搜尋此網誌

2012年10月6日星期六

[忽然1周]無綫加人工留甘草  77歲羅蘭為 2千做到殘

直認續約 <br><br>羅蘭親認與無綫剛續約一年,騷價亦加了二千。她表示加人工屬其次,最怕劇接劇冇得攤唞。 <br><br>怕頂唔順呀!(真實對白)


娛聞樂

無綫加人工留甘草  77歲羅蘭為 2千做到殘

2012年10月05日

最近羅蘭憑《天梯》加海洋公園哈囉喂的聖羅蘭造型,再次引起全城熱話。足證 77歲的她,人氣依然高企。

據知去年她續約無綫時,騷價只象徵式加了五百元。上月約滿,無綫因得悉王維基開出加兩倍人工利誘她過檔,才主動提出每騷加多二千元留她,即現時羅蘭騷價已由三千五百元加至五千五百元。薪酬大幅提升,無綫當然用到盡要她劇接劇拍不停。在短短半年間,羅蘭狂拍四套 25集電視劇,比一線花旦的工作量還要重。

繼續捱騾仔做到殘,羅蘭有感而發:「老人家拍劇當然辛苦啦,我有耳退化同腳退化,都怕辛苦頂唔順。」

羅蘭入行 62年,曾為無綫及亞視效力。不過近年患上腳關節退化的她,一度要減產。直至去年,她才回無綫拍《天梯》,更以象徵式每個騷加價五百元簽約 1年。最近,無綫再以新劇及將騷價由三千五百元調升至五千五百元利誘她留低,最後她應承再續約 1年。簽約後不久即連拍《幸福摩天輪》及《老表你好嘢》,辛苦錢唔易賺。

放大圖片

飯堂醫肚

人工不算多,獨居在何文田的羅蘭平日好慳儉,拍《天梯》時,除以公共交通工具代步,亦愛到較便宜的公司飯堂食飯,慳得一蚊得一蚊。

放大圖片

稱職奶奶

在《天梯》中,羅蘭飾演張可頤的奶奶,為趕走小三陳茵媺及對抗大伯張翼,不時嗌到聲嘶力竭,情緒大上大落,七情上面。

放大圖片

錫曬陳豪

周日( 30日),《天梯》眾演員出席宣傳活動。為幫新劇造勢,羅蘭主動錫了陳豪一啖,更搞笑地說:「我真的好鍾意好鍾意陳豪!」

放大圖片

化爛面妝

在新劇《幸福摩天輪》中,羅蘭飾演一個爛面婆婆,要尋回失散多年嘅弟妹。她為化爛面妝,仲要每日提早兩個鐘返無綫準備,認真敬業。

無綫臨時加人工

去年,王維基的「城電」已成功撬走無綫不少甘草如元華、秦沛、石修及陳安瑩等人。據知演「龍婆」街知巷聞的羅蘭亦是「城電」重點挖角對象之一。

自從不少資深演員離巢後,無綫藝員科已加緊同即將約滿的演員傾續約及以劇留人。知情人透露:「羅蘭姐本來今年 9月先約滿,早兩個月無綫已經叫佢留低。原先諗住再加多 5百蚊騷價箍佢簽 1年約,但知道王維基想出雙倍價錢撬佢走,先改為加多兩千蚊騷價。不過當然有條件,依家甘草咁渴市,梗係要佢劇接劇。而每套劇一拍就拍三個月,無綫唔會死錯人嘅!」

羅蘭:做乜都辛苦!

據知羅蘭有腳患在身,知道合約條款後,亦擔心自己應付不來。最初無綫承諾一切以她身體及精神狀況為前提,才安排工作量,不過當羅蘭簽約後,就要面對排山倒海的工作。除了《幸》劇和《老》劇外, 11月,她將會疊住拍兩套劇,包括與郭晉安、李思捷等人拍林志華監製的新劇及梁家樹監製的古裝劇,大隊更有機會要遠赴橫店取景。長途跋涉,對一個有長期病患的老人家來說,絕對係苦差。

周日( 30日),本刊在《天梯》活動上訪問羅蘭。她大方承認已經同無綫續約一年。「我上年簽咗無綫無耐,王維基嗰邊就有人搵我過檔。早排我喺無綫差唔多約滿, TVB話林志華監製套新劇想搵我拍,問我意思點,『想拍就要續約啦!』咁我諗住做生不如做熟咪簽番。(今次續約好似加咗二千喎?)都差唔多 2,000蚊。佢哋冇限定我最少拍幾多套,其實做乜都辛苦,不過 11月我都疊住開兩個監製劇,都怕頂唔順呀!我耳退化同腳退化,成日腳痛,依家都要戴住護膝開工。」

77歲的甘草羅蘭不求加人工,只望不要捱夜。希望無綫咪捱殘老人家至好呀!

放大圖片

扮聖羅蘭

在最新海洋公園的哈囉喂廣告中,羅蘭以中性打扮出場,扮演「聖羅蘭」。廣告一出,引起網友熱烈討論。

放大圖片

奔波宣傳

近期,羅蘭除不時為新劇《天梯》宣傳外,日前( 19日),她和陳慧琳、謝霆鋒出席海洋公園的哈囉喂派對,其間她與 Kelly交足戲扮鬼扮馬。

甘草搏命拍

羅蘭曾奪得金像獎影後,分量舉足輕重,在無綫的騷價尚可企硬。

但其他同期甘草的待遇就沒有她這麼好,騷價奀之餘,工作量又多,一年內劇接劇做唔停,得個捱字。

(騷價是用來計算藝人拍劇的收入單位,一集等如兩個騷,如在劇集播出首半小時有出過鏡,就計第一個騷,後半小時出現就計第二個騷。)

夏萍

74歲

劇集包括

•《女警愛作戰》

•《法網狙擊》

•《戀愛季節》

•《心路 GPS》

騷價$2,000

雪妮

67歲

劇集包括

•《東西宮略》

•《結.分@謊情式》

•《天梯》

騷價$2,000

羅樂林

69歲

劇集包括

•《雷霆掃毒》

•《叛逃》

•《心路 GPS》

•《初五啟市錄》

騷價$2,500



Related Posts Plugin for WordPress, Blogger...