探熱針
再續前緣 橫店執快錢 林峯有舊菜葉璿陪玩
2012年11月08日轉戰內地多年的葉璿，有水喉射住，掟錢開拍三十集電視劇《紫釵奇緣》，監製、女主角身兼兩職，肥水不流別人田，葉璿千挑萬選，搵番十一年前合作無綫劇《再生緣》、舊相好林峯做男主角。橫店開工，二人同場玩到癲，旁若無人。
自詡接拍大陸劇收近四十萬一集拋離三十五萬鄭嘉穎的林峯，全靠葉璿帶挈。
一早吼實
返大陸搵食，同香港買磚頭一樣，愈早入場，愈著數！人辦有葉璿，密執人仔多年，加上肯花時間留守內地，搭棚識人，成功搵到老細投資拍劇，撈埋幕後賺多筆，新劇《紫釵奇緣》，葉璿做女主角霍小玉兼孭埋監製，由故事內容、戲份到角色挑選，獨攬大權。
早前，葉璿在微博搞男主角選舉整色整水，結果都是益自己友，點名要老相好林峯做男主角。開鏡當日，葉璿對住林峯笑咪咪說：「其實一開始構思呢個劇，我心目中 嘅男主角已經係林峯，由佢做有型、打得又癡情 嘅黃衫客，係最適合。」
啤酒當水
憑《雷霆掃毒》的 chok警有份同《大太監》黎耀祥爭視帝的林峯，趁十二月中的頒獎禮未打埋身，留守橫店開工，雖然身為男主角，卻肯降呢與全劇組入住當地廉價賓館，無同葉璿斤斤計較，十分抵諗。
啱 啱開機，林峯與葉璿同場戲份並不多，開完日班仲要拍夜場，林峯索性唔落妝，戴住古裝頭到串燒店食燒烤晚飯。一坐低，未嗌餸先嗌啤酒，啤酒當水飲的他，食住串燒玩微信，其間更多次走到店外傾電話，相當鬼馬。
另一晚，林峯與女主角葉璿同場在山邊拍外景，不用埋位時，二人例必黐實，傾到雞啄唔斷，又不時細聲講大聲笑，對於變曬樣的舊愛林峯，葉璿明顯 冧爆。
齊齊失蹤
開工黐埋唔怕耳目多，但收工有下文，葉璿和林峯便提高戒備。有一晚，無夜班通告，住同一賓館的林峯葉璿前後腳坐保母車離開，葉璿先落樓，上車後不停兜圈，之後林峯再坐另一架車出外，司機同樣超曬速，甚至揸上高速。花了近一個小時，終於撇甩記者，二人至淩晨時分，仍未折返。
