搜尋此網誌

2013年4月19日星期五

志偉緋聞纏身 張美妮速嫁髮型屋老闆




娛聞樂

志偉緋聞纏身 張美妮速嫁髮型屋老闆

張美妮上月在澳門一春茗中,被影到陪曾志偉敬酒,結果一夜間「升呢」做志偉嫂,曝光率暴升。

雖然張美妮堅稱視志偉為「阿爸」,外間對「父女戀」半信半疑,但據知與張美妮拍拖 5年的髮型師男友 KK,對女友今次緋聞卻頗着緊,早前火速向美妮求婚成功。

本刊收到消息,二人已定於今年 11月在五星酒店 Ritz-Carlton擺酒。上周三( 10日),記者發現待嫁新娘張美妮偕男友到九龍灣試婚紗,其間毫不吝嗇穀胸上陣,緋聞似乎無損二人感情。

志偉多年情

據知多年來曾志偉一直帶挈張美妮撈外快做司儀,視對方如女看待,可是二人早前一齊做春茗嘉賓卻傳出緋聞。

張美妮入行十四年,自言對事業冇野心。早前因在《瘋狂歷史補習社》扮性感妲己,及《心路 GPS》中演委屈家嫂入型入格而忽然人氣上升,更連緋聞亦同時開齋。

入股男友髮型屋

近日「獎門人」曾志偉馬不停蹄連環賀其 60大壽,身為緋聞女角的張美妮,卻不避嫌幾乎場場現身,令兩人上月初傳出的緋聞再被翻炒。雖然張美妮解釋只視對方做「阿爸」,但其拍拖 5年、表面若無其事的髮型師男友 KK,暗地裏卻已部署求婚計劃。

據其身邊人透露:「 KK份人實事求是,唔識搞咩花臣嘢,不過佢求婚都好浪漫,玫瑰鑽戒就梗有,仲要趁兩人去峇里旅行嗰時, book咗一間海景餐廳,睇住日落喺餐廳跪地,我哋都讚佢夠勇呀。其實佢哋啱啱拍拖, KK已經諗住娶硬美妮。當年 KK有六間 salon,佢主動叫美妮入股做老闆娘,話俾佢打骰。可能因為 KK大過美妮 9年,思想成熟啲,雙方一早見過曬家長,亦介紹曬俾身邊朋友識,認定咗對方。原本諗住再賺多兩年錢就會結婚,不過單緋聞就令 KK加快娶老婆。佢表面好冷靜,但男人對呢啲嘢始終都有少少擔心,所以都想盡快 mark實美妮。」

有米男友

09年張美妮與男友撻着,本刊已拍得男方駕駛市值百二萬的波子跑車接載女友,十分富貴。

冧爆男友

當日張美妮偕髮型師男友 KK到九龍灣試婚紗,其間兩人不時打情罵俏, KK更𠱁到女友四萬咁口。

婚後火速造人

據知,張美妮與男友已定於今年 11月 24日結婚,並會於 The Ritz-Carlton筵開 30席宴親朋,楊怡將擔任伴娘。本周五( 19日)準新郎新娘便率先飛意大利預支蜜月,六月再赴巴黎拍婚照,回港才積極籌備婚禮。

上周三( 10日)下午,本刊拍得美妮偕男友到九龍灣試婚紗,可能人逢喜事精神爽,二人表現興奮,睇婚紗樣辦時互相交換意見,默契十足。美妮不時捽男友面珠, KK亦替女友撥頭髮,表現恩愛。

當日美妮試了三套婚紗,其中一件更穀胸上陣,甚有睇頭。之後,二人再約替他們擇日成婚的玄學家好友麥玲玲師傅,到擺酒的酒店 high tea兼跟職員商討布置等等。直至六時,換上低胸火辣短裙配黑絲襪的張美妮,才與麥玲玲結伴到灣仔會展,現身緋聞男友曾志偉的生日 P。

對於志偉緋聞纏身搞到要火速結婚,周二( 16日)記者致電張美妮,她一笑置之說:「梗係唔係!如果我有幾單緋聞咪要嫁幾次,哈哈哈……阿爸(曾志偉)一直都好照顧我,有咩玩同工作都會預我一份,當我女㗎咋!單緋聞純粹得啖笑, KK對我都好放心。今次結婚,除咗同自己父母講之外,志偉阿爸係第一個知道㗎!本來都想搵佢幫手做司儀,不過都係等佢高高興興台下玩算啦!其實我同男友都好鍾意小朋友,所以婚後會盡快造人。」

玲玲夾八字

試完婚紗,張美妮再約好友麥玲玲師傅到 Ritz-Carlton婚宴場地陪睇場地兼傾布置,而張美妮結婚的日子也是由麥師傅替二人夾過八字。周二( 16日),記者致電麥玲玲,她表示:「佢哋係蛇女猴仔本身生肖好夾,計過佢哋結婚之後會快有 BB。」

張美妮懶理被傳成為新任「志偉嫂」,上周三( 10日)睇完婚宴場地後,盛裝大曬事業線,與麥師傅結伴出席曾志偉 60大壽 P。

Salon打骰

有男友教路,張美妮現為六間髮型屋老闆娘,日前本刊拍得她在將軍澳分店親力親為埋數,與店員有商有量。

豪花百萬

張美妮男友對女友向來疏爽,結婚一生人一次,梗要排場十足,新郎哥預使逾百萬,認真巴閉。

Ritz-Carlton酒店$2萬 X30席 約$60萬

婚紗及禮服及兄弟姊妹服飾 約$30萬

紅酒 約$10萬

場地布置 約$3萬

禮餅 約$5萬

巴黎拍婚照 約$20萬

意大利預支度蜜月 約$15萬

約$143萬

Ritz-Carlton的鑽石廳富麗堂皇,能設宴 30至 32席,絕不失禮。

「豬扒港姐」張嘉兒亦會做美妮婚宴的姊妹。

視後伴娘

視後楊怡與張美妮同為 99年出道,第十三期藝員訓練班同學,感情深厚。好姊妹結婚,楊怡幾忙都要擔當伴娘一職。

採訪、撰文:娛樂組

攝影:攝影組
其他影片
  • 11月做新娘 美妮穀胸試婚紗


. 志偉緋聞纏身 張美妮速嫁髮型屋老闆
http://hittt.blogspot.com/2013/04/blog-post_5425.html
Related Posts Plugin for WordPress, Blogger...