可以嘅話都想搵個圈外人。」

黐實長腳蟹夫婦

上周五（上月 29日），肥苟相約長腳蟹夫婦到中環一意大利餐廳食晚飯。冇男友在身邊的肥苟，全晚黐實呂慧儀密斟，其間不時望電話，狀甚緊張。

攞車時苟芸慧發現有記者，三人即快步登上呂慧儀車。當駛至路口時，長腳蟹忽然停車攔截記者的採訪車。此時，坐在車上的苟芸慧乘機跳車登上一部的士離去。

避忌回應關係

周二（ 2日），苟芸慧離開寓所時，記者追問她與潛水店老闆的關係。對於二人是否拍拖，她最初不發一言，只說當日是一班人去睇他教潛水，其後才說對方不是他男友。

潛水老闆有老婆

緋聞旺財

多得與城城傳出緋聞帶旺人氣，肥苟近日幾乎日日見報，更帶挈吸金。連她自己亦說：「緋聞唔多唔少有幫助，真係多謝曬！」

雖然潛水店老闆 Stephen合曬肥苟擇偶要求，但經本刊連日追訪下，發現 Stephen原來早已有老婆，老婆更是其潛水店的股東之一。知情人續說：「 Stephen老婆雖然係潛水店股東，不過佢好少會陪老公去上堂，反而會留喺舖頭睇住檔生意。所以佢老公同邊個玩得埋，佢根本唔會知。」周三（ 3日），本刊到銅鑼灣軒尼詩道 Stephen的潛水店舖頭，職員告知 Stephen身處外地工作，反而其妻則在舖頭看舖。最初記者向她提到其夫生意做到有聲有色，區太笑不攏嘴。但當提到其夫經常車苟芸慧及二人行得好埋時，區太隨即黑面發晦氣說：「佢哋行得好埋？我唔知道，我唔清楚。」

搵長腳蟹擋駕

區太嬲到出面，相反，又惹爛桃花的肥苟，表現卻異常風騷。上周五（ 29日）到將軍澳出席完活動後，晚上就約了長腳蟹（呂慧儀）夫婦飯敍。席間，肥苟與長腳蟹有講有笑，更不時將儲存在電話內的相片給對方觀看。直至返家途中，記者再次見到肥苟不停 WhatsApp，而且神色焦急。其間，三人發現記者，跳上車後，長腳蟹極速搵座駕攔截記者的採訪車，讓肥苟跳車乘的士離開，相信肥苟應該佳人有約。

周二（ 2日）肥苟離開寓所時，對於記者追問與潛水店老闆關係，她一直默不作聲，沉默良久才表示，當日是一班人看他教水，表現迴避！

記：記者苟：苟芸慧

記：我哋知你同潛水店老闆 Stephen最近行得好埋？你哋咩關係？

苟：……（一直不出聲）

記：上星期，我哋見到你陪佢一齊去教潛水？

苟：……嗰日係一班人睇佢教水。

記：我哋見佢單獨車你，你哋喺車廂傾咗好耐？

苟：……（再次沉默）

記：佢專登買咖啡俾你飲，你哋係咪拍拖？你知唔知佢有老婆？

苟：我哋係朋友……佢唔係我男朋友。

熊黛林金句，爛桃花唔去惹就冇事，不過肥苟睇嚟仲未學精！

愛上潛水達人

被本刊斷正與苟姑娘在車廂調情的 Stephen Au（區紹堅），雖然其貌不揚，但來頭原來不小。他與妻子石華敏於 98年創辦 Diving Adventure潛水中心。開業十多年，規模不斷拓展，其位於銅鑼灣軒尼詩道的店舖，佔地超過 5千呎，至今已是香港數一數二的潛水訓練中心。而 Stephen Au現時報稱的地址，是有富貴居屋之稱，市值 600多萬的港島東濤苑。

據知過往圈中有很多電影及 MV要拍攝水底鏡頭，必會找他做顧問，因此他與不少藝人熟稔。而陳法蓉、張燊悅更是其門生之一。店內更張貼多張明星如方力申、林憶蓮、吳彥祖和謝霆鋒幫襯的照片做生招牌，難怪生意滔滔不絕。