當年今周
花旦相煎何太急
2012年10月19日
人一出世，注定要競爭。而有女人嘅地方呢，就一定有戰爭！依家我哋見到岑麗香、苟芸慧同高海寧穀「事業線」力爭「宅男女神」之位，鬥到波濤胸湧。查實喺網上文化仲未大熱嘅年代，花旦間嘅惡鬥唔止睇 body，仲講埋策略，好互動㗎！
嗱，睇番 2003年 10月 17日嘅《忽周》，當時 TVB開套《 3D無名天使》搵佘詩曼、郭羨妮兩位阿姐搭港姐師妹楊思琦，諗住力捧後者上位。正所謂「多隻香爐多隻鬼」，最早入行嘅阿佘，話咁快就同郭羨妮聯成一線，齊齊唔騷思琦妹。拍劇時，固然二人一組放食飯，懶理人哋「獨家村」。就算喺記者鏡頭下，亦一樣無面俾，阿佘拉住郭羨妮雞啄唔斷，但就當思琦妹係透明人，我睇你唔到呀我睇你唔到！
Well，以依家嘅用語嚟講，咪就係「小學雞」囉。
檔案編號第 429期
日期： 17/10/2003
鬥完又如何？
楊思琦弱女變躁媽
思琦妹一直以弱女姿態示人，直至上年佢突然狠撇拍拖 9年嘅李泳豪，再被踢爆早已搭上前跳水運動員吳帥，形象插水。點知吳生係空心老倌，楊思琦最終決定分手。現獨力撫養女兒楊卓穎，被指壓力極大，暴瘦又躁底，慘！
郭羨妮嫁人勤養女
郭羨妮肯捱肯搏，原本做多幾年，應該「視後」在望。不過，自從 07年佢戀上當時仲係人夫嘅陶大宇，人氣即刻大跌。近年佢索性轉戰祖國，仲順手搵埋內地武指朱少傑做老公，今年生埋囡囡 Kylie，啱啱回巢拍劇搵奶粉錢。
佘詩曼孤身闖祖國
相對楊思琦同郭羨妮，阿佘出名硬淨，排除萬難逐級上，終於喺 06年做咗「視後」。不過，喺情路上，就始終未上到岸，同鄭嘉穎欲斷難斷。近年，阿佘直情做咗「事業姊妹」，去勻好友如梁靖琪同姚樂怡嘅婚禮，又同鄭生一樣北上搵人仔，繼續戰鬥格！
