探熱針
天後 BB： 22磅小龍包 唔似 Kelly
2012年10月18日自從生咗兩個寶貝仔後， Kelly陳慧琳大幅減產，爭取親子時間。
日前， Kelly帶同細仔小龍包到尖沙咀連卡佛 shopping，半歲大的小龍包已重超過廿磅，面珠肥嘟嘟，手仔腳仔粗如節瓜仔，眼睛和哥哥蝦餃仔餅印一樣，個樣似足爹哋。
濃縮行程
長期匿埋屋企湊仔，偷空出街的 Kelly shopping都要帶埋得半歲大的小龍包一齊，日前，兩母子現身尖沙咀連卡佛，一直被形容為非常重磅的小龍包，真係脹蔔蔔。
「 Alex同 Kelly生得高大，所以蝦餃仔同小龍包都比同年齡小朋友高啲，細仔得半歲，但已經有成廿二磅重，手仔腳仔又脹蔔蔔。蝦餃仔細個都係咁樣，兩兄弟好似餅印。」 Kelly身邊人說。
Kelly抱住肥嘟嘟小龍包一入到連卡佛，已經有兩個 sales上前招呼，大家見到得意小龍包忍唔住不斷撩他玩。巡場唔夠半小時， Kelly已經離開趕返屋企。
分秒必爭的 Kelly，早前到巴黎出席時裝活動，連飛夾做，行程濃縮到三日，只為趕返港一家人過中秋。
「去巴黎咁遠，一程飛機要成十幾粒鐘， Kelly都寧願自己辛苦啲，做完嘢即走上機返香港，佢話好掛住兩個仔，唔見兩日好唔習慣。」
明年接戲
小龍包雖然得六個月大，但超級乖，甚少扭計亦唔常喊，又唔怕陌生人，還愛講 BB話哦哦好得意。細仔易湊，蝦餃仔又已經三歲返 K2，兩個仔唔算太困身， Kelly亦考慮再接拍電影。
「近排 Kelly已經開始錄廣東碟，出年仲會拍番戲，佢會預番多啲時間放喺電影；之前有部韓國片搵佢，不過因為要留喺韓國幾個月，中途又無得返香港，所以 Kelly推咗！」
湊仔親力親為， Kelly同老公 Alex分工合作， Alex每日湊完蝦餃仔返學，才返荃灣寫字樓。
上週一（八日）， Alex如常親自駕車送蝦餃仔到紅磡 St. Catherine幼稚園返學，高大的 Alex拖住蝦餃仔行，兩父子加埋小龍包，全部影印一樣。
得天獨厚
已是兩子之母的陳慧琳，先後在 09及 12年誕下蝦餃仔和小龍包，產後極速修身，得天獨厚。
蝦餃仔 3歲
08年結婚的 Kelly火速宣布造人成功，佗仔期間， Kelly出入小心，甚少被傳媒拍到大肚相，貪靚的她常穿上高踭鞋出席公開場合，體態輕盈，全無孕味，誕下蝦餃仔後， Kelly出院見傳媒時更穿上短褲，苗條到被網民質疑假懷孕。
小龍包半歲
去年飽受流產之痛的 Kelly，休養半年即再度成功懷有小龍包，佗仔時只重了十多磅，加上 keep住做孕婦瑜伽，誕下小龍包後， Kelly只重了三磅，話咁易回復舊觀。
