媽咪姐
蘇基空降旺角男女通殺
2012年10月05日
《巴不得媽媽》雖然播完兩星期，但挾著蘇基餘威，古明華（古佬）喺 29日迎月夜，應《忽周》嘅邀請搞咗個簽名會，連踩油麻地碧街同旺角登打士街兩間 Circle K便利店，同《忽周》讀者近距離接觸，派月餅過中秋。
當晚場面相當墟冚，有老有嫩逼爆成條街，有啲人群仲企咗出馬路，如果阻到司機大哥，真係要講聲 sorry喇！不過估唔到蘇基個 market咁大，有男有女、有婆婆、有叔叔、有小朋友、有學生妹，仲有外籍人士……勁呀蘇基！其間不斷有途人大叫：「蘇基，加油呀！你一定會攞獎，繼續拍多啲電視劇呀！」感動到古佬有啲眼濕濕㖭。
歡樂時間過得特別快，眨嚇眼 200個籌簽完，月餅亦派曬，但啲街坊依然唔捨得走，仲掹住古佬衫尾話：「我唔要月餅，你同我影相留念得啦！」古佬當然來者不拒。大家就影得 happy，最慘係佢老婆古嫂，喺附近等足 3個鐘，等老公做節食飯，蘇基背後女人真係唔易做㗎！
咪話媽咪姐唔提你，記得上《忽周》網 http://www.sw.hk睇埋條片，感受現場氣氛！仲有仲有，要上埋 facebook，搜尋「忽然一周」專頁，做個 friend，再俾個 like支持嚇蘇基呀。
