樂基兒袋狗掃貨念黎明
【中環ifc】返咗香港就密密開工嘅樂基兒（Gaile），今日會出席手錶活動，聽日又去做時裝店開幕。Gaile噚日下晝就去咗中環ifc嘅法國品牌Maje中環店試衫，當時有兩個助手陪住佢，Gaile仲袋咗隻好可愛嘅黑色狗仔一齊出街。Gaile喺店入面揀咗15分鐘就搵到心頭好，佢離開時，助手仲幫佢拎住幾袋戰利品。
問Gaile係咪全面復工，佢話：「有嘢做咪返嚟囉。」講到前日去咗滑水，Gaile話：「好鍾意，又可以同小朋友玩。」有指Gaile離婚返港後，一場騷嘅酬勞大幅跳升到50萬，Gaile否認話：「唔係，我不嬲對自己同客戶都好公平。」
另外Gaile接受楊崢嘅商台訪問，噚日繼續播出，Gaile講番黎明（Leon）求婚過程：「當年Leon講『不如我哋結婚』，冇花、冇跪、冇鑽戒，好簡單，但我都好sweet。」註冊後Gaile同Leon去咗個小島同朋友慶祝，點知落雨，Leon仲佢話可以下次再約朋友去慶祝。
【今日我至笑】前日滑完水嘅Gaile，噚日心情靚到爆，仲笑曬咁袋埋隻狗仔行街街㖭。
樂基兒喺助手陪同下揀衫，揀咗一陣就搵到心頭好。
樂基兒同助手一齊喺櫃位睇清楚啲戰利品。
掃完貨，助手就幫樂基兒攞住啲戰利品，仲安排佢上車。
唔明Leon金句
Gaile又爆Leon喺屋企都講金句：「有時會講，我唔明，一來我中文唔好，有啲英文我又唔識譯。」Gaile話同Leon嘅溝通方法係一齊睇戲同劇集，Gaile直認大家有互相影響：「我好少用腦思考，Leon係聰明人，令我聰明好多，我就令佢識享受唔同美食。」Gaile仲話好肯定Leon係佢從來未試過咁深愛過嘅人，唔知將來仲會唔會遇到。
採訪、攝影：盧妹、馬建華
上一則:安仔Sammi返港同車
