滾熱辣
北上溝仔 自爆分居 揭羅霖闊太坎坷實況
2012年10月19日
本周三（ 17日），羅霖自爆與丈夫劉坤銘分居 7個月，同日她被揭發在北京瘟花，時間夾得 啱 啱好。
其實夫妻兩人年半前已現婚姻危機。據好友透露，羅霖近年只是表面風光，她曾狂呻，因為老公生意不大如前，兒子的學費也要由她負擔，加上兩人聚少離多，婚姻早亮紅燈。
不過，向來愛面子的羅霖，為了三個囝囝，除了要守住「劉太」的名份，還要繼續與老公上演恩愛騷。但多年來冇樓揸手的她，兩年前已鋪定後路，搵定工靠自己。闊太背後的坎坷可見一斑。
羅霖（ Candy）與劉坤銘婚變消息，早在社交圈傳得鬧哄哄，雖然兩人感情大不如前，但依然戮力上演恩愛騷，共住在西半山月租約 4萬 5千的慧苑。上周二（ 9日）劉坤銘還攬住羅霖纖腰出席活動。月初兩人為「仁美清敍」建學校齊往黑龍江，亦同房過夜，完全睇唔出分居動機。
其實，羅霖與劉坤銘近年夫妻情淡，但兩個卻經常拍住搵食。據知，劉坤銘近年經常藉太太亞姐的知名度及人緣，在大陸做生意，可惜劉坤銘生意大不如前， 08年更變賣手頭上僅餘的北角屈臣道維多利中心單位，套現 1千 6百多萬周轉，但事業未見起色，兩人經常因為錢銀問題拗撬，感情逐漸破裂。關係最差時候，劉坤銘直情閂水喉，羅霖惟有開始為自己的事業鋪路，周圍撈。
撲水交學費
其實，兩年前羅霖與劉坤銘由上海搬回香港後，羅霖已積極投入工作。她曾向好友狂呻家事，自己不但冇樓揸手，連生活費都要靠自己︰「個仔 嗰十幾萬學費，我要自己搞掂，老公又唔理。」好友聽到也覺她可憐。羅霖不放過任何賺錢機會，曾替李彩華接 job及開經理人公司；又傳出她主動向亞視斟拍劇集，更連幾萬元的傳媒公關工作亦硬著頭皮去應徵，可見撲水有幾緊急。
「羅霖兩年前去 咗一間報刊見傳媒公關嘅職位，佢 嚟見工已經係話題，見工 嗰日仲要帶埋老公 嚟。不過好搞笑，佢講到話除咗薪酬之外，仲要廿四小時有專車接送，咁 嘅要求梗係見唔成啦！」
工見唔成，性格主動的羅霖惟有另闢蹊徑。去年開始，她頻頻北上認識富二代之外，又主動與不少美容院接洽做代言，執靚個樣，穀胸現身 ball場搵機會，藉以增加曝光率，亦因此與奶奶鬧不和。
羅霖向身邊友人透露：「奶奶經常向老公投訴，話我衣 著性感，會影響家族聲譽。又話老公做親生意都蝕本，唔肯再泵水俾佢。」雖然婆媳出現問題，但羅霖依然我行我素，積極性感打扮，近半年更頻頻往上海及北京夜蒲，身邊不乏年輕男士埋身。今年初亦與 18歲的亞洲先生林睿傳緋聞，「佢（羅霖）試過一星期上北京兩次。可能係屋企開支太大，同老公又唔開心，個人寂寞，咪搵其他途徑宣洩囉。」知情者說。
微博頻吐苦水
婚姻失敗，近日羅霖面對鏡頭時雖然已學會面對，不過她在 8月時，亦曾在微博吐過苦水，一時話要學絕情，一時又話有人唔珍惜自己，似乎將婚變 嘅矛頭指向劉坤銘。
分居卻同房
10月 17日，本刊向自爆分居 7個月的羅霖求證分居一事，她直認不諱，但她認分居但又認同房瞓，唔知邊句真。
記︰你自爆同老公分居 7個月，但今個月仲影到你哋一齊住喎！劉坤銘有冇俾贍養費？
羅︰係一齊住，為 咗仔女！分開都可以同住，太深入問題唔可以講。
記︰周刊影到你喺北京同個男仔繑手，佢係咪你男友？
羅霖沉默不語。
記︰你同老公去黑龍江，都係同房喎！
羅︰係呀……分居唔代表唔可以同房。
記︰報道話你哋共同撫養仔女，之後小朋友跟邊個住？
羅︰未決定呢個問題。
記︰有傳你向教友呻要自己負擔囝囝十幾萬學費。
羅︰（深呼吸）無 啲咁 嘅事，冇一間國際學校要十幾萬學費。
記︰三個囝囝夾埋？
羅︰冇可能，冇可能。
記︰係咪因為經濟問題令你同老公關係變差？
羅︰唔關事，係性格問題。
認傳媒見工
記︰兩年前係咪見過傳媒公關 嘅工作？
羅︰唔係。其實係佢哋問我會唔會做（呢份工）？我考慮 啫，冇諗過做呢一份工。
記︰咁你又上去公司見，劉生陪你去見 嗰喎？
羅︰係見過（工），不過係 part time……我只可以做 part time……唔可以做全職。
記︰鋪定路自己養家？
羅︰唔係，唔係……我覺得每個人要 keep住做 嘢，要有人生目標，唔係嫁 咗就唔做。依家小朋友已經長大，我想照顧小朋友之餘都要有自己 嘅事業。
做 咗闊太咁多年，樓都冇一層的羅霖，被爆北京瘟仔後，依家連「劉太」個名都保唔住，還要龜縮避鋒頭。本來她以「愛心大使」的身份，於 19日出席「兒童之家」活動，但「瘟仔」新聞一出，她立即取消活動。形象大跌加上經濟緊絀，羅霖可謂境況坎坷。至於劉坤銘，事發後不但再沒返回信德中心的公司，更拒接電話，避得就避！
老公食得慳
羅霖去 ball場一副戰鬥格，反而以「劉公子」見稱 嘅劉坤銘，私底下知慳識儉。好似佢同兒子食 嘢，都只不過係去老麥同連鎖壽司店，相當經濟。
富貴家族拒泵水
劉坤銘父親劉思仁早年從事飲食業，近年養尊處優。至於劉母蔡雪芳近年活躍樓市，有不少物業更是與劉坤銘的姐妹聯名，惟劉坤銘卻冇份染指家族產業，近年更拒泵水予劉坤銘做生意。
