滾熱辣
贏盡查小欣 秘密武器壓軸 黎芷珊搵星爺出山
2012年10月19日
近日查小欣和黎芷珊霸盡報章雜誌版位，熱爆娛樂圈，不過兩人受到的評價卻差天共地。
查小欣的《爆足一周》播出僅兩周，卻被網民插足兩周；至於黎芷珊的《最佳男主角》獲粒粒巨星撐場，最高收視 26點，成績與口碑都贏查小欣九條街。
本刊收到消息，黎芷珊為贏盡死敵，將會再搵幾位有分量的嘉賓添食，包括已落實的「宇宙最強」甄子丹及吳彥祖，而壓軸出場的秘密武器，則是識於微時的死黨星爺周星馳。黎芷珊群星拱照，就連查小欣亦眼紅說：「佢實搵到㗎！」酸到漏！
黎芷珊主持的《最佳男主角》，近日成為 My TV人氣節目第一位，每晚點擊率超過 2萬，好睇過電視劇。相反被商台炒魷的查小欣，向來自恃人脈廣，但她主持的《爆足一周》，卻是炒冷飯舊料。第二集更唔識死，搵已過檔 CTI拍劇兼成日寸無綫的叛將蘇永康，回應同廖碧兒的緋聞。激嬲無綫，觀眾又唔 buy，查小欣唔頭痕就假。
親自打俾星爺
芷珊未有見好即收，相反更會添食多幾集，緊接梁朝偉最後一集播出。已落實撐場的是「宇宙最強」甄子丹及型男吳彥祖。不過黎芷珊自知單單靠這兩位型男也未必夠照，遂出動秘密皇牌。本刊收到消息，黎芷珊為省令招牌，將會搵久未亮相無綫的星爺出山。
「為咗添食，我哋都開過幾次會，話搵星爺唔係芷珊第一個提出，佢唔會打冇把握嘅仗，而係 Sandy（綜藝科總監餘詠珊）話要搵嘅。」知情人士透露，「芷珊可以直接搵到星爺，而且佢兩個間中都有出嚟食飯。嗰日芷珊打俾星爺，話會就佢個檔期。星爺喺電話中『哦』咗一聲，芷珊知佢性格，佢『哦』就代表佢會應承！不過芷珊都驚星爺有變卦，話會 keep住搵佢。」
其實星爺與芷珊是圈中真正老友，連肥監製錢國偉早前也大爆星爺多年前曾力追芷珊，而芷珊亦不諱言談及對方：「以前喺《 430穿梭機》，我同星仔係壞分子，成日掛住玩，曳到開工掛住笑，俾人 call咪鬧。偉仔都係星仔介紹我識，因為星仔同佢熟，有段時間我哋經常一齊食飯。」
叫無綫 cut芷珊節目
其實齋睇牌面，黎芷珊早已夠贏前輩查小欣，但今次黎芷珊要出動星爺做武器，全因有人背後做小動作所致。據知黎芷珊早前忙籌備《最佳男主角》期間，同時兼任星期一至五晚的《娛樂頭條》的台柱主播，與拍檔阿感（黎國輝）一直甚有默契。
但八月尾查小欣被陳志雲炒出商台後，無綫隨即斟她過檔。當時查已經知道黎芷珊有一個皇牌節目在手，為免被比下去，遂向無綫高層要求取消黎芷珊做主持的《娛樂頭條》，更撬走《頭條》的主播阿感過自己節目。據工作人員透露：「小欣姐同 Sandy講條件，話自己個節目同《娛樂頭條》性質相同，唔想同一時間有兩個類似節目，又講明要搵阿感做拍檔。《頭條》上月中開始停播，芷珊要到 9月初先知，唔嬲就假。」
人前扮 friend
有傳查小欣和拍檔阿感錄完兩集《爆足一周》後交惡，當日在化妝間，二人見面並冇打招呼，背對背全冇交流，但其後面對傳媒時，卻笑曬口扮 friend。
查：阿感係我揀嘅
上周五（ 12日），查小欣返無綫錄《爆足一周》時，承認自己一早 𥄫中阿感黎國輝。
記：我哋知你要求 cut黎芷珊做開嘅《娛樂頭條》，仲搵埋佢原本啲拍檔過檔？
查：阿感係我揀嘅！有咩問題？係公司問我想要咩人幫我，我覺得呢個男仔唔錯就要咗佢，你哋唔好又攞嚟造文章啦！其他嘢唔關我事。
記：好多人都覺你輸俾黎芷珊？因為佢搵到好多勁人，包括星爺。
查：佢（黎芷珊）響呢行 30年，同嗰班人一齊長大，佢實搵到㗎！但我係以採訪形式去做節目，同佢哋熟極有限。用我同佢比唔公平。
記：你驚唔驚無綫會腰斬你個節目！
查：呢啲嘢冇得驚，其實我哋係錄影，好多新聞問完播出時已經變舊聞，但第三集開始會轉做 live，希望有新景象。
黎芷珊則周一（ 15日）在電話中表示：「小欣姐係我前輩，我唔想同佢比較，你哋放過我啦！（《娛樂頭條》俾人 cut咗，你會唔會唔開心？）我都唔知點解會俾人 cut，不過冇辦法，呢啲係公司安排。（你搵周星馳做壓軸皇牌？）哎吔，我唔講得㗎，可以講得嘅時候我哋就會公布。」
夾硬搶人
查小欣未做《爆足一周》前，私下向無綫高層開出條件，要求腰斬黎芷珊做主持的《娛樂頭條》，更擸埋《頭條》黎國輝（圖）等其他主持，明剃黎芷珊眼眉。
激嬲無 綫
第一集收視口碑差，第二集查小欣一意孤行搵過檔 CTI的蘇永康做訪問，結果激嬲埋無 綫，遭前後左右圍剿，《爆足一周》隨時玩多幾周就要講 bye bye。
粉絲追看
《最佳男主角》播出一星期，最高收視達 26點，可喜可賀。有見及此，無綫除再找來巨星添食外，更計劃開拍《最佳女主角》，食住個勢。
