Lynn寸爆：唔知邊個應該喊!
昨日熊黛林（Lynn）一句「我係單身」，宣布她與郭富城的7年「富黛戀」正式玩完。
2006年因與城城合作拍MV而撻著的Lynn，大前晚在微博上載尾指戒指並留言「重新上路」暗示分手，昨日她便戴著「重新上路」戒指，裝扮成黑寡婦般出席內衣店開幕活動，以往拍拖時春風得意的樣子，不再復見，換來昨天面容憔悴，眼腫腫似喊過，強忍眼淚的她，對於因為與城城拍MV而傳撻著的苟芸慧早前喊著否認是「小三」，Lynn即寸爆苟姑娘：「唔知邊個應該喊。」
熊：熊黛林 記：記者
記：心情點？
熊：OK。
記：你好憔悴？
熊：可能今日太早起身。
記：你係咪以淚洗面？
熊：邊個講o架？
記：你今日眼腫？
熊：冇，我眼睛OK，昨晚冇喊過。
記：之前日子有冇喊？
熊：OK呀。
記：係咪真係同城城分咗手？
熊：有啲嘢過咗去，依家要新開始。
記：係咪之前報道所講4月5日同城城攤牌？
熊：唔知報道點嚟。
記：有啲嘢過咗去係咪即係同城城嘅感情過去咗？
熊：過咗去就唔講啦，要有個新開始，我依家好開心。
記：依家係咪單身？
熊：係。
記：係咪覺得好可惜？
熊：我嚟咗香港7年，日日都好開心，冇話可唔可惜，我想以後更加開心。
唔認有向人逼婚
記：有指因為你向城城逼婚導致分手？
熊：我冇逼過任何人做任何事。
記：分手係咪你提出？
熊：呢啲唔答。
記：你有冇提出結婚？
熊：呢啲唔係女方提出嘅。
記：男方有冇提過結婚？
熊：我唔答。
記：分手係咪有第三者出現？
熊：我唔想傷害任何人，過咗去就係過咗去，唔好再計較乜嘢原因。
記：苟芸慧喊住唔認小三？
熊：我已經話過唔識得佢，唔想答有關佢嘅嘢，唔知邊個應該喊。
記：好介意城城嘅緋聞？
熊：有時工作控制唔到。
記：信唔信苟芸慧同城城有嘢？
熊：我冇講過。
記：對城城死心？
熊（停頓兩秒）：過咗去就過咗去，唔好再糾纏，畀自己有個新開始。
記：同城城仲係咪朋友？
熊：仲係朋友，呢樣嘢係唔會變。
記：城城有冇做啲乜嘢挽救感情？
熊：冇回應。
記：昨日城城唔想提你，係咪好絕情？
熊：今日冇睇報道，今朝好早起身去咗化妝。
唔啱嘅需要放低
記：如果城城和苟芸慧真係一齊，會唔會祝福佢哋？
熊：唔會隨便亂講呢啲，都唔識佢，唔想多事。
記：同城城七年感情放唔放得低？
熊（眼圈一紅）：要向前行，係覺得唔啱嘅都需要放低。
記：覺唔覺得7年浪費青春？
熊（眼眶淚珠滾動）：唔答。
記：唔回應啦！
記：你係咪為情消瘦？
熊：一路都有少少胃病。
記：會唔會同媽咪講你哋分手？
熊：冇特登同媽媽講，我想佢知道我嘅開心事，每次出嚟都開心嘅。
記：同城城仲會唔會繼續聯絡？
熊：以後嘅嘢唔知道。
記：有冇機會復合？
熊（諗一諗）：我唔知呀！
在中環出活動後，大約下午兩時半，Lynn與助手坐車往大坑方向行駛，先到經理人公司，再由助手到粥店代買粥及到洗衣舖取衣服，然後才打道回府，返回嘉亨灣香閨，過往她為方便攻城居住大坑，但現在仍避不過重走大坑之路。
此外，網友更將兩人七年情玩完作話題，昨更有網友「翻舊帳」上載一些多年前疑似熊黛林露點行騷舊照，還有指是變臉前照片。
而Lynn的哥哥熊林昨亦於微博為她打氣，寫上︰「失去的東西，其實從來不曾真正地屬於你，也不必惋惜，幸福就在不遠處！」力撐妹妹分手的決定。
文：名人組
.Lynn寸爆：唔知邊個應該喊!
http://hittt.blogspot.com/2013/04/lynn.html
