2012年11月8日星期四

金喜善換樣　鍾麗緹失修

2012年11月08日

上個禮拜四（十一月一日）晚，有雜誌響上海搞咗個時尚頒獎禮，中港台韓星，紛紛俾面做嘉賓行紅地氈。

離婚結婚又離婚嘅鍾麗緹都有份，紅色透視裙加埋一張烈焰紅唇，九十年代性感女神話曬生咗三個女，四十有二，昔日迷暈過郭富城周星馳嘅蛇腰，已經變成水桶狀，厚粉濃妝亦遮掩唔住年華老去四個大字。

《甄嬛傳》大紅嘅孫儷，活動當日黃昏已經響微博預告：「終於快要病了，抗住。」嚟到果然一副病樣，影完相要即刻著番件大褸保暖。

要鎖住年齡秘密，要學嚇來自韓國嘅嘉賓金喜善。○七年出嫁，兩年後生咗個女，金喜善今年中復出娛樂圈，過去五年一邊做闊太一邊做媽咪，冇殘冇老冇變師奶，個樣靚到直頭變咗第二個人。當然！韓國除咗泡菜同高麗參出名之外，執樣功夫，同樣到家！

上世紀宅男女神，鍾麗緹副魔鬼身材已經走曬樣，證明佢當年出露點寫真留紀念呢個做法係相當正確。

一套《藍色生死戀》響大陸紅足十幾年嘅宋承憲，無論係頒獎禮抑或響入住嘅酒店樓下，都俾大批 fans包圍，一位女影迷唔理勸告伸咗半個身入車窗同偶像傾偈，被高大保安用武力扯開！