滾熱辣
兩度想自殺 馬賽：生存冇意義
近日情緒病在娛圈蔓延，就連信主的視後鄧萃雯，亦自爆拍《金枝慾孽（貳）》時壓力爆煲，一度出現焦慮驚恐。
本刊收到消息，在新劇《神探高倫布》，由二線姐仔極速擔正做一線花旦的馬賽，去年開工拍該劇時日踩廿個鐘，無法抽離角色，加上受緋聞困擾，被指做小三撬走巨聲大孖周志文。在最無助的同時，最愛錫馬賽的外公又忽然離世。在三重打擊下，曾兩度想自殺，猶幸有人及時制止。
至今，馬賽的情緒病仍偶有發作。一直長居深圳的馬母，為怕愛女再做傻事，近日亦要頻頻來港𥄫實愛女。上周日（ 7日），記者向馬賽求證，她最初避而不談，再三追問下，她緊閉雙眼一會後才說：「有一刻……覺得自己生存冇意義！」
連環出事
去年中，馬賽經歷外公去世和慘做小三，在拍攝《神》劇時亦因抽離唔到角色，而鬱出情緒病。
25歲的馬賽， 08年參選港姐後開始拍劇，但一直徘徊在二線頭，直至去年中，得高層曾勵珍睇起，升呢擔正新劇《神探高倫布》，拍住視帝黎耀祥。事業大躍進，但與此同時，感情生活卻使她遭受挫折。去年中，馬賽拍《名媛望族》時，被指搭上巨聲大孖周志文，對方還背着𡃁模女友袁聖殷（ CoCo）一腳踏兩船。緋聞一出後， CoCo不斷透過微博及傳媒發功，怒插馬賽冇品。
在內地長大的馬賽，在港一向知心朋友唔多，而父母亦長居內地，內心不快無法可抒下，便鬱出情緒病。知情人透露：「阿賽本身性格慢熱，喺圈入面冇乜啱傾朋友，遇到問題都收收埋埋。個男仔（周志文）同佢一齊嗰陣，話自己係單身，所以到佢女朋友走出嚟，阿賽都已經夠 hurt，仲要俾人叫小三。」
自度頭撼車戲鏡頭
緋聞傳出後，情緒低落的馬賽，撞正開始拍攝《神》劇，由於劇情中段講到她發現被黎耀祥欺騙感情，每集都要以淚洗面，加上每日地獄式連拍廿個鐘，令不擅控制情緒的她穀到爆，萌起自殺念頭。
去年七月中，其中一場戲講述馬賽一個人在海邊拍喊戲，原本鏡頭只需要她向着海飲泣，但當導演一熄機，一直飲泣的馬賽，邊喃喃自語邊走近海邊。此時，察覺有異的工作人員，隨即拉她回岸上。事隔一星期，馬賽拍攝一場揸車戲，當日同樣要她喊，其間她忽然向導演自度一場頭撼軚盤鏡頭。當日在場的工作人員憶述：「嗰晚佢自度撼頭戲，導演已經話唔使，但佢已經 boom一聲撼咗落個軚盤度，跟住再撼多五、六次。到正式開機嗰陣，佢個頭已經瘀咗一大撻，連上妝補粉都遮唔到。導演驚唔連戲，惟有收工第二日再拍過。不過最恐怖係佢走嗰陣，突然細細聲同我哋講：『我唔屬於呢個世界……留喺度都冇意思！」佢講嗰陣對眼冇焦點㗎，我哋驚佢出事，話送佢去醫院。佢話唔使，最後 PA都親自送佢返屋企。」馬賽情緒瀕臨崩潰，此時卻收到最痛錫她的外公去世的噩耗。她一直自責未有趕返內地見外公最後一面，令壓力百上加斤。
馬母來港睇實
據知，即使相隔近數月，但馬賽情緒持續時好時壞，其間更試過在家中狂擲物件發洩。馬母與愛女通電話期間，亦察覺愛女唔開心，為安全起見，近日頻頻來港照顧愛女。上周日（ 7日），馬賽出席完《神》劇活動後，記者便發現馬母陪她到附近食肆食拉麵，又不停撩她傾偈，馬賽卻不發一言繼續食麵。其後二人散步回家，馬賽表現極不自然，除了一直和母親保持距離，全程更眉頭深鎖。
據知馬母擔心愛女情緒病持續惡化，曾向馬賽提議向醫生求診，但遭她一口拒絕。
認有情緒病
上周日（ 7日），馬賽出席《神》劇活動，對於兩度想自殺，她避重就輕說：「……我太入戲啫！」但當問她為何加插撞頭戲時，她卻不自覺露了口風。
記者：記 馬賽：馬
記：點解你要加撞頭戲？
馬：（緊閉雙眼一會）呢套劇我戲份好重，想逼真啲，先叫導演加。當時……有一刻……我覺得俾人呃咗，覺得呢個世界唔再需要我，生存都冇意義！
記：你當時情緒起伏咁大，係咪同周志文感情有關？
馬：（乾笑兩聲）邊關事，我同佢只係朋友。
記：佢女友鬧你，影響到你情緒？
馬：（忽然大聲）冇！
記：媽咪係咪叫你睇醫生？
馬：其實情緒病好多人都有，好小事啫！我之前去美國玩廿日，心情都好啲㗎啦！
同劇演員知情
馬賽拍《神》劇曾有自殺念頭，不少同劇演員亦知悉此事。敖嘉年、蕭正楠和監製李添勝亦承認馬賽情緒有問題，頗為憂心。
主角下場
《神探高倫布》首周平均收視只得 26點，不少網友插悶劇一場。不過劇情尾段，四個主角下場唔係死就做植物人，啱曬鍾意睇煽情戲的師奶觀眾，希望能夠挽回收視。
攝影：攝影組
. 兩度想自殺 馬賽：生存冇意義
http://hittt.blogspot.com/2013/04/blog-post_7559.html
