主頁>娛樂圈 >娛樂追擊>江希文 閃嫁胡漢清
近日娛圈喜事重重，年紀大啲嘅藝人都紛紛搞結婚。除咗錢嘉樂同湯盈盈，五十歲嘅杜德偉都趁熱鬧，年尾拉埋天窗。原來仲有四十三歲嘅江希文，佢都宣布同拍拖半年嘅資深大律師胡漢清結婚，更加諗住遲啲大搞訂婚派對添，佢家姐江欣燕知道都好戥個妹高興。
江希文仲喺微博發表心情：「感激上天賜予我這段姻緣，令我相信只要我們有愛、有正念，那個屬於你的人真的會『自動』出現！一切勉強得來的都不是真命天子！」
身為資深大律師嘅胡漢清，喺娛樂圈知名度唔算高，但原來佢同啱啱四度離婚嘅張天愛喺九二年離過婚。九九年，胡漢清再同名模餘慧敏（Rachel）結婚，育有一子一女，○八年兩人傳出婚變。今次照計應該係胡大狀第三次結婚，估唔到張天愛多次結婚，連佢前夫都好結得嚇噃。
近日喺廣州定居嘅江希文，同男友胡大狀拍拖半年就閃電結婚，佢讚男方好細心喎。
身為資深大律師嘅胡漢清，其實名字喺政壇響噹噹，佢係全國政協委員，早前代表陳振聰出席打官司，更加經常見報。
