同你吟一吟
黃日華噴煙教女
2012年11月15日苦等三年，打爆電視機都攞唔到牌 嘅城市電訊，主席王維基唔想三年又三年，忍無可忍發聲明鬧爆商務及經濟事務局局長蘇錦樑，問佢仲想拖幾耐？
老細已經燒咗三億銀紙，旗下獲高薪挖角過檔 嘅台前幕後，更加唔敢放軟手腳，由黃日華擔正 嘅新劇《開腦儆探》，早排 響上環拍外景，「火爆華」亦在陣，但當日唔見華哥動真火，只係成日揦埋塊面，好認真咁煲住煙研究每場戲應該點拍。
黃日華愛女黃芷晴是日都有份開工，仲俾老豆咿咿哦哦教做戲，拍完一個 shot，又捉住坐埋一邊做檢討。
由細哦到大，黃芷晴不知幾輕鬆。拍唔夠一陣就放食飯，全體台前幕後 響附近酒樓包 咗兩圍 枱開餐。聽講城電好闊佬，出外景一定唔使捱凍飯盒，差極都有熱辣辣三 餸一湯。撬人唔慳食飯又唔慳，睇 嚟王維基呢 50億，凍過水。
