真面目
人情要來 Edison 10萬人情 劉華包五圍 李璨琛奉子成婚賺凸
2012年11月21日今個月娛樂圈喜事多籮籮，晶剛豪門夜宴、盈樂熊貓盛會同杜德偉 50歲娶嫩妻後，上週六（ 17日），又輪到 37歲李璨琛同拍拖三年嘅設計師女友 Pae（梁志瑩）拉埋天窗。
李璨琛出名瓣數多人面廣，到賀嘉賓粒粒巨星，坐爆 39圍酒店宴會廳，淨係計人不到禮到嘅前經理人劉華包起五圍酒席，同夾份做生意嘅陳冠希封 10萬人情，加埋老婆有喜 2個半月，奉子成婚嘅阿 Sam呢餐賺到笑，抵請！
李璨琛 97年憑劉德華投資嘅《香港製造》入行又做埋劉華旗下藝人，入行 15年，拍戲拍劇打碟出唱片又搞自家時裝品牌，上週六（ 17日）終於做老襯，假北角海逸君綽酒店迎娶有餡設計師女友 Pae，雙喜臨門的 Sam得圈中朋友出錢出力又盛裝到賀，夠曬有面。
佗 B十週
雖然一對新人當日接受訪問時表示計劃兩年後造人，又話買定機票酒店下月飛馬爾代夫度蜜月。不過據知情人士透露，去年求婚成功後， Sam同 Pae籌備婚禮經年，個多月前發現老婆意外有喜，至今已懷胎十週。
礙於傳統，未過三個月未能公開，兩位新人一直保守秘密，只得親友及伴娘伴郎團內極親密友人得知。始終設計師出身、貪靚阿 Pae堅持穿上兩吋半高 踭鞋行禮擺酒又唔願改婚紗，要老公阿 Sam及姊妹團朋友小心護駕，又要防實 喺傳媒面前露餡。
照包酒席
雖然入行兩年後已經離開劉華旗下 Tom Man經理人公司， Sam與劉華多年來仍然保持良好師徒關係，請飲當然不能少了前老闆份。
據悉，本來接到喜帖口頭應承會到賀，劉華因為身在台灣擔任金馬獎評審工作最終缺席，不過人不到禮金已託專人送到，又拍心口包起 Sam五圍酒席，約每圍 1萬計， 5萬蚊夠曬誠意。
至於名下服裝品牌有合作關係的陳冠希，更豪封 10萬大人情，更動員 CLOT員工加班打點連日婚宴瑣事，出錢又出力；而其他到賀的吳彥祖、馮德倫、陳奕迅個個巨星級，出手出名爽快，計落阿 Sam呢餐酒包賺，正好儲定埋奶粉錢。
婚禮三級制
11月好日多，個個辦喜事都迫埋一齊輪流搞，少不免比較。未計本週五（ 23日）拉埋嘅樂壇超級好人緣嘅郭偉亮（ Eric Kwok）同葉佩雯，頭三場喜宴，唔使講，梗係霍家剛晶最豪啦！
豪門級
剛晶婚禮由 7日迎親、 8日在霍家大宅註冊、 10日廣州南沙煙花宴客、 11日會展再擺 150圍，搞足四日三夜豪使約千五萬港幣，全港政商名人都畀面出席，一般明星仔冇得比。
巨星級
出道近 30年、娶老婆時雖然已經半百，杜德偉勝在資歷深，同班超級巨星由細玩大，同剛晶同晚（ 11日）擺酒， 喺深灣遊艇會搞 50年代主題派對，唔使講咁多，淨係梁朝偉做伴郎已經 1打 7夠照。
有賺級
至於琛 Pae婚禮，則與「盈樂」同級。 47歲錢嘉樂迎娶 37歲有餡湯盈盈，在海洋公園俾熊貓見證行禮、洲際擺酒，錢嘉樂同李璨琛一樣朋友多，成晚群星拱照又有贊助，擺酒有錢執。
