趙世曾極速換女
【銅鑼灣霎東街】風流富商趙世曾又有新女上場，繼日前撇低拍拖幾年嘅女友Lena，同位短髮女仔喺中環置地開餐，又舔叉畀短髮女用後，前晚10點幾，趙世曾又同一位孭住Chanel手袋嘅新女，拍拖出現銅鑼灣霎東街，女友睇落都有30幾歲，仲小鳥依人咁蹺住趙世曾行街。佢哋去咗時代廣場嘅金滿庭食飯，雖然門口有人等位，但貴為有錢佬嘅趙世曾當然即刻入座啦，不過成餐飯佢哋冇乜交流。
【今日我至威】風流成性嘅趙世曾又有新女上場，前晚佢同30幾歲嘅女友夜遊銅鑼灣，一把年紀嘅趙生身邊女伴車輪轉，真係好威風囉！DV圖片
【十指緊扣】
■趙世曾同新女十指緊扣步入食肆撐枱腳，甜到漏。
【唔使等位】
■唔使喺食肆出面等位，但趙世曾入到店內都要等侍應執枱。
【專人服侍】
■趙世曾戴番副老花眼鏡睇菜牌，食肆經理殷勤招待。
跳坑渠避綁匪
呢排趙世曾因反對女兒式芝同楊如芯嘅同性婚姻，豪擲5億招婿轟動國際，港台噚日播出佢嘅錄音訪問，問佢恨唔恨做外父？佢話：「冇所謂，囡囡鍾意點做自己揸主意，父親畀唔同路佢行。」不過佢強調囡囡冇結過婚，因為冇合法結婚證書，問會唔會見楊如芯？佢話：「佢朋友同我冇關，自己選擇想識嘅人。」
現年76歲嘅趙世曾表示每年都改遺囑，除咗留畀仔女，仲會做善事。提到當年俾人綁架，佢話：「喺深圳食完飯出嚟俾人劫上車，用刀壓住我頭，我一落車大聲叫救命，見到有條坑渠有積水幾深，我跳咗落去搏命遊，試嚇可唔可以走甩。」
採訪、攝影：徐錦池、吳耀輝
■本月9日，趙世曾拖短髮女去置地開餐，估唔到咁快換畫。
上一則:JC開中門襯亞生
下一則:陳冠希煲煙玩狗
