句句金
句句金
2012年10月26日
陳玉蓮為新劇《名媛望族》做訪問宣傳時話：
冇人知道第日發生乜事，講嘢唔好咁肯定，所以我唔會話退休。
呢啲咪係傳聞中過六合彩頭獎嘅小龍女式智慧囉。
肉身出塵，思想入世！
楊千嬅產後復工，接受電台訪問時話：
生完個仔，我已經開始諗，將來佢娶個乜嘢老婆？婆媳都唔知點算。
嘩，囝囝 Torres先 4個幾月大咋，千嬅你會唔會諗多咗呀？小心太緊張會變「怪獸媽咪」喎。
盧海鵬被問到會唔會重返無綫拍劇，佢勞氣炮轟舊東家：
成日等咪最衰囉！有時等到尾都係摸和（冇工開），啲細胞日日死啲，咁就死㗎喇。我唔會等㗎！
老人家確係唔捱得！好彩鵬哥你多路數，有得揀啫。
記者問楊紫瓊左手戴婚戒，係咪好事近？佢笑住話：
未結婚！我好 enjoy佢成日求婚，一個禮拜有一日會做呢樣嘢。
咁又係呀！嫁咗之後，男人對你就係第二個樣。各位「被困」嘅姊妹，你哋都明㗎啦！
馬德鐘個仔已經 14歲，被問到阿仔有無追求者，馬神就咁答：
我有打聽嚇，佢話未有女友，呢方面都係我負責多啲，大家都係男仔。
你負責？嗯，只要唔係教佢花心逢女攬累老婆要出嚟死撐，咁都 OK嘅！
