探熱針
東莞密密送 JJ餵飽樊少皇
2012年11月08日被踢爆同 JJ賈曉晨拍拖半年後，樊少皇隨即連番遭起底，揭有一個一齊廿年的「前妻」阿霞，為他生了一對仔女， JJ亦負上「小三」之名；三角關係爆煲，樊少皇發聲明澄清與無婚約的「前妻」已分手四年，公開力證 JJ不是第三者。
雖然攞正牌坐正，但有劇在身的 JJ依然咬實唔放，樊少皇在東莞拍戲， JJ不辭勞苦，晚去日返，人釘人上東莞 mark實男友，密密送餵飽樊少皇。
撲上撲落
樊少皇公開同「前妻」攤牌，放下「人夫」包袱，與 JJ攞正牌恩愛。正趕拍無 綫新劇《好心作怪》的 JJ，早前被發現帶埋男友返廠開工，唔耐煩的樊少皇更導演上身，批評燈光打得唔好，又教同 JJ做對手的袁偉豪做戲。
拍拖更開工招來話柄，有指 JJ近期開工趕收工，令劇組不滿；但她一於話之你，繼續專心瘟仔。早前，樊少皇在東莞拍楊盼盼執導的電影《少年英雄》，對與女友分隔兩地，他公開說：「 JJ好忙，佢邊行得開上 嚟探我班！」口不對心！本刊記者發現當晚 JJ已經做人肉速遞，連環幾日北上密密送。
男友處身「東莞的森林」，留香港拍劇的 JJ唔放心，寧願犧牲 瞓覺時間，連續幾晚，一收工即 book中港車，熬兩小時車撲上東莞餵男友。日頭開工九粒鐘拍劇，上到東莞， JJ直奔片場陪樊少皇至淩晨，才一起返回下榻的酒店。宿一宵，翌日早上攰到散咗似的她又馬不停蹄趕返香港開工，晚上收工又再北上，日日如是。
扮唔識
兩個一入酒店扮唔識零交流，樊少皇先行搭上房，女的故意走去招待處問嘢，待樊少皇上房後， JJ才隨後跟上。
消耗戰
連環餵仔，操勞的 JJ上週二（十月三十日）不用開工，之前一晚又撲上東莞會合樊少皇，再一齊落深圳消夜。
過往兩人無論拍拖到沙田食雞粥，還是飛北京撐 枱腳，二人都不在人前表現親暱；但是夜毋須趕頭趕命的 JJ心情輕鬆戒備心低，當街與樊少皇又挨又繑，毫不顧忌。
人釘人消耗男友精力，與樊少皇同場埋位的陳國坤、林子善等見狀，都忍唔住取笑 JJ。「同 JJ拍拖之前，少皇係同陳浩民嗰班人玩，估都估到係咩料，男友長期 喺內地，你估 JJ唔驚咩，所以無論坐車抑或坐飛機，總之一有時間就去 mark實條仔。日日咁香港、東莞撲上撲落，好多時 攰到喺片場瞓著，陳國坤同洪爺（林子善）見到咁，都忍唔住話佢『使唔使拑得咁實呀！』。」一名劇組人員說。
講到尾，一個願打，一個願捱！
