彭三順效忠小格格 陳國邦耳塞湊女
壹週刊 第1184期
《大太監》收視高開，當中將黃浩然毒打，搞到胡定欣滑胎，把奸角「彭三順」演得入型入格的陳國邦率先跑出，成為今屆台慶頒獎禮男配角大熱人選。彭三順令網民睇到咬牙切齒，但一物治一物，未被李連英反擊，先被「小格格」愛女陳禛馴悍。愛女遺傳母親羅敏莊巨肺雄聲，怕嘈的阿邦為抗衡嘈音，寧戴耳塞上陣，都要親自貼身侍侯呢位「小格格」。
慈父相
過往鏡頭前後都係好 cool的陳國邦，當日手抱愛女陳禛，展露的冧爆笑容前所未見。
奸公公
使唔使咁冧呀！（設計對白）
湊女一腳踢
上月底榮升爹哋的陳國邦，對住「小格格」陳禛，餵奶、掃風、換片、沖奶樣樣皆能。鏡頭前飾演「彭三順」的他，一對豆豉眼滿藏心計，鏡頭後望住寶貝女陳禛卻柔情似水：「做男人咁耐，未試過錫一個女仔個嘴感覺咁軟綿綿，唯獨我個女先俾到我呢種感覺。」說罷望一望身後老婆羅敏莊傻笑一下，見愛妻無詐型，阿邦繼續沉醉湊女樂。
性格內斂的陳國邦，最怕環境嘈吵。結婚當日，他因一眾賓客上台又跳又唱的熱鬧場面嚇怕，一度失蹤半小時，老婆對此已經見怪不怪。然而「小格格」陳禛遺傳唱歌母親的巨肺，強如洪鐘的哭聲，陳國邦無反感之餘，即使頂唔住女兒哭聲逐步升 key，湊女公寧願戴住耳塞，亦堅持親為「格格」換尿片，效忠到底！
女兒起名叫陳禛，唔係想佢打得，而係望女兒照名字的含意：「以至誠感動神靈而得福祐。」
因愛女遺傳媽咪巨肺，喊聲雄壯，專責幫愛女沖涼同換片的阿邦，唯有每次要戴耳塞侍侯她。
冧到出口
陳禛誕生前，家養九隻貓的陳國邦夫婦，一直疊埋心水過二人世界，就算拍劇期間不停聽到老友黃浩然、曹永廉、陳錦鴻三個分享親子經，陳國邦亦不為所動，直至羅敏莊意外懷孕，才扭轉兩公婆心態。
「雖然一直只想過二人世界，但一知老婆有 咗，又好接受小生命來臨，發覺有小朋友都唔錯！黃浩然之前成日同我講：『望住 BB就好 冧！』當時仲好疑惑，係咪㗎？到睇住個女出世，望住佢我成個人軟曬，終於明白咩叫溶化。依家好似黃浩然話齋，望住個女就好 冧。」陳禛的魔力，就是把平日 cool爆的陳國邦，變成今日餵奶又笑，掃風又笑一餐的四萬爹哋。
抱住愛女狂咀的阿邦，話陳禛的小咀柔軟如綿，著曬迷。
15日捉實奶樽
出世第十五日，陳禛每次飲奶已懂得用手捉住奶樽。
放在廳中，價值萬二蚊的 BB木床，拆開組合長度可伸展至合適五歲小孩使用。老豆阿邦加個車轆，便成流動床仔。
陳禛出世後，家中飼養的九隻貓，不時輪流陪伴這位小主人。
坐月期，唔想肥樣出鏡的羅敏莊做指揮官，指揮老公湊女，半個月已將阿邦訓練成全能湊仔公。
化敵為友
在《大太監》中飾演的太監首領彭三順，一直視李連英為敵，處處跟他對著幹。因常欺淩弱小，令彭三順成為網民「公敵」，希望往後劇情能夠見到惡人有惡報。偏偏劇情峰迴路轉，原來做盡壞事的彭三順，無非想穩固在宮中地位，因倩蓉滑胎一事令他良知醒覺，之後更暗中幫李解圍，自此二人化敵為友，但最終彭三順仍要面對自己以前種下的惡果，被降職之餘，往後只能在宮中過著卑微的日子。
黑馬變大熱
陳國邦向來擅長演活小人物角色，故多年來均以黑馬姿態角逐台慶的「最佳男配角」獎項。今年終在天時地利人和配合下，「彭三順」一角在《大太監》中率先爆出，並以大熱身份跟《雷霆掃毒》的大反派黃智賢，及演活「蘇基」的古明華爭獎。
陳國邦說，身邊朋友讚女兒腳頭好，一出世爸爸有份演出的《大太監》收視高開 35點，陳國邦卻有自己一套睇法：「我唔客氣，我承認 喺呢個角色上，我係做得好好，係用心去做。至於有冇獎，我好隨緣！ 喺我心目中，我都好想古明華攞獎。」
古明華
黃智賢
