媽咪姐
霆鋒自爆生瘤 栢芝寸爆：「你啲咁嘅衰人，無咁易死嘅！」
2012年10月26日
早幾日睇《最佳男主角》謝霆鋒嗰幾集，媽咪姐都睇到眼濕濕，原來霆鋒除咗係一個有人情味嘅老闆之外，仲係一個好爸爸。佢話雖然同栢芝離咗婚，但為咗兩個仔，都會安排「齊人家庭樂」，的確用心良苦。點知，周二（ 23日）播出訪問最後一集仲激！佢同主持黎芷珊講咗個「小秘密」，話 3年前拍《十月圍城》嗰時，經理人霍汶希（ Mani）發現佢頭上有黑痣，但佢無理。直至最近拍戲要扮消防員，須要剷青， Mani見粒痣變大咗好多，提佢去睇醫生，先發現係黑色素瘤，皮膚癌呀！但霆鋒話即時割咗，應該無事嘞。
嘩嘩嘩！咁大件事！周三（ 24日）媽咪姐知霆鋒喺北京做完嘢返香港，梗係即時去機場搵佢問真啲啦。呢位兩子之父好淡定呀，笑住話：「其實我都唔知講完會咁大件事！總之依家無事，報告出咗，個瘤唔係惡性嘅，大家唔使擔心。」
不過你喺節目講到拉姑陪入院割瘤，又縫咗 5針，咁前妻栢芝知唔知呢？「有講俾佢知，佢仲話：『你啲咁嘅衰人，無咁易死嘅！』」咦，栢芝呢句真係可圈可點喎！不過媽咪姐覺得佢咁愛霆鋒，仔都幫佢生兩個，咁講應該係另類安慰，我哋啲外人唔明㗎嘞。
講時講，栢芝除咗係另類前妻，仲係非一般阿媽，早前媽咪姐喺機場見到佢帶住細仔 Quintus遊完埠，啱啱返到港。一身紅色上衣襯彩色長裙，咁搶眼，好難認佢唔到！見 Quintus好似樹熊咁攬住阿媽，就知兩母子感情好好，不過人仔細細就成日飛，好似有啲辛苦囉。媽咪姐仲八到栢芝周不時會帶兩個仔到曼穀嘅佛寺為佛牌加持，唔知今次佢哋係咪又去完泰國呢?
