搜尋此網誌

2012年10月24日星期三

王喜午夜凶鈴 拷問樂易玲 爆無綫潛規則

王喜前晚為其電台節目開記招,昨淩晨開咪頭炮便是打電話給傳不和的無綫死敵樂易玲。


王喜午夜凶鈴 拷問樂易玲 爆無綫潛規則

商台開咪 搵無綫死敵祭旗

君子報仇,十年未晚,王喜卻只用了一年時間。身為「迷雲黨」中堅分子的他,去年慘被無綫棄用,操生殺大權的正是與他傳不和多年的無綫高層樂易玲。王喜昨日淩晨在商台節目《起來!大龍鳳》開咪,頭炮便藉機搵死敵祭旗,他漏夜急call樂易玲,在大氣電波中一輪嚴詞拷問,令樂易玲承認娛圈潛規則的存在,王喜終一雪當年被炒魷之恥。

現年45歲的王喜去年黯然離開效力16年的無綫,身為「迷雲黨」的他因對志雲忠心耿耿,一直盛傳與藝員部的掌舵人樂易玲不咬弦,去年因志雲官司纏身,樂易玲即掃「喜」門,王喜自爆被藝員部提出賠錢解約的要求,炮轟被棄如草芥,之後他轉投now懷抱,更無所顧慮,不時抨擊無綫。



王喜前晚為其電台節目開記招,昨淩晨開咪頭炮便是打電話給傳不和的無綫死敵樂易玲。

陳志雲(右)前晚力撐王喜開咪,兩人更鬼馬地展示雙手,力證沒有撞錶。

陳志雲(右)前晚力撐王喜開咪,兩人更鬼馬地展示雙手,力證沒有撞錶。



王喜身為陳志雲的愛將,連商台職員編號都得到「881」靚冧巴。

曬冷排位有潛規則

近日王喜得志雲帶挈重返商台主持新節目《起來!大龍鳳》,昨日淩晨12時30分開咪,頭炮主題環繞娛圈熱門話題「潛規則」,並預先邀請了陳善之和霍汶希等經理人分享,之後王喜就表示無綫擁有幾百個藝人,總會有藝人被要求做合約以外的事,為求探討真相,王喜即著監製在昨日淩晨1時致電樂易玲,樂易玲以充滿睡意的聲音接聽電話,並在毫無準備的情況下被王喜連珠發炮追問無綫的潛規則近20分鐘,令一向身經百戰的樂易玲無力招架,最終直認有潛規則存在。

王:王喜 樂:樂易玲

王:成日話我哋不和,唔想叫陳太、樂小姐,可唔可以換個親暱啲嘅方法稱呼你,等人覺得我哋冇嘢?

樂:嚇?我哋有嘢咩?

王:家大家都唔同公司,唔使避忌,friend啲叫你冧把(620)。我想問TVB有冇被客戶要求過做潛規則,簽好約後,客去到現場就要求同藝人食飯、卡拉OK等?

樂:TVB係大公司,做job有白紙黑字,完全冇又冇可能,特別係annual dinner,台上唱完歌都希望同藝人影相,有咁request,經理人視乎情況會同主人家打招呼影相,我哋通常會話artists係唔食飯,你都知,餓啲著件衫靚啲。

王:Artists同其他競爭者有關係就唔方便喺呢個台出現,但近排係咪潛規則放寬咗呢?蘇永康可以上,但點解張可頤又唔得?兩個都係幫王維基拍緊嘢。

樂:有啲娛樂新聞出去訪問唔係我哋artists嘅人,都試過有啲都唔肯上我哋節目。

王:每年影大合照,簡直係TVB潛規則最具體嘅表現,企位全部都有寓意,排位點出嚟?冇理由抽簽出嚟。

樂:有時係節目需要,如果喺現場做緊節目就會企中間,唔係做節目嘅(大合照)就係排出嚟,影相或諸如此類,我諗都幾頭痛。

王:但今年有幾個唔見,唔見蘇基(古明華)㗎?(指今年7月17日為節目《玩轉三周1/2》總動員329位藝員拍合照)

