苟芸慧為錢途反封胸
之前大鑼大鼓宣佈封胸的苟芸慧，工作湧至，昨日即時改口表示無限期性感，又推莊謂穿甚麼衣服是公司決定。謝婷婷由羅馬回港後，昨日又去了澳門主持新店開幕。婷婷表示陪男友安志傑操體能，日日吃高蛋白質雞胸肉、又頻撲開工，勁瘦8磅，可惜男友藐爆她變瘦，更懷念婷婷以往的甜蜜call機肉及肚腩仔，非常冤氣。
謝婷婷、苟芸慧和A&F男模趙勁皓（King）等昨日在澳門出席腕錶店開幕，之前表示倒數封胸的苟芸慧，今個月不停繼續性感，昨日更勁穀事業線，對於之前自爆只餘四次性感quota，苟芸慧即扮儍說：「都唔記得仲有幾多次，唔會特別計住囉。」
■苟芸慧改口不再封胸，性感無限期。
跳舞生硬認衰
苟芸慧又轉口風說：「著乜嘢衫呢啲留畀公司、PR佢哋決定，都係想健康啲感覺，但有時都需要隆重。」問到她前晚台慶跳舞部份，被指舞步生硬更幾乎跣低，她說：「係自己唔啱，冇時間練習，地板又有少少濕，都要行得好小心。」
■苟芸慧和韓國男模宋鬥煥騷手錶卻似比拼拗手瓜。
■舞獅跳到頂上天花板，婷婷（右）、苟姑娘（中）都為之吃驚。
謝婷婷剛自羅馬返港，見她纖瘦不少，她直認陪男友安志傑喼弗，瘦了8磅：「佢見完張家輝個bodybuilder身形，話要勁喼弗，家喺屋企餐餐食雞胸肉，我陪佢一齊食。」婷婷指安志傑稍後和哥哥謝霆鋒一齊拍消防員為主題的電影，近期上堂學消防裝備及知識，更努力催穀體能：「佢買咗個面罩，係模擬自己喺9千呎高空下做運動，不停做push up、sit up強化，好似怪獸咁，聽到佢好大聲唞氣，好似喺水入面唞氣咁大聲，真係有啲心痛。
婷婷呻冇人餵
婷婷指和男友一齊瘦，但男友藐爆不喜歡，婷婷自爆煙韌事：「拍拖初期，我成日坐佢大髀，佢就搣我肚腩仔、call機肉，家冇得搣，佢唔鍾意呀。」她笑說：「咁冇法子啦，佢冇嘢餵我食。」
採訪：盧妹
攝影：陳俊強
■謝婷婷激瘦八磅，卻被男友安志傑投訴。
上一則:黃秋生擦意菜送煙
下一則:阿佘促發免費電視牌
