真面目
橋唔怕舊 TVB抄志雲橋當新料
2012年10月03日自從「殼王」陳國強愛將餘詠珊空降 TVB，成為非戲劇製作總監後，經常被網友恥笑抄得就抄的無綫，短短半年即連推三大騷，包括《翡翠歌星紅白鬥》、《玩轉三周 1/2》及港姐普選，可惜錯漏百出，鑊鑊爆。
新搞作鋪鋪輸，惟有食老本。將於下週一（ 8日）播出、由做開娛樂新聞「撲咪妹」的黎芷珊，擔正主持訪談節目《最佳男主角》，邀請到梁朝偉、劉德華等巨星做嘉賓，由於卡士超強，無綫專登安排每星期播足 5集，為台慶造勢。不過據知該節目原來由已離職的陳志雲原創，並非餘詠珊所度。邊個先係橋王，好明顯啦！
今年 2月離職無綫、轉去商台做 CEO的陳志雲，最擅長搞噱頭造 noise，由當年《向世界出發》、《志雲飯局》，到後期的《盛女愛作戰》，都係出自陳總手筆。
志雲推薦
橋唔怕舊，原本陳總離開 TVB前，曾計劃另一個類似《志雲飯局》的訪談節目，但唔再由自己做主持，反而派李浩林同黎芷珊分頭出擊。「 Stephen覺得 Derek同芷珊喺訪問呢方面都好有經驗，於是叫佢兩個各自搵 啲相熟 嘅星做專訪， Derek負責女星、芷珊就搵男星，但最後得芷珊約到，預備開拍嗰陣，志雲就冇撈喇！」知情人士透露。
節目拍唔成冇問題，弊在無綫突然將已同無綫脫離關係的陳總舊橋重新上市，變成即將出街的《最佳男主角》。
唔怕比較
心血結晶被指抄橋，黎芷珊週一接受電話訪問時，強調節目由自己原創。「我本身想做 talk騷好耐，加上喺呢行做 咗咁多年，同唔少 artist熟，唔想 嘥 咗 啲人脈關係，咪膽粗粗向樂小姐提議囉！（節目係陳志雲構思？）其實個節目係上年 10月 plan，當時陳生都知道呢個計劃，仲好支持添！（ 啲訪問係以前做落？）因為劉德華個訪問喺 4月已經做 咗，其他嗰 啲就係呢幾個月做，冇辦法，個個都好難度期，基本上佢哋一話得閒，我就仆出去做！（怕唔怕觀眾將你同陳總比較？）唔怕，完全兩回事，個個主持都有自己風格，冇得比較！」
變臉大師
由殼王親自欽點入 TVB頂替何麗全的餘詠珊，早年已同陳志雲拍住上， 08年講窮人生活的記錄片《一百萬人的故事》在台慶獲獎，餘更在台上公開多謝陳總。但據知自從陳總因被廉署調查而停職後，餘便唔再埋陳總堆，「嗰陣《盛女愛作戰》好 hit，餘詠珊落曬 order叫人唔好再提條橋係陳志雲度出 嚟，擺明唔想人覺得陳生叻過佢！」
同行隔岸觀火
陳貝兒
我當年都做過一個叫《傑出電影人系列》 嘅節目，但都好想睇芷珊個節目，話曬佢咁有資歷，又係我前輩，同埋覺得佢好犀利，可以約到咁多巨星做訪問！
區永權
我以前喺有線都做過類似 嘅訪問節目，但就冇芷珊呢個咁 specific講電影男主角，我覺得有 啲 artist未必鍾意講番以前 嘅事，反而我 嚟緊有個親子節目，搵 咗君如、李嘉欣同 Eason等等做嘉賓，佢哋講湊仔經會冇咁大壓力！
All-Star陣容率先睇
逢星期一至五晚上十點半播出的《最佳男主角》，請到香港多位一線電影巨星做嘉賓，連甚少做訪問嘅梁朝偉都請到，全部由芷珊親自「碌咭」，卡士強過當年《志雲飯局》！
