上流滙
愛駒斷腳被啪 王賢誌揼百萬再做馬主
2012年10月19日
最近榮升馬主的郭富城，愛駒「愛的呼喚」首次出賽即贏馬，熱爆全城，更帶動馬壇的明星效應。近年愈來愈多藝人當馬主，其中家族擁有多隻馬的王賢誌， 3年前花 70萬做馬主，愛駒「大將風騷」為他贏得兩次賽事，合共百多萬獎金。
上周三（ 10日），王賢誌到跑馬地馬場，為現年 8歲的愛駒打氣。可惜當馬匹跑入直路之際，突然斷腳跌低，更要即晚人道毀滅。事後王賢誌一臉無奈指︰「一般可以跑到 10歲，我呢隻馬都老，但冇諗過今日發生意外。」不過雄心勃勃的他，準備花百萬入新馬再做馬主。
上周三（ 10日），王賢誌現身跑馬地馬場，為出戰頭場 1650米的愛駒「大將風騷」打氣，他對賽事滿有信心，還與騎師大談馬經。於沙圈前望住愛駒的他，目不轉睛，與好友有講有笑，還與友人說︰「希望陣間拉頭馬啦！上年佢都贏過，不過我塞車趕唔切去拉頭馬，都有 啲遺憾！」
買重保險
賽事開始時，他一臉興奮遠眺賽道，其間突然收起笑容，原來他的馬匹準備跑入直路之際，突然斷腳跌低，未能完成賽事。事後他表示︰「真係無奈，即晚已經人道毀滅。佢跑都未跑曬，一用力就出問題，好失望。一般馬可以跑到 10歲，我呢隻馬（ 8歲）都老，但冇諗過今日發生意外。」
愛駒突然跛腳遭人道毀滅，以為損失慘重，原來王賢誌事前買重保險。「養馬都係有風險 嘅玩意，好似賽車咁，都會有意外。不過我有買重保險，佢 喺賽馬期間出事，賠償金額都可以 cover到買馬嘅成本。」雖然愛駒已魂歸天國，但未減他養馬決心。愛駒出事後翌日，他又再計劃買新馬，連馬名都諗好。「我已經諗定新馬叫『大將風暴』，好似我 嗰隻『大將風騷』，都係因為爹哋有隻叫『大將風範』。我哋呢批馬都係一個 family，不如改 啲名有關連，大家容易記得。」
視養馬為投資的他，提到由揀馬到改名都一手包辦時，甚享受當中過程。他滿足地說︰「好多嘢可以由自己決定，好似綵衣顏色。點解我揀黑白，因為我睇過相話黑白色最利我。當你決定咗，邊個騎師騎你呢隻馬都要著呢隻色嘅衫。馬名又係自己改，當然會有 啲規定，唔可以用人名，亦唔可以叫公司名做宣傳。成個賽馬牽涉好多人好多錢，唔係淨係合埋眼買個 number咁簡單。」
王賢誌離開無綫後，專心打理家族生意， 09年更拍住父親王忠桐賣藥品廣告。今年王轉投 now，為觀星台擔任主持。
馬主唔易做
王賢誌養馬，源於屋企人。「我不嬲對賽馬都幾有興趣，養馬可以話因為受屋企人影響，我爹哋同阿叔都有馬。買馬要抽籤，唔係淨係有錢就得。好多人都想養馬，每年只可以進口幾百匹馬，要抽中先養到，唔係人人有份。」為了加大抽中機會，他索性全家總動員，如同抽 iPhone 5。「爹哋話不如將我哋全家擺曬去抽，咁就容易 啲中。」他指養馬並非當養寵物，要玩得投入，除了每月花 5萬元照顧，更要有無限量時間。「我諗好多馬主都冇咁多時間去睇嚇隻馬，始終都係 for賽馬，唔可以亂咁攞 嚟騎。我見叻哥就真係好上心，佢投入，當 啲馬係仔仔女女咁，會餵佢食蘿蔔，又會睇埋晨操，我自問做唔到。」
做馬主步驟
成為馬主的手續多多，除了要夠財力，亦要講彩數，完成以下繁複步驟，馬主就獲得馬牌，象徵身份。
做馬會會員
馬會會籍分為五類，而賽馬及全費會員可申請成為馬主，入會費為 12萬 5千，月費為 650元。每位申請人，必須由馬會名譽董事提名。
抽籤做馬主
做馬主先要抽籤，費用全免。而馬匹擁有權亦分 3種，個人馬主成員人數為 1人、合股馬主可由 2- 4人共同擁有，而團體馬主則由 5- 50人組成。馬主必須為自己的綵衣式樣進行註冊。
購養馬匹
馬主可從拍賣會上競投馬匹，馬匹進口前需受為期 21天的體格檢驗。馬匹到港後需在沙田檢疫馬房進行 14天的隔離檢疫，合格便可移送至練馬師馬房。之後馬主便可為馬匹投保及提交馬名註冊申請表。馬匹英文名不得超過十八個字母，而中文名亦不能超過四個字。
報名出賽
馬匹出賽之前，馬主需填寫授權書為馬匹報名、宣布出賽及選配騎師，當中報名費為 2千到 6千不等，視乎班次而定。練馬師須於賽事前 7天內，公開操練旗下已宣布出賽的馬匹。
星級馬主
近年藝人馬主愈來愈多，當中包括洪金寶、譚詠麟、曾志偉等，連帶馬場都星光熠熠。
郭富城
今年榮升馬主的郭富城，愛駒「愛的呼喚」首次出賽便得冠軍，由第 4班升上第 3班，為他贏盡面子。「其中三成獎金分俾馬房，七成歸馬主，我淨袋廿幾萬，可以 cover番成本，會買紅蘿蔔同薄荷糖俾佢食！」
鄺美雲
今年又再度抽中新馬的鄺美雲，養過多匹馬，當年的「甜蜜福星」贏過多場賽事。現時是「千江映月」和「好好運」兩匹團體馬的馬主之一。
苗僑偉
三哥苗僑偉曾擁有馬匹「牧場王」，贏過 3次冠軍，共得 3百萬獎金，現已退役。
