同你吟一吟
劉心悠飲酒打茅波
2012年11月08日娛圈蒲精嗲精數之不盡，百毒不侵人辦，早年有 Kelly陳慧琳，近年多咗個劉心悠。近乎零緋聞，唔怕肥打邊爐仲要嗌白飯，年年跑馬拉松，健康到不得了。食得跑得，來自台灣嘅劉心悠唯獨唔劈得，更正：係一啖都唔得，即刻面紅。自己知自己事，心悠上星期五（十一月二日）出席新戲《天生愛情狂》慶功，同張智霖、導演葉念琛一齊祝酒，個個起哄要佢乾杯，心悠打死唔肯，仲成個擰轉身，之後得番隻吉杯，變魔術一樣。
心悠飲酒打茅波，企硬唔願破戒，仲有「錫肉」！是夜心悠身上件貼身 tee領口高到上鎖骨，但俾現場記者隊住閃，即刻向助手求救要攞頸巾。有主見本來係好，但小事都執著，就會 over，娛樂圈大忌，劉心悠行極都上唔到，不無原因。
