萬綺雯賣口乖 做嘢唔做人
萬綺雯、王菀之、郭晉安、王祖藍等前晚飯局睇劇集首播，萬綺雯回應有指她的丈夫因吸煙影響生育，她否認說：「我哋每年都有做身體檢查，身體好好。」早前才轉投無綫的萬綺雯也賣口乖指暫時無意生仔。
演員萬綺雯、王菀之、郭晉安、王祖藍、張繼聰、許亦妮等前晚到佐敦開餐收看主演的劇集《老表，你好嘢！》首播。
萬綺雯被指老公吸煙影響到兩人生BB，她說：「佢唔係一日食三包咁誇張，自己戒咗煙，但有時攰或者壓力大都會食支煙，我哋兩個每年都有做身體檢查，身體好好，生唔生BB係兩個人嘅事，加上啱啱先加入TVB就生BB會好奇怪囉，做嘢先啦，不過如果有『意外』嘅都冇所謂」。
《老表》是萬綺雯加入無綫後首套劇集，她指本來也不感到緊張，但不斷有人問她對收視的睇法，也開始感到緊張，她笑謂：「如果話有四十點一個話生仔（指郭晉安）、一個就話結婚（指王祖藍），我都想睇佢哋結婚生仔。」
另外，該劇在周一首播，通訊事務管理局共收到十宗投訴，指內容加大中港矛盾、內容嘩眾取寵及誤導觀眾。
拆獎座慰勞幕後
同場的王菀之憑歌曲《留白》奪得《2012年度十大勁歌金曲頒獎典禮》「金曲金獎」，有指宣布獎項時，容祖兒被拍得「O嘴」表情，王菀之則說：「我相信祖兒唔係嚇親，應該係驚喜，我哋成晚傾咗好多偈，我相信佢係戥我開心。」講到外間質疑《留白》這首歌少人聽過，王菀之說：「我就聽到好多人都話聽過首歌，我係樂天嘅人，亦知道好難滿足所有人。」
王菀之計劃將獎座拆開，將獎座上的鑽石花瓣送給一班幕後負責作曲、填詞的功臣。而《留白》一曲原來早已被網民惡搞改成《留飯》，隨著歌曲在頒獎禮奪獎，《留飯》已有超過兩萬點擊率。
文：影視組
.萬綺雯賣口乖 做嘢唔做人
http://veryy8.blogspot.com/2013/01/blog-post_4383.html
