熊黛林反擊苟姑娘
【富黛愛忽完之錯愛的呼喚】郭富城和熊黛林（Lynn）相戀七年，最近傳出城城移情細自己19年的苟芸慧（苟姑娘），自知輸硬的Lynn決定棄城。Lynn昨日在中環出席內衣店開幕時尾指戴上「分」戒，正式宣佈回歸單身！激瘦的Lynn臉容憔悴兼眼腫腫，對苟姑娘聲稱無辜而落淚，Lynn含淚反擊道：「我唔知邊個先應該喊！」
現年47歲的郭富城與33歲熊黛林不敵七年之癢，有傳二人原定今年10月結婚，但被疑似小三的苟芸慧介入導致分手。Lynn日前在微博放了尾指戴戒指的照片，還留言要重新上路。三位主角輪流現身，城城和苟姑娘前日先後出席活動，苟姑娘哭笑難分回應自己並非第三者；城城則冷對分手，反而對苟姑娘落淚即憐惜說：「好慘喎！」護苟棄熊態度明顯。
慘成輸家的Lynn昨日在中環出席內衣品牌Rigby & Peller新店開幕，大會送上吊帶內衣給她，惜無惜花人欣賞。穿上透視長裙的Lynn雖然高貴迷人，但難掩愁爆心情，一身黑色打扮就像哀悼逝去的戀情，而本身已瘦削的Lynn可能因飽受情傷，身形比前更瘦，雙眼更似喊過一樣變得很腫，我見猶憐！
對於與城城分手，Lynn沒刻意迴避，還在左手手指尾戴著代表分離的戒指，她表示現在心情OK，但每當提起城城與苟姑娘的新戀情，Lynn多次激動到眼濕濕，以下是Lynn與記者的對話：
（熊：熊黛林 記：記者）
記：你個樣好憔悴。
熊：可能今日太早啫。
記：係咪以淚洗面？你雙眼好腫。
熊：邊個講㗎？我噚晚冇喊過。
記：咁前晚呢？
熊：（苦笑）OK㗎。
記：係咪同城城分手？
熊：有啲嘢過咗去，𠵱家係新開始。
記：係咪4月5日分手？
熊：我唔知報道喺邊度嚟。
【紅眼】
■每當提起「城苟戀」，Lynn即眼有淚光，一副強顏歡笑的模樣。
【扁嘴】
【強笑】
承認單身
記：現在單身？
熊：係呀！過咗去（感情）唔想再講，𠵱家係新開始，我好開心（假笑）。
記：係咪好可惜？
熊：其實我嚟香港七年，日日都好開心，冇乜可唔可惜，希望以後更加開心。
記：你提出分手？
熊：我唔答嘞。
記：你逼婚？
熊：我冇逼過任何人做嘢。
記：係咪有提出過結婚？
熊：我覺得呢啲嘢唔係女仔提出嘅。
記：男方有提出過？
熊：我唔答嘞！
記：分手涉第三者？
熊：我唔想傷害任何人，過咗去就由佢過去，唔計較乜嘢原因。
記：苟芸慧喊曬話自己無辜。
熊：我唔識佢，唔想答佢嘅嘢（停頓一會，眼泛淚光）……我唔知邊個先應該喊！
記：覺得城城好多緋聞？
熊：可能工作控制唔到啫。
拒畀祝福
記：信佢哋（城城和苟姑娘）有嘢嗎？
熊：我冇咁講。
記：對城城死心？
熊：唔係死唔死心，過咗去唔好再糾纏，畀機會自己新開始。
記：同城城仲係咪朋友？
熊：朋友，呢啲嘢唔會變。
記：城城有冇做乜嘢挽救呢段感情？
熊：（睩大對眼，眼紅紅）我唔回應嘞。
記：城城覺得苟姑娘好慘，但對你好絕情？
熊：我冇睇呢啲嘢，今朝好早起身化妝，我唔知點回應。
記：如果佢哋係真，會唔會送上祝福？
熊：我唔會隨便亂講。第一，我唔識嗰個人。第二，唔想多事。
記：七年情係咪可以放低？
熊：（強忍淚水）要向前行，唔啱始終都需要放低。
記：有冇覺得自己浪費青春？
熊：（再度眼濕濕）我唔答嘞。
■被指是第三者的苟姑娘，前晚在《仁心II》中跳鋼管舞，但無助收視。電視圖片
胃病發作
記：為情消瘦？
熊：我一向有少少胃病。
記：同媽咪講咗分手未？
熊：冇乜特別同媽咪講，我想佢知我嘅嘢都係開心事，我每次出嚟都好開心。
記：仲有冇同城城聯絡？
熊：以後嘅嘢唔知。
記：有冇復合可能？
熊：我唔知，唔該曬。
訪問結束後，Lynn由經理人及助手陪同離開，並上了七人車直駛大坑方向。其間Lynn吩咐助手到超市、餐廳和洗衣店買食物及取衣服，之後便返嘉亨灣寓所。另外，「城苟戀」令苟姑娘形象受損，有網民發起罷看她演出的劇集，前晚《仁心解碼II》雖有苟姑娘穿黑絲跳鋼管舞的場面，但收視只得27點（約173萬觀眾），比起周一及周二的29點及28點還要低。
採訪、攝影：盧坤穎、黃曉程、彭琮然
相士話：李丞責批城城苟芸慧相剋
現年47歲肖蛇的郭富城，跟熊黛林相戀七年，最近卻爆出「分」訊，熊黛林無望升呢城嫂。有指城城今年犯太歲令感情有衝擊，到底城城何時脫離浪子一族成家立室？堪輿家李丞責昨在電話說：「佢今年犯太歲，加上同女友碰上七年之癢，肖蛇嘅城城其實同肖猴嘅熊黛林係相合，只要捱過今年。以城城命格，佢未來四年，馬、羊、猴同雞都有望結婚。」他表示城城跟肖豬的苟芸慧相剋，二人撞埋一齊就會惹麻煩。
採訪：比華利
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
.熊黛林反擊苟姑娘
http://hittt.blogspot.com/2013/04/blog-post_4567.html
