媽咪姐
Eason老竇收料
2012年11月09日
仲忙緊巡唱嘅陳奕迅（ Eason），周日晚（ 4日）又抽時間去咗新城舉辦嘅音樂會，唱番兩嘴！佢喺台上慣常七情上面，台下繼續狂噴口水，同記者講聖誕節可能會帶阿徐同個女出去玩幾日。
Eason講起放假笑唔停，但媽咪姐發現喺記者堆中，有人亦笑得出奇咁開心喎！望真啲，佢咪係陳爸爸陳裘大，睇嚟佢平日好難得見到 Eason，所以特登跟埋嚟聽嚇個仔最近發生乜事。 Eason，搵次帶埋阿爸出埠啦！時間唔等人㗎。
估嚇相隔幾多年？
上圖係 85年嘅小虎隊出 show相，左圖就係上周六（ 3日）胡渭康（右）開個唱，拉埋林利（左）同蔣慶龍（中）重組小虎隊，咁又 27年呀！
