真面目
鴨仔團 鴨仔尿片騷 陳冠希老豆散玩亞生冠軍
2012年11月21日亞視早前喺政總外搞反發新電視牌照爛騷，搞到全民鬧爆，不過你有你鬧，亞視繼續「搞 gag」，貫徹騎呢路線。
週日（ 18日）《 ATV2012亞洲先生競選》終於舉行，先有賽前參賽者董鵬在微博鬧爆亞視對參賽者「雞狗不如」，賽事最終由國內參賽者朱曉輝獲冠，但呢位應屆亞生卻跟亞視同樣騎呢，除曾是陳冠希老豆的緋聞密友，仲影過露毛裸照。得 Edison老豆 𥄫中，唔知亞視揸弗人王征又對呢位出爐冠軍有冇興趣呢？
亞洲先生出名騎呢，參賽者更來自五湖四海。本刊發現今屆亞生冠軍得主， 28歲的朱曉輝原來連中佬都好冧佢！
讚陳生好人
來自江西的朱曉輝，曾勇奪多次國內健身先生獎項，亦是國內十大明星健身教練之一，年前加入凱渥模特兒內地分公司成為阮經天師弟， 10年 6月更與陳冠希老豆陳澤民在銅鑼灣 high tea，當時朱對陳父招呼周到，斟茶遞水做到足。
被指與陳父過從甚密，週日（ 18日）晚奪冠後的朱曉輝就扮生疏，以「陳先生」稱呼 Edison老豆，更將私人密會變成傾公事，明顯有備而來，預咗俾記者翻舊帳：「陳先生本來找我和阮經天拍《夏日樂悠悠》（但實情陳並冇份投資《夏》片），那時候阮經天剛好有事不能來，所以我就跟經紀人去了跟他見面。記者拍到的時候，經紀人剛走開，而且陳先生是我的長輩，替他倒茶（應是水）是我的禮貌。（陳先生對你好嗎？）他是長輩，我很尊重他，而且他人很好。（亞視老闆王征也好欣賞你呢！）對每一個欣賞我，喜歡我的人，我都謝謝他。」
裸照任 𥄫
被陳澤民睇中，朱曉輝除了身形夠 fit之外，大膽作風絕對係關鍵。本刊發現朱曉輝早年除影過不少內褲照外，甚至露毛全裸照都有影過，其「作品」早在同志網上廣泛流傳。
記者將他影過的裸照遞給他回應，朱曉輝卻自稱被人出賣：「那是 2004年時拍的，我還記得那天攝影師拍了很多，但說明了不會露第三點，雜誌只刊登了六張，是後來那個攝影師沒有專業操守把露點的照片放上網，照片才會曝光的。那時候我還蠻生氣的。」全裸任影，當記者問他是否為錢而任何尺度的裸照也可影時，他又改口風：「如果照片出來的意識是健康、正面，而且公司都覺得 ok的話，我是可以接受的。」當記者想再問他同性戀話題時，他即被亞視公關拉走！
爛騷 2點收視
今屆《亞生》賽前說好的 3D效果，結果開騷前一日先由高級副總裁葉家寶自爆技術未如理想，要等多幾日至可以網上睇番。所謂大騷，除咗見到班仔不停激凸曬雀，其餘亮點乏善足陳，不過都有兩點收視，要慶功啦！
冇廣告
《亞洲先生》全晚 2粒半鐘騷，竟然冇商業廣告，成晚見得最多都係條亞姐同亞視「感動香港宣傳片」！高級副總裁葉家寶週一回應記者：「呢方面唔係好清楚，係營業部負責嘅，但我哋都想觀眾會留意多啲我哋嘅節目，所以都會適量嘅播出自己嘅廣告。」
悶爆騎牛
除第二 part泳褲較有睇頭外，其餘環節都悶到放蚊，特別係騎機械牛環節，每次兩位亞生上牛騎兩分鐘，睇住班佬狂 fing半粒鐘，乜事先？
大話連篇
賽前一度想退選的 36歲亞生畢萬春，報稱職業係網絡公司客戶總監，但實情佢只係參選某遊戲代言人選舉而成為該公司的遊戲代言人。再睇埋佢微博，一時係畢萬春，一時係畢譯文，去年原來仲參加內地求偶節目《我們約會吧！》而與另一參賽者結埋婚。葉家寶話：「參賽者申報咗藝名，我哋都接受。」
夏蕙姨自 high
亞視都請到唔少靚女、名人名模如胡敏珊， Jessica C.等出席，不過佢哋反應唔算熱烈，係 黃夏蕙自 high。
