娛聞樂
補擺喜酒 霆鋒 Eason做兄弟 葉佩雯 Eric試裙褂硬曬軚
2012年11月09日
郭偉亮（ Eric Kwok）與葉佩雯（ Grace）拍拖 11年，結婚 1年。本月 23日，兩人將會設宴 35席補擺喜酒。他們相識滿天下，兄弟姊妹團粒粒巨星，屆時已離婚的謝霆鋒及張栢芝更會同場贈興， Eason又會幫新人頂酒。
日前，本刊獨家直擊郭氏伉儷試裙褂、禮服過程，穿上一 set中式傳統「呆佬拜壽」裝的 Eric，十足呆佬硬曬軚。為老婆，一時擺 chok樣，一時又取笑自己似聽主人話的狗，一時又扮「鹹濕老爺娶妹仔」，冧到 Grace鬼咁開心。
去年 11月 23日，是 Eric及好友 Jerald的組合「 Swing」告別舞台的演唱會最後一場。當晚 Eric當著全場萬人面前，向 Grace下跪求婚，更一早安排了律師在場即時簽紙註冊結婚，製造驚喜浪漫。
事隔一年，兩人定於本月 23日在北角海逸君綽酒店設宴 35席擺酒完婚。 Eric說：「知道今個月 23號係好日，咁啱同上年演唱會結婚嗰日係同一日，真係有紀念價值。」對於該酒店曾發生火警， Grace表示冇有怕：「火燒旺地，咪仲旺我哋！李燦森擺酒都同我哋同一個場，咁多人揀，應該唔使驚。」
緋聞情侶成焦點
婚期將至，忙著替其他歌手做錄音工作的 Eric，日前才有空與老婆試裙褂、禮服。通街老友的 Eric得到蘇志威贊助禮服，當日第一站便到尖沙嘴金巴利街、蘇老闆與友人合資的婚紗店「 LUXE」試衫。「多謝蘇 Boss啦，令我又煩少一樣，我好怕揀衫、試衫。」 Eric笑說。
其實婚宴的煩惱豈止咁少，據知跟二人老友的謝霆鋒及張栢芝屆時會鮮有地同場，霆鋒擔任戥穿石，栢芝則只會來飲喜酒。 Eric說：「霆鋒嗰日有工作在身，佢話盡早趕嚟！」而另一 pair矚目的緋聞情侶則非容祖兒、「師兄」劉浩龍莫屬。當晚男方亦是戥穿石之一，據知祖兒為避免尷尬，只會是座上客，不過到時依然難免成為焦點。對於祖兒會否與師兄同枱，一對新人堅持保密。
Eason苦練酒量
提到各兄弟有甚麼板斧， Eric說：「咪頂酒囉！我同 Grace都唔飲得，但有梁漢文、師兄同陳子聰喺度，至少可以頂到 30圍。（咁 Eason會否唱歌娛賓？）我哋支咪會設置指模開關，佢冇咁容易可以唱，哈哈哈……不過 Eason同我講，話最近練過啲酒量，唔似以前飲一杯就瞓，佢話可以幫手頂喎。」
兩人試完禮服，再到附近試中式裙褂，面對一系列金光閃閃的裙褂， Grace表現興奮，更指明要戴浮誇鳳冠頭飾，十足古代的「帝女花」，「我不嬲都好鍾意呢啲懷舊嘢，好似細細個睇電視、睇電影嘅戲服撻曬上身咁。 Eric唔鍾意㗎，係我逼佢，哈哈哈！」
說時遲那時快， Eric已被迫穿上一整套「呆佬拜壽」裝，他搞笑謂：「我覺得好似啲狗俾主人逼著衫咁！」不過到 Eric為老婆頭上的「帝女花」鳳冠揭開珠簾時，就鬼馬地大力一 fing，幾乎搞甩了老婆的假眼睫毛。
超強兄弟班
Eric相識滿天下，當年霆鋒、栢芝在菲律賓小島秘婚，也是由他任證婚人，可見他分量十足。今次 Eric與 Grace擺酒完婚，一班星級戥穿石包括陳奕迅、謝霆鋒、梁漢文、劉浩龍、陳子聰等 9位老友；而老婆的十人姊妹團，大部分則是這班兄弟的另一半，陣容鼎盛。
百萬完婚
不愛鋪張的郭氏伉儷，自言擺酒只為圓家人夢想，最重要簡單而隆重。人面廣的二人雖然各方面都獲不少好友贊助，但埋單計數，閒閒哋都要使近百萬。
海逸君綽酒店酒席 35圍 約$50萬
輕井澤拍婚照（包工作人員機票住宿） $15萬
新娘婚紗及晚裝 約$25萬
Isabelle禮餅 $2.5萬
共約$92.5萬
