忽然去片
老襯是這樣煉成的！
2012年11月09日
《忽周》睇真啲正片唔好 miss！
上年喺演唱會求婚成功嘅 Eric Kwok（郭偉亮），終於同老婆葉佩雯喺今個月尾補擺喜酒。
呵呵，睇片見佢兩個去試裙褂禮服就真搞鬼，女嘅全程揸 fit笑笑笑，男嘅就一副呆樣，仲話自己似隻狗仔俾人逼著衫！
不過，睇佢兩公婆嘅互動，就知乜都係耍花槍。
接受訪問嗰時，葉佩雯仲好小鳥依人㖭！
所以話，做女人唔使一味惡嘅。軟硬兼施，先煉製到好男人出嚟。
風水睇真啲
講明先，媽咪姐份人唔迷信㗎！唔會乜都求神問蔔。不過，講到睇風水，就覺得都係一種統計學，參考嚇無妨。呢期睇片見有位睇開樓盤風水嘅師傅親身帶大家去各區睇山形地勢邊啲為之 good！邊啲要避！咦，幾實用喎。而且有埋標示，唔係齋噏，易明好多！又學到嘢嘞。
007的家？
睇《忽周》，增廣見聞真係話咁易！就講今期「星悅居」帶我哋參觀向華強姪兒向展邦嘅豪宅，其他嘢唔使睇，淨睇佢拉開疑似衣櫃門，後面居然收埋咗成間房咁大嘅冷藏酒櫃，已經好「占士邦」！再睇埋佢花園外嘅流水通道。噢，媽咪姐幻想到 007揸船經過呀。
