媽咪姐
羅仲謙梁烈唯開片
2012年10月19日
媽咪姐同好多「七十後」一樣，將鄭伊健、陳小春嘅《古惑仔》系列全部煲到滾瓜爛熟，想當年黎姿扮黐脷筋嘅「細細粒」好鬼悲情！但依家已經生咗 3個，做少奶奶咯。
估唔到 16年後嘅今日會重拍《古惑仔》，媽咪姐最關心邊個做陳浩南呢個角色，話曬伊健個長髮 look咁入型入格！結果依家搵咗羅仲謙擔大旗做陳浩南，應該貪佢有兩嚿胸肌夠 man啦。梁烈唯就做「山雞」，由林子善做「包皮」。
周二晚（ 16日）《新古惑仔》係旺角拍外景，主要角色都喺曬度，新浩南哥仲出力 sell新戲：「我哋會用全新故事同埋全新角色，因為年代唔同咗，以前古惑仔用 call機『吹雞』，依家就用 what's app，對白亦會有粗口，感覺接近現實好多，劈友把刀仲係堅嘢。」
新浩南哥咁落力，媽咪姐唔捧場都唔得啦！
