娛聞樂
與情敵馮德倫積怨 5年 星爺硬撬舒淇
2013年01月11日
周二（ 8日），星爺在新片《西遊•降魔篇》記招上，突然高調自爆女主角舒淇新女友地位，席間兩人更公然打情罵俏。星爺更寸爆話唔知馮德倫係邊個，明剃眼眉！
據知星爺不但飛起原定飾演此片女角的內地女新人，又將周秀娜戲份大減，只為捧自己心中女神。為了 冧舒淇，星爺連電影主題曲〈一生所愛〉都俾佢唱，除出街的女聲版外，仲有個兩人的合唱版，擺明憑歌寄意。
其實，星爺與馮德倫的擇偶口味十分相似，先後追過莫文蔚及徐若瑄外，兩人更合作過電影《跳出去》。不過，兩人拍此片時背後火花四濺，積怨甚深，難怪今次硬撬牆腳冇面俾！
周星馳在賀歲片《西遊•降魔篇》雖然冇份演出，不過身為導演、編劇兼監製的他，乃電影揸弗人。周二（ 8日）的電影記招上，星爺發揮巨星風範，自編自導好戲連場。一向估你唔到 嘅星爺，突然自爆主動約舒淇食飯，因而促成兩人合作。被問到兩人之後仲有冇相約飯局？他說：「都係 喺片場食啦。」話都未完，即時被舒淇笑住踢爆他講大話：「係仲未俾人影到 啫！」
再被問到現在有冇拖拍？星爺點點頭答：「係舒小姐。」記者表示舒淇是另一名 Stephen（與星爺同一洋名的馮德倫）女友時，星爺扮懵寸爆問：「邊個 Stephen呀？乜你（舒淇）名花有主喇咩？」問番舒淇認唔認星爺男友地位，舒淇笑笑口風騷回應：「唔會話你聽！」
其實兩位 Stephen於 08年拍電影《跳出去》時曾交過手，當時星爺任該片監製，而馮德倫則做導演。一向要話事的星爺，雖然從不出現片場，卻不時電話遙控馮德倫，並要馮日日向他匯報拍攝情況。
孖寶兄弟交換女友
周星馳與馮德倫兩位導演的英文名同叫 Stephen，估唔到追女口味一致，新舊女友都玩 crossover。
莫文蔚
94年，星爺搵莫文蔚演出《西遊記之月光寶盒》，當時傳星爺為莫文蔚狠飛朱茵。 95年兩人展開地下情，拍拖 3年分手。莫文蔚同星爺甩拖後， 99年便搭上馮德倫， 06年兩人曾傳婚訊，可惜於 07年 12月，莫文蔚自爆兩人分手。
徐若瑄
98年星爺同莫文蔚分手後，曾與徐若瑄相交 3個月，之後因星爺與於文鳳相戀，與徐若瑄感情便告終。 08年，徐若瑄在好友舒淇 嘅穿針引線下認識馮德倫，兩人被傳媒影到男方接載徐若瑄去街，令戀情浮面。可惜兩人在 11年因舒淇介入分手。
拍戲拗撬多
「馮德倫好嬲 㗎！覺得自己冇曬導演尊嚴，佢同星爺拍戲各持己見，成日有拗撬。後來發生淫照事件，星爺要馮德倫換走男主角陳冠希，更因為慳錢提議用立威廉。馮德倫勁反對，嫌佢冇知名度之餘演技亦一般。但星爺就堅持，馮德倫最後都要無奈就範，但勁嬲囉。後來套戲做宣傳，星爺帶埋唐英年出 嚟，席間兩人密密斟，成為傳媒焦點。反而導演馮德倫同主角張雨綺就被冷落。」知情者說。
自此之後，兩人再沒合作。 01年星爺響曬口話拍太極 嘅題材，可惜馮德倫卻搶先一步，聯絡了大陸的製作人華誼兄弟，快手快腳趕拍了（於去年上映的《太極》兩部曲，包括《太極：從零開始》及《太極：英雄崛起》）。星爺被人食了頭啖湯，頂住條氣在所難免。
兩個 Stephen唔妥到出面，加上星爺與於文鳳分手，回復單身後，硬撬牆腳就無後顧之憂。
據電影幕後人員爆料，星爺不時在片場 冧舒淇，完全唔放其正印男友馮德倫在眼內︰「逢有舒淇 嘅戲，星爺一定準時到片場，而且當日一定準時收工，因為佢要約舒淇食飯。 喺片場，佢唔單止好客氣稱女方做『舒淇姐』，仲會問『舒淇姐你覺得咁樣演好唔好呀？』不過飾演孫悟空 嘅文章，同做唐僧 嘅黃渤就慘喇。佢 哋兩個係大陸出名 嘅好戲之人，但星爺唔單止遲到要人等，一個鏡頭經常要佢 哋 take好多次至收貨。試過有次三十幾 take㖭，搞到兩個影壇阿哥好冇癮。」
據知星爺最初計劃拍《西遊•降魔篇》時，女主角「降魔女俠」本來一早意屬內地女新人，雙方連合約都簽埋。豈料星爺臨時變卦轉換舒淇，賠了數萬元給該女新人，並向她承諾「下次再找你」。由於舒淇接拍的條件之一，是要做電影唯一女主角，所以原本已拍好不少戲份的周秀娜亦要大幅刪剪，凸顯舒淇第一女主角地位。
冧住合唱情歌
舒淇除了是片中女主角外，星爺連主題曲〈一生所愛〉都指定搵初試啼聲的舒淇主唱， MV更於 1月 3日放了上 youtube，可惜點擊率只得 1萬 1千多。原來〈一生所愛〉另有一個合唱版，不過男聲並不是另一男主角兼係唱家班的羅志祥，而是冇份在片中演出的星爺。這個版本最終不會在市面公開，似乎是供星爺自娛居多。
一向心思細密的星爺，半搞笑承認舒淇是女友，既可收宣傳之效，又可以向馮德倫宣戰，一箭雙鵰，星爺真係識計數。記者致電馮德倫，但至截稿仍未有人回覆。
花絮洩蜜
拍攝花絮片段中，星爺同舒淇成日打情罵俏，甜蜜到滿瀉。
教做戲
一身《回魂夜》造型的星爺，出手教舒淇擺甫士，舒淇望住佢都係笑唔停口。
星爺開金口
舒淇唱主題曲〈一生所愛〉時，星爺不但監製，還有一個由星爺與舒淇合唱嘅版本，呢個版本只曾在記招上播放。記者聽過，覺得星爺都係主力做戲更好！
.[忽然1周]與情敵馮德倫積怨 5年 星爺硬撬舒淇
http://veryy8.blogspot.com/2013/01/1-5.html
