直選女神 朱千雪

FACE週刊 第285期

要贏得網友封做女神，講到尾其實都係觀眾緣。朱千雪貴為應屆港姐季軍，如果無綫港姐決賽當晚唔係冧 server，朱千雪應該係首位民選港姐冠軍。事後有無數網民要求無綫畀番個港姐冠軍名分佢，有人為佢不值，總好過名不符實。

有民意支持嘅女神，同有真普選產生嘅特首一樣，分外矜貴！

24歲朱千雪在加拿大讀完大學回流，未入行前在當地做過一年 marketing，第二份工就係港姐。今年無綫玩民意網上直選港姐，最後卻發生冧 server事件，朱千雪由第一變第三，失落後冠卻贏盡民望：「多謝大家支持，知道名次之後已經冇諗過冇冧 server會點，o依家更加唔會諗。我希望趁大家忘記我之前，有其他工作做令大家記得我。」

Profile

朱千雪（右）失落港姐後冠，敗給張名雅（中）。其實佘詩曼當年亦並非冠軍銜頭，證明喺 TVB發展，後勁最緊要。

年齡： 24歲

身高： 169cm

體重： 109磅

三圍： 33-24-34

學歷： Simon Fraser University Vancouver（ Business and Communications）

最迷歌手： Lady Gaga

最愛港星：鍾楚紅

反勝一仗

朱千雪得民心，無綫亦極速安排她擔任《勁歌金曲》主持。擁有八級鋼琴底的她，計出鏡率總算贏番冠軍張名雅一仗。「今次係監製（麥鎮東）搵我嘅，佢話我笑容好喎，其實我都好緊張㗎，不過我希望大家會記得我做過主持啦！」

無綫缺人，造就朱千雪不用像以往港姐慣例般，要擺成年先正式開工，如今她做《勁歌》主持，雖然人工唔高，難得朱千雪唔介意：「o依家仲後生，最緊要係儲多啲經驗，搵錢仲可以有漫長機會去搵。」人緣好，公司又畀位你，好快搵到錢啦！

有網民撐，朱千雪未夠半年，就可以拍住崔建邦做《勁歌》主持。

採訪、撰文：林通賢

攝影：範仲良

化妝： Janice Chan

髮型： Vanessa Kong@ Hair festival walk

形象： Bryan@the flaming

服裝： Ted Baker