探熱針
無綫搞山寨春晚 葉玉卿捱義氣幫拖
2013年01月17日農曆年，電視收視慣性偏低，但「創意無限」的無綫非戲劇製作總監餘詠珊，卻一於少理，學習強國大台，於年廿九（二月九日）搞春節晚會《新春黃金慶典》，並且玩埋港、台、韓三地聯播。
自知資源牙力有限，未必請得鬱一班早已被國內春晚活動落釘 mark實的阿哥阿姐，餘詠珊於是氹掂月底返港做賀歲電影宣傳的葉玉卿，捱義氣預錄，為她一手策劃的山寨版春晚打定底！
高層撐華姐讓路
以往慣例，無綫一年一度的《國際中華小姐競選》例必在農曆新年前搞掂，但今年則延期至二月二十四日舉行，雖然外傳是搵唔夠贊助商有關，但其實另有原因。
原來餘詠珊執意要在年廿九（二月九日）舉行一個香港、台灣、韓國三地聯播的春節晚會，要《華姐》讓路，空出人手及資源。
「農曆年香港人鍾意出埠避年， rating（收視）一向都唔好， Sandy（餘詠珊）氹掂公司推遲做《華姐》，又爭取到一大嚿錢做預算，部分環節仲要飛外地做，好落本。」一名無綫幕後人員透露。
卿卿俾面志偉
港姐公投成為笑柄，在無綫受到「特別保護」的餘詠珊，地位絲毫不受影響，繼續搞作多多。雖然未全面落實春晚節目的內容，但她已預先氹掂今個月底返港、為賀歲電影做宣傳的葉玉卿，為春晚錄定一 part節目。
「咪又係志偉出面搞掂，佢一句幫幫手，卿卿就一口應承，連價都冇講，剩係收封利是仔！」
即使官非纏身，但據知有份孭重飛的曾志偉，未有叫停飛往外地做春晚錄影的計劃，至於飛韓國定台灣，稍後才有最後決定。
「志偉星期一（一月十四日）已經去咗警署做續保手續，下次再報到都係農曆年之後嘅事，呢段時間佢會專心搞春晚同賀歲片宣傳。」知情者說。
經理人部唔配合
高層拍板搞春晚，變相截斷了公司一班阿哥阿姐藝員大時大節搵快錢財路。據了解，由於樂易玲揸旗的經理人部門企硬不肯全面配合，令春晚節目有大部分內容至今仍未落實。「失驚無神話搞，啲客早半年前已經 mark曬啲期做街外騷，都唔知去邊度唧啲期出嚟？有啲未有 job嘅，一樣唔想做，大家都搏嚇喺外面或者大陸有人搵，唔想錯過農曆年搵錢機會！」一名經理人部門的職員說。
自己友同外援一樣難度期，已定名為《新春黃金慶典》的春晚決定放棄直播，改為錄影，由汪阿姐及鄭裕玲主持，葉玉卿外，暫時落實的演出只有阿叻同狄易達在西九長廊跳熱舞，陣容果然「鼎盛」！
屢試屢敗
餘詠珊加入無綫後，為鞏固勢力，不斷招攬舊公司同事，又積極獻計推出「破格」節目，可惜全軍覆沒，收視和口碑都差強人意。
《爆足一周》
接收被商台炒魷的查小欣，推出節目《爆足一周》，節目出街被網民鬧爆翻炒舊料，最終播了四集便腰斬收場，成為史上最短命節目。
《港姐》普選爛尾
港姐 40周年，餘詠珊搞一人一票普選，但選舉當日，因電腦系統負荷唔到，臨時改由評判選出三甲，爛尾收場，結果無綫共收到 477宗投訴，破曬紀錄。
《玩轉三周 1/2》
餘詠珊入無綫後的頭炮節目《玩轉三周 1/2》，動用全台藝員停廠拍攝，但反應奇差，更被網民批評照抄足美國趣劇《 MDDtv》和日本劇集《志村劇場》。
《走過烽火大地》
節目的預告片打鑼打鼓指攝製隊深入伊拉克、阿富汗及伊朗等地區拍攝，但節目播出後，被觀眾投訴貨不對辦，其中一集話去阿富汗，但大隊攞唔到簽證，最後只到了土耳其郊外的難民營，另外一集計劃去敍利亞，又因為太危險，返轉頭。
.[壹週刊]無綫搞山寨春晚 葉玉卿捱義氣幫拖
http://veryy8.blogspot.com/2013/01/blog-post_6740.html
