真面目
反霸權 群聯手杯葛 查小欣：有人喺度玩分化
2012年10月17日在傳媒圈子撈足近 30年的查小欣，近排真係老貓燒鬚，繼 8月被陳志雲踢出商台後，即高調踩入無綫做節目，由她領軍主持《爆足一週》，首集（ 7日）出街後劣評如潮，被觀眾圍插冇料兼炒冷飯，連續兩週得 17點（約 110萬觀眾）收視及收到 14宗投訴，更有網民要求腰斬節目。
街坊唔畀面，同事亦落佢面，群起杯葛霸道唔講道理的查小欣，面對內憂外患，歷盡風雨的小欣姐仍死撐話：「冇事！大家啱啱合作，未協調到啫！」
身為資深傳媒人的查小欣，在商台開咪主持《查篤撐》足有 15年，卻因陳志雲入主商台後嫌佢 out而被無情叮走。以為轉戰無綫主持《爆足一週》有運行，點知節目一出街劣評不絕，被譏笑「爆料」變「讀報」，吹水舊料悶到爆。
專插嘴搶嘢講
對住支咪多過對住部 cam嘅小欣姐，可能唔多習慣面對幕前，有該節目的工作人員爆料指她獨行獨斷難相處，開會度題目話曬事。
爆料人說：「第一集錄影後，其實已經有好多台前幕後唔 like佢，開會設計節目佢咩都要話曬事，又鍾意搵啲 7、 80年代嘅星做題目，貼近番佢年代。節目錄影時，又唔畀位其他主持發表，人哋未講完佢就插嘴。原先班拍檔已經唔太高興，點知上個禮拜佢自己搵咗嘉賓（蘇永康）做訪問，星期三開會又唔講！最令佢哋不滿係小欣姐自己報嘅料唔理大細就一定出，其他人搵番嚟嘅料就話要睇嚇先，所以班拍檔咪勁不滿佢，仲群起玩杯葛添，開完會一齊去 canteen食飯唔預佢。」
盧覓雪：畀時間改啦！
查小欣的《爆足一週》逢星期日晚十時播出，形式及取材都與亞視的《娛樂 CIA》勁似，由盧覓雪主持的《娛樂 CIA》於週一至五晚播出，談論即日的娛樂新聞，即日鮮點都好過隔了幾日的娛樂舊聞，所以亦有網友話《娛》好睇過《爆》。
莊思敏：又唔係熟
上週五（ 12日）《爆足一週》錄影前，本刊記者發現《爆》一眾後生主持圍枱食飯，獨欠查小欣和莊思敏二人，其後在化妝間見到莊思敏，佢解釋趁晚飯時去中環出席活動，之後飯都未食趕入廠錄影。
問到查小欣被杯葛，敢言的她話，「佢係我哋前輩，喺佢身上學到好多嘢。（有傳你哋成班一齊杯葛佢？）冇喎，哈哈……開會實見面，但私底下確實冇食飯，大家又唔係熟……係要時間磨合，加上個節目真係唔知個方向係點！」
而同日問及查小欣被杯葛一事，佢居然擘大眼講大話：「冇事！冇事！唔係吖，大家都喺曬度，我啱啱先一齊食飯，佢哋仲買嘢畀我食添！實有人喺度玩分化，起碼有人講都係好事，大家啱啱合作，未協調到啫！我唔介意！」小欣姐今次自亂陣腳，有食飯又使乜再買外賣呀？事實係擺明冇人買外賣都話有，資深傳媒人都要老作喎！
擺蘇康上枱
《爆足一週》第一週已被全城插足一週，瀨嘢過後，第二集即時改進，查小欣即動用人情牌請嘉賓上節目。
幫 CTI宣傳
笑有頸紋
節目中即場致電 DR代言人胡渭康，期間談及美容問題，主持談及莊思敏曾整容一事，阿感帶頭嘲笑小欣姐，「你好似好有興趣喎！」小欣姐聽後即時黑面。
