田啟文數周星馳四宗罪 臭檔 孤寒 自我 乖僻　

呻收200蚊T恤　倒嘔13張戲飛

田雞數星爺：佢冇朋友

有人話發財要立品，但周星馳近年越發達就越被友人甚至同行批評。與星爺合作長達13年，直至09年底才離開星爺身邊的田啟文（田雞），過去一直護主，但他近日接受商台訪問竟加把口批評星爺，除直指星爺冇朋友外，還力數過去多年來只收過星爺送贈一件200元平tee，最終卻要倒貼買13張戲飛請星爺與朋友睇戲，數口之精，圈中少見。

現年50歲的周星馳在圈中打滾逾30年，近年屢被合作過的拍檔或同行數臭。96年開始為星爺打工的田啟文，09年底結束彼此賓主關係，田雞近年轉當鄭中基經理人。過去一直力撐星爺的田雞，日前接受梁慧恩客席主持的商台節目《1圈圈》錄音訪問時，勁寸星爺冇朋友，該節目將於今、明播出。

■田雞（左）與星爺合作長達13年，對星爺為人瞭如指掌，他直指星爺孤獨沒有朋友。資料圖片

94年田雞演完星爺的電影《九品芝麻官》後，兩人難得啱key，96年遂加盟星爺創立的星輝。星爺性格孤僻，過去多年田雞都未有變節加入「倒周」行列，還不時幫口護駕，當外間常指星爺孤寒，田雞曾為他解畫：「對於錢財，我認為他很清醒，他會放在大的東西裏頭，抓得比較緊。」話雖如此，其實田雞去年在微博開始反星行動，全個微博僅於去年6月貼過一張兩人合照，還留言：「懷念周某人。」之後提到星爺時，總以「周某人」來稱呼他，甚為見外。而田雞日前在商台訪問大爆與星爺相處點滴，見微知著，似要為星爺執導、舒淇和羅志祥孭飛下月7日上映的賀歲片《西遊．降魔篇》贈興。

星爺被出賣留陰影

田雞在訪問中提到早年跟星爺合作電影《武狀元蘇乞兒》，當年劇組沒人敢發通告給星爺，田雞說：「93年我聽好多人講佢好麻煩、好難湊好易變。我幫佢做幕後，大家好怕畀通告佢，驚佢遲又要嗌佢起身，又唔敢話周生你遲到。本來周生有個妹做幕後，佢叫阿哥起身，咁一定唔會鬧啦，佢冇做之後就我叫。」田雞叫醒星爺有妙法，他說：「我會問佢『你今日想食乜呀？』我會問佢幾點到，要預定時間買嘢一齊食，啲嘢凍曬唔好食。有時有啲叫下床火，大家都係打工啫，可能佢哋好直接打畀周生，始終會話『等你呀！』聽嗰個人會認為等嚇唔得呀，可能佢睇緊劇本。個個都怕打，總有原因。」田雞強調在星輝工作13年，二人從未吵大鑊，只有過小誤會，事緣有人指田雞做錯事，星爺獲悉即向田雞求證。

■商台客席主持梁慧恩在節目訪問田雞，讓他暢所欲言寸星爺。

■田雞指當年拍《少林足球》時骨膜受傷，但星爺要他翌日馬上重拍致受傷戲份。劇照

■田雞09年底與星爺結束賓主關係，他去年在微博稱呼星爺為「周某人」，言語間顯示不滿。

星爺給人自我封閉之感，田雞也覺他孤獨沒朋友：「佢冇朋友唔代表佢差，佢活得開心就得啦，我又唔識飲酒打枱波，陪唔到佢。」田雞爆料指星爺過份保護自己全因曾被朋友和同學欺騙留下陰影，他說：「我唔係幫佢講說話，10個人講佢，佢有權反擊，但佢冇，由你哋話佢。」田雞也直指星爺最大的問題是不善與人溝通，一切只是獨自思考。

主持又列舉網民所指洪金寶、梁朝偉和向華強夫婦等星爺十大敵人，田雞說：「以上呢啲人都有咁上下身份，大家平起平坐，我冇諗過同佢同level，佢對我冇咁樣。有啲人話我係擦鞋仔，我??家都冇幫佢，應該可以有乜都大大力數出嚟，咁係冇就冇。」不過田雞接著爆出一件舊事，他說：「佢（周星馳）買衫叫我揀件，我好開心，自己揀件200幾蚊嘅。之後我話請番佢睇戲，佢話好，仲話有啲朋友想睇，叫我買13張飛。你諗嚇我冇著數?，你唔買件衫畀我，我唔使幫你買13張飛，嗰度幾嚿水，我仲要蝕畀佢呀。」這件事足證星爺數口精。

傷骨膜翌日照開工

田雞當年負傷拍電影《少林足球》，可覺星爺不近人情？他說：「我嗰日特登唔同佢食飯去睇醫生，點知冤家路窄撞到佢，佢問我去邊。我話佢知睇醫生，佢問我點，我話骨膜傷咗醫生叫我休息。佢聽完話『咁呀休息嚇啦，咁呀，聽日呢第一個鏡頭拍番打你嗰場。』」田雞坦言那刻覺得星爺確實有點不近人情，他晚上做水療令肌肉鬆弛點，翌日再拍。

此外，黎芷珊去年節目《最佳男主角》沒訪問星爺，她昨在電視城指日前宣傳撞見星爺，大家有打招呼：「佢仲話約食飯，同佢傾偈，仲覺得佢好低……係抵死，仲講番以前去Hot Gossip夜蒲。」對於王晶指星爺變高傲，芷珊卻撐：「冇喎！可能越細識越冇嘢！」

採訪：林妃

王晶：星爺啲錢炒番嚟

■王晶繼續寸星爺鍾意錢，大部份都是「炒番嚟」。

王晶和周星馳曾合作無間，但兩人交情不再，前晚王晶到旺角宣傳其監製的電影《古惑仔：江湖新秩序》，提到早前他批評星爺愛錢多過電影，星爺回應與他不熟，又謂電影拍得好才有錢，王晶說：「咁真係唔係好熟喎，佢咁多錢，梗係因為鍾意錢所以搵到咁多錢。」是否介意星爺與他割席？他寸說：「十年都冇搵，佢啲錢唔係拍電影搵番嚟，大部份係炒番嚟。」

問王晶會否捧星爺的《西遊．降魔篇》及王家衛的《一代宗師》場，他直言好戲都會欣賞，但不會請他們欣賞《古》片，他說：「如果佢哋要睇就會買飛。」

採訪：楊潔雯　攝影：黃偉雄

牙齒印多：拍檔舊愛全反面

《少林足球》劇照

一向撐星爺的田雞，近日都忍不住開咪數對方，其實過往與星爺合作過的老拍檔，大部份都與他不歡而散。

李修賢

一手發掘星爺入影壇的李修賢，公開批評星爺不念舊，又寄語說：「做人要忠厚啲，錢唔係萬能，朋友可貴。」

吳孟達

星爺的最佳拍檔，但星爺拍《功夫》時，達哥因沒有檔期而推掉，令兩人產生磨擦。

李力持

曾與星爺合拍《食神》、《唐伯虎點秋香》和《喜劇之王》等經典，但《少林足球》後便沒合作，有傳因拍攝手法鬧不和所致。

於文鳳

星爺舊愛，去年入稟追討星爺7,000萬元投資傭金及顧問費。

資料來源：《蘋果》資料室

.田啟文數周星馳四宗罪 臭檔 孤寒 自我 乖僻　
http://veryy8.blogspot.com/2013/01/blog-post_9967.html