綠葉王：陳榮峻爆黃日華賣身相救

在網上搜尋陳榮峻這個名字，多指他擅長演陰險小人一類的角色，但現實中的他卻正好相反，像其好友黃日華一樣直腸直肚，無所不談。陳榮峻於無綫打滾了28年，他直指無綫近年的人情味少了，凡事也制度化，令人才流失。談到黃日華簽了城市電訊（CTI），陳榮峻替對方澄清，指華哥是為了他才會簽CTI，而非外間盛傳的替女兒入行鋪路。　撰文：文國駿

陳榮峻在無綫的28年間演過的綠葉角色多不勝數，雖多年來也未曾嘗過一線小生的滋味，但他坦言並不後悔。後生時陳榮峻外表頗俊朗，早年演古裝靚仔角色，後來經常在古裝劇演奸險小人被定型，年長後多演怕事的男人或衝動老粗。當年為何入行演戲？他表示全為興趣：「嗰陣我入行前係做冷氣技工，月薪有二千幾，仲要出16個月糧，算好穩定㗎，不過自己又鍾意做戲，又未有小朋友負擔咪去試嚇囉，結果做到家。」

於電視圈打滾28年，陳榮峻看透人情冷暖。　攝影：黃文偉

陳榮峻早年於《楚留香之蝙蝠傳奇》中飾演胡鐵花，形象正氣！

陳榮峻與不少小花合作過，陳法拉亦是其中之一。　《師奶兵團》劇照

《怒火街頭》中根叔一角，令陳榮峻人氣急升，獲網友激讚。　劇照

陳榮峻坦言黃日華是他人生中最重要的一個朋友。　資料圖片

斥無綫沒人情味

於佳藝電視出身的陳榮峻84年參加無綫電視藝員訓練班，問他這28年間無綫有何轉變？陳榮峻坦言以前的無綫較有人情味，他說：「以前公司真係好有人情味㗎，不論台前幕後都好打成一片，啲前輩又肯教人。嗰時同三哥苗僑偉或者惠天賜等等合作，佢哋都唔會話驚我搶佢哋鏡或者阻住佢哋，好肯畀意見！」

訪問期間陳榮峻常強調以前有多好，直接問他是否現在的無綫不好？他近乎控訴的說：「以前有人情味啲，家就好制度化。以前邊有還show呢啲制度？我可能喺公司嘅，但係公司冇嘢畀我做，就會話我唔夠show。」

陳榮峻續表示自己是一個據理力爭的人，現在到外地公幹，公司每天有10美元津貼也是自己爭取的，他謂：「以前出埠冇㗎，係我爭取嘅，有乜理由同公司出去做嘢要自己畀錢。所以咪話以前公司有人情味，會傾，換轉家我都唔會提出啦！」

講到圈中好友，陳榮峻直言黃日華不論在公在私也幫他很多，他表示：「華哥係一個我好尊重嘅人，佢成日買嘢畀我啲仔女，我都想幫佢澄清一下，佢簽CTI其實唔係外間咁講為咗幫個女入行鋪路，而係為咗我。」陳榮峻表示自己是第一批被CTI挖角的人，當時對方打給他傾條件時他正在內地跟明星足球隊踢波，礙於有大班藝人在場，自己當時只好支吾以對，但黃日華卻看出他表情有異，更奪過電話跟對方傾條件：「咁CTI嗰邊梗係順勢搵埋華哥過去，點知華哥竟然話：『得，你傾掂陳榮峻先啦！』」

陳榮峻透露黃日華數天後更直踩上CTI找王維基傾條件：「佢上到去同王生講話只要陳榮峻滿意過檔條件，佢就會同CTI簽兩部約，我真係好感激佢。」

老婆離世瀕崩潰

雖然條件合適，但陳榮峻太太2010年尾突然離世，令一切出現變數，憶起太太離世時的情景，他不禁雙眼通紅的說：「老婆離開得好突然，我當時真係六神無主，仲有諗過自殺，當時陳錦鴻同陳國邦都成日搵我開解我，我亦都好多謝珍姐（曾勵珍）嗰日一早打畀我慰問我，又幫我將工作抽後，等我可以處理老婆身後事。」

這些無綫僅餘的人情味，令陳榮峻決定跟無綫再續約：「我嗰時有諗過退休，因為仔女啲學費我都交曬，一身輕，不過大仔畀咗啲意見，所以我就續多次約。」陳榮峻又大讚黃日華是真漢子信守承諾：「我最後冇過CTI，不過華哥都守承諾幫CTI簽咗兩部劇，我仲有年半就會完無綫合約，到時華哥叫我留就留，走就走！」

於《造王者》中飾太監程高，對陳榮峻來說沒甚難度。　劇照

陳榮峻現年57歲，原名陳榮基的他入行初期加入佳藝電視，其後於84年參加無綫電視藝員訓練班，畢業後加入無綫至今。陳榮峻於無綫的28年歲月中大多飾演配角，以奸角為主，當中較為人熟悉的角色有《楚留香之蝙蝠傳奇》的胡鐵花、《天龍八部》的全冠清、《O記實錄》的吳國兆及《怒火街頭》中的根叔等。