鮑姐亞視人 撐王維基
【電視風雲】城電揸弗人王維基強烈要求政府盡快發免費電視台牌照，但無綫和亞視卻先後出招反對。身為亞視icon的鮑起靜倒戈簽約王維基拍劇，但昨日她卻回復亞視人身份綵排台慶，鮑姐坦言身為藝人當然越多工作越好，故支持發牌跟亞視唱反調。
■鮑姐既是亞視icon但又簽約王維基（小圖）拍劇，若以藝員身份，她倒戈支持發牌給城電。
鮑起靜、陳啟泰、朱慧珊、黎燕珊及馮寶寶等，昨日在深圳為亞視台慶節目《亞洲電視五十五周年星光大典》拜神，穿古裝的馮寶寶興奮地滿場飛，情緒十分高漲。早與城市電訊的免費電視台簽約拍劇的鮑起靜昨日都有現身，她表示已告知城電揸弗人王維基她出席昨日活動：「我同亞視冇正式嘅合約，但我永遠係亞視人，佢需要我而我又得閒就一定會去做。我嚟緊會幫亞視做《感動香港》同今次嘅台慶，都有通知王維基嗰邊，我同城電都係簽咗一部劇集啫。」鮑姐直言不會覺得身份尷尬。
擔心激嬲王征
對於亞視早前出招阻城電發牌，會否覺得阻她搵食？鮑姐說：「公司冇阻我搵食，對我好好仲畀我出去拍劇，只係唔需要用合約去束縛，用合約束縛藝員係唔應該存在。」可會贊成發牌給城電？鮑姐謂：「無綫同亞視都唔想有人搶佢飯碗，就藝員而言當然工作越多越好，作為藝人係贊成。」會否擔心發牌後令亞視被淘汰？鮑姐坦言已擔心多年，但相信亞視可維持下去，若真的發牌，她相信亞視會有相應措施及更大進步空間。
對於亞視節目《微播天下》中大罵王維基，似是公器私用，鮑姐謂：「我覺得係基於商業行徑，亞視都要表態維護自己，鬧又鬧唔死人，香港係自由社會，可以表達唔同嘅聲音，我唔相信王維基先生會俾佢鬧到，亞視都俾人鬧㗎。」鮑姐說罷反而擔心自己一番話會激嬲王征。
■馮寶寶昨日到深圳綵排亞視台慶，穿古裝的她表現興奮。
此外，陳啟泰當日亦有去政府總部示威，但他說：「我嗰次係去支持亞洲會活動，去到都覺奇怪，唔係嗰樣嘢，唔知目的，關於牌照事件我冇意見。」朱慧珊直言心情矛盾，若發牌不恰當，因無綫和亞視投資多，但以藝員身份則有更多工作機會，她又覺得應發牌，故政府要小心處理。劉錫賢表示：「政府要好好處理，唔好搞到好似佳視咁，三、四年就玩完。」
採訪、攝影：曾小嘉
■高層葉家寶率領朱慧珊、江華、潘志文及陳庭威切燒豬求順利。
上一則:官恩娜牧羊狗遭狂徒劏肚
下一則:陳茵媺視帝必選陳豪
