同你吟一吟
Rosemary好腳力
2012年11月15日自從前年 響美國藏毒， Rosemary嘅 model事業到而家都翻唔到身，工作量唔多嘅佢，早排自爆 響紐約報讀為期四年 嘅營養學課程，搵定後路。
其實冇工開都唔使憂，事關佢男友 Jason好有米，家住趙苑幾千呎單位，雖然係租，但十幾萬個月都俾得起，證明有揸拿。
有靠山，等讀書等嫁人 嘅 Rosemary，大部分時間做跟得女友，不過 Jason唔係成日 喺香港，早兩個禮拜，《壹》仔 響西環見到冇化妝冇仔陪嘅 Rosemary去完超市買嘢，一個人行呀行，由西環行到數碼港再直去域多利道趙苑，保守計全程五公里，幾蚊巴士錢都慳番唔在講，反正大把時間，練嚇腳骨力當運動，一舉兩得。
