真面目
矮仔多計 帶挈肥妹鬼妹 王祖藍《老表》玩曬
2013年01月16日免費電視新牌未發，電視業已經大執位，王維基撬走台前幕後連綠葉都唔放過，搞到做慣電視龍頭嘅無 綫因為橋弱、演員重複被視迷圍插，係時候要變！
踏入 2013，終於等到無 綫第一變，新劇《老表，你好 嘢！》玩 hit爆中港矛盾素材、用前亞視長腿花旦萬綺雯做女主角、又有大量歌手、舞台劇新面孔，最重要係王祖藍親自度劇本組班底，帶挈演藝師妹鬼妹陳明恩和新紮串星肥妹小寶有份拍兼玩曬，搞到中佬郭晉安都要企埋一邊！
雖然劇集海報郭晉安、萬綺雯企正中間，不過週一(14日)首播的新劇《老表，你好 嘢！》，由度劇本到吹雞搵舞台劇猛人龍文康做編審、搵疑似失散老豆黃光亮出山，力薦舞台劇自己友張繼聰、王菀之、大茄肥妹小寶演出，一概由王祖藍包辦，擺到明祖藍至係靈魂人物。
曲線捧自己
周身刀嘅祖藍，原來 99年讀演藝係想做編劇，誰不知誤打誤撞，搞笑形象贏盡民心樂做幕前，雖然平時出碟拍戲又扮女人，祖藍就話自己一肚橋，想拍劇又想搞遊戲節目：「梁家樹（戲劇總監）叫我寫劇本時，我唔知有冇人不滿，但係我寫嘅途中好小心分配角色，自己戲分真係唔多，費事人 哋覺得我寫劇捧自己！」
講係咁講，其實祖藍在《老表》中嘅角色造型騎呢、廣東話半鹹淡、又係內地歌手出身，趁機露一手唱功，戲分唔使多，講出位已經撼贏飾演正路港男的郭晉安。
演藝同學會
唔只度劇本同做埋主演，祖藍連台前幕後都碌盡人情咭搵自己友。
《門徒》編劇兼演藝編劇講師龍文康任編審，演藝師兄張繼聰、王菀之及 Bob林盛斌處男處女演出電視劇，一概由祖藍物色及牽線，而劇中 3人唱歌組合「 Oh Baby」的 26歲肥妹小寶，近期頻頻在劇集中過鏡做串星，由於體型重達 220磅，演出又生鬼，已有網友留意，小寶可以拍劇，全靠祖藍親自由特約演員提拔佢簽約無 綫。
「我以前正職教鋼琴，閒時做特約演員， 4年半前第一次演出電影《矮仔多情》識祖藍，可能佢見我形象同性格特別啦，之後做演唱會、開劇都有搵我。𠵱家我同無線簽 咗兩年藝員合約，真係要多謝祖藍我至有機會走入電視台。」捧肥妹，祖藍亦捧埋演藝師妹鬼妹陳明恩（ Corinna），廣東話超流利的她一頭金髮好易認，連拍多套劇集， 13年注目新人，非肥妹鬼妹莫屬。
王家班
雖然係第一次做編劇，不過祖藍出道 10年，無論歌、影、視同舞台劇界人面都夠曬廣，有機會拍出心血劇集，祖藍碌爆人情咭搵班底，結果《老表》台前幕後都係自己人，戲中演他表哥的郭晉安，慘變陪襯囉！
假分裂明和諧
祖藍處男落場編劇，一改無 綫劇婆媽老土千篇一律風格，夠膽用新人亦夠膽玩近年最熱嘅中港差異做題材，不過新劇未上場已經引來話題，又有傳被內地電視台河蟹，祖藍就話由中港差異想帶出和諧共融目的至真！
.[FACE]矮仔多計 帶挈肥妹鬼妹 王祖藍《老表》玩曬
http://veryy8.blogspot.com/2013/01/face-face_16.html