樂:我哋係全台call,有啲同事唔喺香港,有啲同事就唔係個個劇組都放人。

王:點樣排出來?咁有系統規則,第一行、第二行。

樂:好似你話齋有啲潛規則。

樂易玲昨日淩晨被王喜追魂call醒進行大逼供,她更直認TVB有潛規則。

樂易玲昨日淩晨被王喜追魂call醒進行大逼供,她更直認TVB有潛規則。

有陳志雲帶挈,王喜前晚獲眾好友力撐他主持的電台節目。微博圖片

有陳志雲帶挈,王喜前晚獲眾好友力撐他主持的電台節目。微博圖片

樂易玲承認無綫藝員曬冷大合照,排頭兩行的必是當紅小生花旦。資料圖片

樂易玲承認無綫藝員曬冷大合照,排頭兩行的必是當紅小生花旦。資料圖片

樂易玲認負責排位

王:係呀?真係有,我都話有啦,多謝冧把!

樂:大家心裏面有啲規則抱住、跟住,就比較容易啲做,因為實在人多。

王:最尾邊個拍板定案決定就咁排?

樂:(尷尬)我囉……我哋囉,呢個真係藝員部工作,我排完會畀嚇監製、兩大controller,或者有時畀我直屬上司跟一跟,但通常都冇乜意見。

王:你嘅潛規則點定?係唔係睇乖定唔乖,熟啲唔熟啲?

樂:以上所講都唔會,第一係從個份量啦,份量包括藝員喺公司裏面個份量,好似阿姐(汪明荃)次次都喺中間,有啲份量企中間,其他artists都會覺得舒服,因為佢哋都respect佢哋,前面會係當家小生花旦,management定唔management係冇關係,第二,一定係會有今年拎視帝視後或者男女配角,其他會諗係老人家先。

「係夜啲有啲突然」

樂易玲被王喜搞到冇覺好瞓,兼被追問到口啞啞,她昨被問到可感到被王喜整蠱?她說:「夜就係夜啲,有啲突然,不過聽到係佢,仲係第一日開咪,即刻提起精神答佢問題啦。」但王喜稱她為冧把,是否沒禮貌,樂易玲大方說:「都係一句啫,細個邵氏做嘢個個都叫我620。」

此外,王喜前晚為《起》舉行記者會,除了陳志雲助陣外,容祖兒、鄭裕玲和詹瑞文等傾巢而出撐場。志雲透露是愛將梁泰來(Terry)負責邀請嘉賓,問到王喜和Terry誰較得寵時,志雲說:「你估談情說愛?大家各司其職。」

採訪:葉雪、王連連

攝影:林德雄

網站電台訪問:起來!大龍鳳-王喜訪問樂易玲

恩怨情仇

志雲死黨遭樂炒魷

王喜08年為無綫登珠峯卻出現高山反應,獲安排坐專機返港,可見他當時頗受無綫器重。

王喜08年為無綫登珠峯卻出現高山反應,獲安排坐專機返港,可見他當時頗受無綫器重。

王喜昨日淩晨在商台自家節目致電拷問其無綫死敵樂易玲,擺明跟她「玩嘢」,事實上兩人自08年起已有嫌隙。猶記得當年王喜為無綫登珠穆朗瑪峯直擊奧運聖火傳遞過程,卻出現高山反應,救護車送他到醫院途中又失控墮河,無綫安排他坐醫療專機飛返港,可見他當時頗受器重。同年,王喜準備與無綫傾續約,有指他扮大牌兼跳草裙舞,令公司高層不勝其煩,其時有傳王喜和得令的鄭嘉穎因拍劇集《烈火雄心III》而不和,有指嘉穎向樂易玲篤背脊,指王喜扮大牌及改劇本,雙方關係已達臨界點。

陳志雲前年捲入涉貪案,身為「迷雲黨」的王喜高調為他擔遮擋雨,結果被無綫棄用,原本是主角的他,在處境劇《天天天晴》淪為大茄,之後又遭無綫雪藏18個月。藝員部揸弗人樂易玲全權主宰藝員生殺大權,去年王喜被逐出無綫,16年賓主關係一筆勾銷,他無奈暗嘆:「我被視為棄如草芥,安然接受啦。」



Related Posts Plugin for WordPress, Blogger...