大封面
7月放受精卵入子宮 李嘉欣又懷第 2胎
2012年11月09日
早前本刊率先爆恨女心切、 42歲的李嘉欣， 7月中搵養和副院長陳煥堂做體外養卵（ IVM）。事後她忽然轉口風表示已跟老公許晉亨達成「封肚」協議，表明一個夠曬數，不過本刊從養和醫護人員收到可靠消息，是次人工受孕在沒有太大期望之下，李嘉欣竟然成功得米，換句話說，現時李嘉欣已懷蛇 B接近四個月（ 15周）。
許家即將再添新成員，家中上下興奮萬分，而李嘉欣為避開傳媒耳目，近日深居簡出，更刻意改到陳副院長位於中環的診所做產前檢查。
李嘉欣 08年 10月成功嫁入許家後，一直透過養和醫院副院長陳煥堂做體外養卵，做了三次才於 2011年 2月誕下金叵羅小 JM（許建彤）。
自知高齡產婦懷孕機會不大，她產後急急調理身體，務求再次一擊即中，為許家湊成「好」字，可惜去年 10月尾再試體外養卵撻 Q，未能成功懷孕。屢敗屢試的她，原定今年 6月再出擊，誰知天意弄人，她在身體檢查時發現腸胃有八粒良性瘤，即時入院切除。小休一個月後，李嘉欣已急不及待再搵陳副院長，結果就係呢次令她再度懷孕。
據其密友透露：「嘉欣最初真係好想喺今年龍年生到個女，但一直唔成事。佢都知自己一收經就冇得做體外養卵，所以兩公婆唔再刻意求女，只係想生多個陪下囝囝，就算 BB屬蛇都冇所謂。嘉欣仲話生女當天賜，生多個慈姑椗亦冇壞，將來可以幫手打理家族生意，所以佢最後決定唔喺外國做，搵番陳副院長幫手。不過佢都諗住做埋今次，唔得就算，始終下下要入院抽卵都辛苦。」
有女陪玩
本周一（ 5日），下午約四時，許晉亨到深水灣高爾夫球會打 golf，同行還有一女友人為他拉工具車。據記者現場觀察，許晉亨打 golf時表情多多，精力旺盛的他更打足成粒鐘才停手，心情大靚。
刻意放流料
其實李嘉欣誕下小 JM後，母愛滿瀉，人前人後總提及湊仔的喜悅，她亦不諱言想生多個為小 JM做伴。不過之後養卵失敗，李嘉欣與許晉亨難免失望，亦唔想太高調談生育大計。今年 7月中被傳媒踢爆再放受精卵入體內後，她竟隨即向外發表「一個夠曬數」言論，更說：「我唔生喇，老公同我講，想自由的話千祈唔好生個女。我一世人俾人評頭品足夠喇，唔想生個女出嚟又有呢種壓力，萬一有人將佢個樣同我比較，咁會好無謂。」原來她只想在冇壓力之下，低調進行「人工受孕」。
直至上月她到醫院覆診時始知「中獎」，得悉懷有蛇 B後，李嘉欣非常感動，當晚許晉亨隨即帶她回家向兩老公布喜訊。
蛇俾龍食住
今年娛樂圈喜訊特別多，眾星如劉華、楊千嬅、 Kelly、周家蔚爭生龍 B，而等生蛇 B的藝人暫時只有湯盈盈及羅嘉良太太，但龍蛇 B卻天淵之別。
事實上龍 B各方面的運勢真的比蛇 B強，玄學家麥玲玲師傅解釋：「龍係人中之龍，俾人嘅感覺係尊貴啲、勁啲。好多人唔愛蛇，不過都唔好話蛇 B唔好，最緊要睇佢同父母夾唔夾。而蛇係跟住龍後面，好多人話佢係小龍，只係冇爪，都唔弱。但佢就注定一世俾龍騎住。」
俾龍騎住都肯生蛇 B，似乎李嘉欣非為許家多添成員不可。
奶奶嫌嘉欣太瘦
許老太知道李嘉欣再懷孕，相當緊張。知情者透露：「 Jayden出世嗰時得 6.4磅，嘉欣奶奶都有微言，話個 B唔夠肥。佢知嘉欣貪靚，就算有咗都唔會刻意食多啲嘢，近排見佢依然好瘦唔多長肉，老太咪吩咐工人煲多啲魚湯、花膠熬雞湯俾佢補身，仲叫嘉欣有時間就去大宅食飯。」現時李嘉欣與奶奶關係不錯，每周都會到許家大宅見兩老，大多數都會帶埋小 JM同行，讓兩老多見孫兒。上周六（ 3日），本刊就發現嘉欣乘座駕從曉廬寓所出發，直駛到許家大宅晚膳。
