吳啟華冧蔡少芬：諗過追佢
吳啟華於1983年投考第12屆無綫電視藝員訓練班而入行，由飾演反派至專業醫生，把人物、性格都拿捏準確，但自言容易愛上人的他，與合作女星屢傳緋聞，先有訓練班同學藍潔瑛、1998年《妙手仁心》蔡少芬和2002年《黑夜彩虹》羅泳嫻等，其中最繪影繪聲的要算與蔡少芬一段，二人雖未有正式發展，但啟華承認有真正愛過對方！啟華一連五日更會透露他緋聞以外鮮為人知的軼事。
吳啟華經常同Ada情侶檔拍劇，他承認因此愛上對方，但最終因擔心影響友情而沒有表白。
我喺1998年時拍鄧特希監製嘅《妙手仁心》，演腦外科醫生「程至美」的角色討好，同蔡少芬（Ada）演情侶亦好受落，所以嗰年台慶都攞到啲獎，其中包括「最佳拍檔」大獎等，到2001年演《妙手Ⅱ》亦贏得「我最喜愛拍檔」獎，更加造就我跟Ada「呢段情」似乎理所當然！
同Ada嘅情侶組合的確好合拍，好多人問我，拍戲時有冇戲假情真？大家當時未結婚，見佢靚女又幾好，真係有諗過！我哋當時連續合作幾套劇，一齊拍嘢對得多做咗朋友，一對情侶就係由朋友間到互相欣賞，到發展至深愛對方啫！
吳啟華看著Ada組織家庭，他表示戥對方開心。 
Ada認為吳啟華心地好，但雙方因性格問題而沒有走在一起。
驚影響友情
雖然我係演員，但對我嚟講，拍戲同現實生活其實差唔多，一Roll機我就當真，我喺戲裏面真係鍾意Ada，但現實生活中，佢好「倀雞」、好大女人，但戲外真係有撻著嘅感覺，真係有諗過追佢！當時我哋合作拍《壹號皇庭V》已經係情侶，第二、三套《妙手》都係情侶，慢慢接觸多咗，不過Ada後來詐我型，話我拍到第二、三個劇先同佢講嘢！嗰次合作後抽身真係有啲難，可能真係有感覺，我又會諗……其實Ada又唔係一面倒「倀雞」嘅！當時我冇同佢講（表白）呀……唔敢講！要考慮得好清楚，大家原本係同事，搞啲咁嘅嘢好似唔係幾好！正因為怕拍拖不成傷害咗朋友關係，最後都丟淡咗。
羅泳嫻與吳啟華合演《黑夜彩虹》而曾拍拖一年。 
石洋子為吳啟華誕下一女兒。 
吳啟華（左）因拍戲而認識Ada老公，他坦言二人相熟。
同張晉都熟
直至拍完《妙手》第三輯後，大家真係做咗好朋友，Ada結婚都有請我去觀禮，平時我返嚟香港，都會探嚇佢！因為我同佢老公（張晉）都熟，我哋喺內地合作拍《俠醫傳奇》時識，當時監製話我知佢哋一齊，可以講我係睇住佢哋拍拖，戥佢開心搵到個伴侶，而當時我亦認識到依家個老婆（石洋子）。我對Ada呢份「感情」，好多fans都有問，之後都有喺微博講過，當時Ada都有回應，佢話好彩我最後冇鍾意佢，唔係我就慘！哈哈！
2002年我同羅泳嫻（裸泳）合作《黑》劇日對夜對而撻著，但都係拍咗一年左右，期間我去咗北京拍嘢，喺上面遇到另一個更適合嘅女仔，點知又畀人亂寫話『一拖三』召妓，我好嬲，但裸泳都好難堪，最後我哋因為呢件事搞到分手收場。
口述：吳啟華
筆錄：影視組
攝：秦健輝
服裝：MA Gin
Ada剖白：feel到佢想溝我
吳啟華對蔡少芬（Ada）動真情，原來Ada亦感覺到，只不過雙方性格不合，最重要是Ada想搵基督徒為對象，二人才沒有發展成情侶。Ada接受訪問時說：「我梗係feel到，其實呢個圈都好多人追我，我分得好清楚，邊啲只做到朋友，總之我唔會用友情嚟賭啦！」 
吳啟華曾與蔡少芬贏得「我最喜愛拍檔」獎。
與啟華分屬好友，Ada坦言雙方性格有異：「未必係佢有問題，可能我都有問題，無謂越界，反正我都想搵基督徒做男友！（改造佢？）冇啦，啟華原本係基督徒，後來轉信佛教！不過，啟華係好有義氣嘅人，對朋友好好，試過有個PA問我哋借錢，我覺得佢好似講大話冇借，但啟華借咗畀佢，後來我問番佢點解仲借？啟華話最緊要幫咗人先啦！所以我覺得呢個人心地好！」
藍潔瑛男仔頭撻唔著
吳啟華於訓練班時期，曾傳出與同班同學藍潔瑛拍拖的緋聞，藍潔瑛當年出道已有「靚絕五台山」之稱號，不過，啟華對這段緋聞卻鄭重否認。 
當時「靚絕五台山」的藍潔瑛曾被傳與吳啟華拍拖。
吳啟華澄清當時只是與藍潔瑛、吳君如和劉嘉玲等一班人玩，曾試過大夥兒到他哥哥吳啟明的別墅玩，關係純過蒸餾水，啟華說：「藍潔瑛當時比較男仔頭，反而跟我哥哥啟明還熟，而我就暗戀曾華倩，喺一次訪問中都講過，點會同藍潔瑛傳緋聞呢？記者亂寫！」
