搜尋此網誌

2012年11月9日星期五

[忽然1周]最嚇素顏女歌手




博出位

最嚇素顏女歌手

2012年11月09日

萬聖節 𠵱嘩鬼叫完,不過娛樂圈嘅驚嚇指數仍然持續,薛凱琪、鍾嘉欣、 G.E.M.、何韻詩同雨僑五位女歌手,不約而同喺微博發放佢哋嘅素顏照。為咗表揚佢哋嘅勇氣,媽咪姐決定頒發一個「最嚇素顏女歌手」獎項。結果由今年 31歲嘅薛凱琪,以打褶眼袋奪得!恭喜曬, Fiona。

薛凱琪捱殘

薛凱琪( Fiona)近年拼命搵錢養家。早前先過檔黃栢高到筆轉會費嘅佢,原來近日又飛咗去杭州拍戲,仲唔怕辛苦,拍完十粒鐘戲後即刻做 gym。可惜 31歲嘅佢真係不再青春,捱到殘曬,黑眼圈之外,眼袋仲大到打褶,攞呢個獎的確實至名歸。

G.E.M.夠青春

21歲嘅阿 G.E.M.為咗餐餐大魚大肉,於是搏命跑步,佢仲將運動後嘅滴汗 look放上微博任睇㖭!話到尾青春大曬,即使素顏,但阿 G.E.M.嘅皮膚始終零瑕疵,係佢攞命表情出事啫!

鍾嘉欣露得好

28歲嘅鍾嘉欣,深明「身體是財富」嘅道理,於是病癒後立即跑步 keep fit。不過細心啲睇,被無綫洗禮嘅嘉欣,額頭出咗幾粒暗瘡,眼袋亦都唔弱。勝在保守慣嘅嘉欣今次露下心口,轉移視線成功,注定無緣攞獎。

何韻詩似宅男

其實要數最驚嚇,何韻詩呢張啱啱瞓醒頭都唔梳,成個宅男咁款嘅素顏 look,絕對係獎項大熱。弊在阿詩唔理好醜,呢款 man爆嘅素顏 look經常見人,驚嚇度都係輸俾 Fiona!

雨僑打定底

曾經被指五官執過嘅雨僑,最近就同經理人蕭定一鬧交,罵戰日日見報,難怪佢冇覺好瞓,對眼腫得鬼咁 3D。不過佢明知自己素顏趕客,於是佢打定底話「不夠完美反而讓人記住你」。冇錯,雨僑今次有份角逐,當贏咗㗎喇。



Related Posts Plugin for WordPress, Blogger...