微博爆犯禁
雖然成功懷蛇 B，李嘉欣卻未有遵守孕婦戒條。即使冇得出街，她惟有不時上載相片到微博解悶，卻不經意踢爆自己又穿高跟鞋、又抱 B等禁忌。都係小心為上啦，畢竟都是高齡產婦。
嘉欣佗 B無禁忌
雖然李嘉欣已懷第二胎，但許晉亨的緊張程度，絕不比許老太遜色。「嘉欣生過一胎有咗經驗，依家有咗都唔避忌，照著高踭鞋同食生冷嘢， Julian（許晉亨洋名）見到都會『哦』佢。始終知佢佗 B辛苦，有時都會買蛋糕同花老婆開心。嘉欣近排成日嗌悶，上星期， Julian仲專登帶老婆去睇草蜢演唱會，許老太唔知㗎，如果知實唔俾佢哋去。」
其實李嘉欣一向介意外間指她透過體外養卵受孕，她自從 8月到養和醫院檢查過，近日已改到該醫院位於中環莊士大廈的家庭醫學中心覆診和做產檢，還刻意預約非正規診症時間，以避開傳媒耳目。
婆媳飯局
9月底，李嘉欣被拍得與許晉亨及許家兩老（右圖）到富豪飯堂「福臨門」晚膳。當時懷孕兩個多月的李嘉欣，身形依然單薄，但為胎兒著想，她亦穿上長袖衫保暖。
亨亨打 golf心情靚
李嘉欣低調有喜，本周一（ 5日），許晉亨卻急不及待會友報喜。當日下午他鮮有在有司機同行的情況下，都堅持自己駕駛掛有「 JM」車牌的瑪莎拉蒂跑車，到深水灣高爾夫球會打波。現場所見，許晉亨心情靚絕，由一年輕女友人陪同下玩了個多小時，隨即在會所餐廳會合兩名男友人開餐，四人邊食邊傾。其間記者更聽到許晉亨發出陣陣笑聲，似乎難掩再做父親的喜悅。約六時半，許晉亨乖乖回家「交人」，未有冷落嬌妻。
9月最後公開露面
本周三（ 7日），本刊記者致電李嘉欣經理人陳善之。對於李嘉欣懷孕，他直言不會過問，並表示：「如果佢需要休息，會通知我，但到呢刻為止都冇同我要求要休息。（但近排唔見佢有工作。）同佢安排緊囉，嚟緊佢會到上海拍廣告！」
自從懷蛇 B後，李嘉欣刻意減產，對上一次出席活動已是 9月中，當時她與郭富城出席雜誌活動，自此再冇公開露面。即使她放上微博的照片，亦只拍攝半身為主。從一張她 10月上載的照片看來，身形仍十分纖瘦。為了腹中胎兒，看來她真係要積極增磅。
睇騷胎教
連日足不出戶的李嘉欣，上周四（ 1日）晚，與許晉亨到紅館睇「草蜢森巴大戰軟硬 fans」演唱會，佗住 BB都要輕鬆下。而李思捷的緋聞女友 Naomi（戴冷帽者）更偷拍兩人，並將相放上微博。
高齡明星多人工受孕
隨著社會逐漸開放，科技越發達，近年接受人工受孕的高齡婦女多的是。據調查顯示，近兩年接受人工受孕的人數增幅 42%，其中當然有一班高齡藝人。
40歲懷孕 3次陳慧琳
Kelly繼 09年 7月誕下長子「蝦餃仔」劉昇後，去年初宣布以人工受孕成功佗孖女，可惜不久飽受流產之痛。去年 11月，她承認再以人工受孕懷龍 B，次子「小籠包」劉琛今年 3月出世。
46歲有咗密冚 朱麗倩
今年 5月，朱麗倩為劉德華誕下 7磅「小龍女」，有傳是經劉華老闆林建嶽介紹前往法國進行人工受孕，再經吳君如轉介「不育聖手」何永超跟進，不過至今女兒真身仍未曝光。
41歲積極再生黎姿
08年黎姿嫁予富商馬廷強後，專心調理身體並進行人工受孕，經何永超主診， 2010年成功誕下孖女家蔚及家鎂，上月再誕下第三名女兒 Pegella。據知她會再接再厲為馬家追「慈姑椗」。
47歲恨生仔吳君如
一直希望為陳可辛生仔的吳君如，早年得何永超打救接受人工受孕，終在 06年 41歲那年誕下女兒陳是知，據聞她一直恨追仔，惟至今仍未成事。
